Eqikkaaneq
2023-imi Ilulissani, Sisimiuni Qaqortumilu qitiusumik napparsimmaviit Nuummilu Napparsimmavissuaq
Tasiilamilu peqqissaavik ernivissaapput. Ukiup ingerlanerani meeqqat uumallutik inunngortut 722-iupput,
taakkunannga 340-it niviarsiaraallutik 382-illu nukappiaraallutik. Arnat amerlassusaannut sanilliullugit
ukiumut uumallutik inunngortunut tunngatillugu, Peqqinnissaqarfik Diskomi najugaqartut meerartaartut
amerlanerpaapput Peqqinnissaqarfik Sermersuumilu najugaqartut meerartaartut ikinnerpaallutik. 2023-imi
3
ernisut agguaqatigiissillugit 29-inik ukioqarput, ukiukinnerpaaq 16-inik ukioqarluni ukioqqortunerlu 45-nik
ukioqarluni. Meeqqat inunngortut amerlanersaasa arnaat 20-it 34-illu akornanni ukioqarput, 20-illi inorlugit
ukioqarlutik meerartaartut amerlangaatsiarlutittaaq. Arnat meerartaarsinnaasut 1.000-iuppata
meerartaarsinnaanerlu 2023-imisut ippat, agguaqatigiissillugit meerartaarineqartussat 1.736-iupput.
Marlulisut tallimaammata ernisut katillugit 723-iupput, taakkunanngalu 517-init (71,5 %) Nuummi Dronning
Ingridip Napparsimmavissuani inunngorlutik. Ernisussat qitiusumik immikkoortunit allaneersut tassunga
innersuunneqartarmata, tamanna qitiusumik immikkoortumi innuttaasut amerlassusaannik
takutitsinngilaq. Tamatuma saniatigut Peqqinnissaqarfik Avannaani qitiusumik napparsimmavik
amerlaqisunit (13,4 %) erniviuvoq. Ernisut marlunnik pingajorarterutaasa missaat (59,3 %) qitiusumik
immikkoortumi najukkaminnut attuumassuteqartumi ernipput. Ernivissatut toqqagaanngitsuni ernisut
tallimaapput, taakkunanngalu sisamat siusinaarlutik ernillutik.
2023-imi uumallutik inunngortut 1.000-iuppata toqungallutik inunngortut inunngornerminniillu sap. ak.
qaangiutinngitsoq toqusut 15,1-iupput, meeqqallu uumallutik inunngortut 1.000-iuppata ullut siulliit 28-it
ingerlanerini toqusut 8,3-ullutik. Ukiut arfinillit ingerlanerini inoorlaat 1.000-iuppata toqungallutik
inunngortut sapaatillu ak. siulliup ingerlanerani toqusut 12,6-iupput uumallutillu inunngortut 1.000-iuppata
ullut 28-it siulliit ingerlanerini toqusut 8,4-llutik.
Meeqqanit inunngortunit 728-init 83-it (11,3 %), naartunerup sap. ak. 37-issaat sioqqullugu inunngorput
52-illu (7,2 %) naartunerup sap. ak. 41-issaata kingorna inunngorlutik.
Nuna tamakkerlugu ernisunit 723-init 79-it (10,9 %) pilatsillutik ernipput – taakkunannga 21-it
pilersaarutaasumik pilatsillutik 58-illu pinasuartumik pilatsillutik.
Ukiut qulit ingerlanerini ernisut ikiliartorput, 2023-imilu ikinnerpaallutik. Arnanulli meerartaarsinnaasunut
sanilliukkaanni taamaappallaarani. Ukiut siuliinut sanilliullugu ernisut agguaqatigiissillugit
ukioqqortusiartorpasipput tamatumalu peqatigisaanik meeqqat inunngortartut ikiliartorlutik.
Maanna nunatsinni pissutsit, Nunani Avannarlerni allani pissutsinut- agguaqatigiissillugit arnap marluk
inorlugit meerartaartarneranut, taamaammallu innuttaasut taartissaminnik kinguaassiorunnaarnerannut
assingujartorput.
Nalunaarusiaq uani atuaruk