airplanebooksbriefcase business cogs cross election entertainment fish house law lockmedicalpeopleselfservices socialtax

Tuberkulose sunaava?

TB nappaataavoq tuniluuttoq tappiorannartunik bakteerissanik patsiseqartoq.

Tuberkulose sunaava? 

Tappiorannartut puanniikkajunnerupput, timilli pisataani allani- ilaatigut saanerniissinnaalluni qinersiniissinnaalluniluunniit. Sakialluut kisimi tuniluuttarpoq.

Tappiorannartut kigaatsumik amerliartortarput, nappaallu ukiut arlallit pinngoriartorsinnaasarpoq. Kuseriarnerit tappiorannartut, inummiit tunillannartumik sakialluutilimmeersut ilummoorunneqarnerisigut, nappaat tuniluuttarpoq. Quersornikkut, oqalunnikkut tangajornikkullu kuseriarnerit tappiorannartut silaannarmi siaruartarput.

 

Tuberkulosep sunniutai suuppat? 

TB puanniikkajunneruvoq timilli pisatai arlalipassuit nappaammit eqqorneqarsinnaasarput.

Sakialluuteqalernermut ersiutaagajuttut tassaapput quersorneq, aattaqarsinnaasumillu qiseqarneq. Tamatuma saniatigut sanigorneq, illigisaqannginneq, qasoqqaneq, immaqalu kissarneqarneq unnuamilu aallertarneq. Timip ilaani sumi TB-mik nappaateqalersimaneq apeqqutaalluni, qungatsikkut qinersit suanngarnerannik, naggussakkut anniarnermik saannerinermilluunniit, quup aattaqarneranik naakkulluunniit ippiuuteqarnermik ersiuteqartarpoq.

 

Qanoq ilillunga nammineq iliorsinnaavunga? 

Tamatta akisussaaffeqarpugut
Nappaammik TB-mik akiuiniarnermi tamatta akisussaaffeqarnitta paasinissaa pingaaruteqarpoq. Peqqinnissaqarfiup sumiikkaluartup suliaq kisimiilluni nammassinnaanngilaa. Innuttaasutut inuiaqatigiinni nappaatip TB-p annertuumik atugaaffianiinnerput eqqumaffigissavarput.

Imminuinnaq pinnata aammali ilaquttat, ikinngutit, suleqatit innuttaaqatillu illersorniarlugit, nappaammut ersiutit suuneri ilisimassavagut malugigutsigillu qanoq iliuuseqarnissarput ilisimassavarput.

Peqqissuuneq illersuutit pitsaanersaraat!
Inooriaaseq eqqiluisaarnerlu TB-mik akiuiniarnermi pingaaruteqarluinnartuupput. Timi akiuussutissaqarluaruni TB-p tappiorannartua akiorsinnaanerussavaa, tunillatsikkaluaraannilu napparsimalersinnaaneq ulorianaateqannginnerussaaq. Tupatortut, imigassartorpallaat peqqinnanngitsunillu nerisaqartut tunillatsianerupput.

Immitsinnut illersussaagut
Quersuleraangavit qanit kakkissarfimmik assannilluunniit assertaruk assatillu asakulakkit. Sumut tamaanga qitseraqinak. Anartarfimmut kakkissarfimmulluunniit pappiaqqamut erngerlugu igitassamut qisertarit.

Suliffinni illit nammineq allalluunniit, ilaquttatit ilagisartakkatilluunniit ninngusuumik qiseqarlutik sap. ak. pingasut sinnerlugit qusersorpata, nakorsiassaatit imal. quersortoq nakorsiaqqussavat. Illit nammineq allallu nappaammut ersiutaat alaatsinaakkit.

 

Qaqugukkut nakorsamut saaffiginnissinnaavunga? 

TB-mik nappaatillit tamarmik pilertortumik nappaamminnik suussusersivigineqarnissaat, Kalaallit Nunaanni TB-mik akiuiniarnermi anguniagassatut siunniussani pingaarnersat ilagaat. TB-mik nappaatilik piaartumik paasineqarluni nakorsarneqarpat tunillatsissinnaasut ikinnerussapput.

Taamaammat sap. ak. pingasut sinnerlugit quersorsimagaanni nakorsiarnissaq Nunatsinni Nakorsaaneqarfiup inassutigaa.