2023-imi naartuersinnerit 1034- iupput naartuersittullu 988-iullutik. Arnat naartusinnaasut (13-iniit 49-inik ukiullit) 1.000-iuppata 69-it naartuerneqarput. Peqqinnissaqarfik Qeqqani amerlanerungaatsiarlutik Peqqinnissaqarfik Avannaanilu ikinnerpallutik, tamanna imaaliallaannaq nassuiaruminaappoq qitiusumilli immikkoortut illoqarfittaanni illoqarfinnilu minnerusuni assigiinngissut malunnaateqarpoq- ilaatigut ikittut qitiusumik imm. illoqarfittaanni suliaritinnikkut naartuersinnissamut innersuunneqartarnerannik inuusuttullu allat meeqqiorsinnaasut illoqarfinnit najugaqarfiniillu minnerusunit- najugartik allanngortinnagu- qitiusumik immikoorni illoqarfinnut nuutarnerannik nassuiarneqarsinnaalluni.
Arnat naartusinnaasut 1.000-iuppata naartuersittut 2.572-iupput. Taamaalilluni arnat 1.000-iuppata ernisut 1.731-iullutik, arnat amerlassusaannut sanilliullugit ukiumut uumallutik inunngortuniit naartuersittut amerlanerujussuupput.
Naartuersittut amerlanersaat 20-it 24-illu akornanni ukioqarput, 15-illi 19-illu akornanni ukiulinni amerlangaatsiarlutittaaq. 15-it inorlugit ukiulinni sisamat naartuersipput.
Nakorsaatit atorlugit nartuersittut 870-iupput (84.1 %), 158-it (15,3 %) suliaritillutik arfinillillu (0,6 %) nakorsaatit atorlugit naatuiineq iluatsinngimmat kiliortittariaqarsimallutik.
Tasiilami suliaritillutik naartuersittut amerlassutsimikkut nuna tamakkerlugu suliaritillutik naartuersittut pingajoqarterutigaat, tamannalu nuna tamakkerlugu naartueeriaatsit assigiinngitsunut agguataarnerini, suliaritillutik naartuersittut nuna tamakkerlugu akulikippallaatut misingersorneqarnerisigut kukkunertut isikkoqalersitsisinnaavoq.
2023-imi arnanit 988-init 46-it (7,0 %), marloriarlutik naartuersipput
2023-imi arnat 28-it kingusissukkut naartuersinnissamik qinnuteqarput, taakkunannga 27-it akuerineqarput ataaserlu itigartitaalluni. Naartuersittarneq pillugu isumalioqatigiinnit akuerisanit 27-init 22-ini inuttut atukkat tunngaviupput. Kingusissukkut naartuersinnissamut akersinissamut patsisaasut pingarnerpaat tassaapput anaanatut kisimiittuuneq, inuttut inerisimannginneq, ilaqutariittut inuuneq aamma/imal. ineqarneq, tarnikkut ajornartorsiutit, nakuuserneq, aanngajaarniutinik atuineq. Akerlianik itigartitsinermi ataatsimi, ilaqutariinni/attaveqarfinni tapersersuisoqarneq arnallu peqqissuunera pingaartinneqarput. Sisamat naartup innorluuteqarnera innorluuteqarsinnaanerataluunniit ilimanaateqarluinnarnera pissutigalugu kingusissukkut naartuersinnissamut akuerineqarput. Kingusissukkut naartuersittumi ataatsimi arnap nammineq napparsimanera akuersinermi tunngaviuvoq.
Arnat naartusinnaasut amerlassusaannut sanilliullugit, ukiut qulit ingerlanerini naartuersittut 2023-imi amerlanerpaajupput. Pitsaanerusumik nalunaarsuineq naartuersittunillu sukumiinerusumik nalunaaruteqartarneq, amerlinerannut patsisaasut ilagisinnaavaat.