airplanebooksbriefcase business cogs cross election entertainment fish house law lockmedicalpeopleselfservices socialtax

Cannabisimit nioqqutissanik0,2%-t ataallugu THC-talinnik nioqquteqarnissamut eqqussuinissamullu tunngatillugu apeqqutigineqarnerpaat (FAQ)

Nioqqutissat sorliit suliffeqarfimmiit eqqussuunneqarsinnaappat? 

- Cannabisimit nioqqutissat 0,2 % ataallugu THC-mik akullit tamarmik aallaaviatigut suliffeqarfiup eqqussuussinnaavai, aamma suliffeqarfik tamatumunnga atuuttumik Nunatta Nakorsaaneqarfianit akuersissuteqarpat eqqussuisinnaavoq.

 

Cannabisimik nioqqutissanik, THC-taqanngitsunik (0%), nioqqutissanik eqqusserusukkuma akuersissummik pisinnaavunga? 

- Cannabisimit nioqqutissanik 0%-mik THC-linnik eqqussuerusukkuit Nunatta Nakorsaaneqarfianut akuersissummik qinnuteqassanngilatit. Akuersissuteqaqqaarnak taamaaliorsinnaavutit. Cannabisimik nioqqutissat, 0,2%-t ataallugu THC-mik akullit, kisiisa eqqunneqarnissaanut akuersissummik qinnuteqaasiorfigineqassapput.

 

Cannabisimik nioqqutissanik, 0,2%-t ataallugu THC-talinnik eqqussuinissamut akuersissummik kina qinnuteqarsinnaava? 

- Taamaallaat suliffeqarfiit cannabisimit nioqqutissanik 0,2 % ataallugu THC-talinnik eqqussuinissamut eqqussuinissamut qinnuteqarsinnaapput. Suliffeqarfiit tassaapput inatsisitigut pisinnaatitaasut pisussaatitaasullu, CVR-imik normullit aammalu akiliisinnaajunnaarsimasutut nalunaarsorsimanngitsut.

 

Cannabisimik nioqqutissaanngitsunik taamaattorli nioqqutissanik 0,2%-t ataallugu THC-talimmik allanik eqqussisinnaatitaanermut akuersissummik qinnuteqartoqarsinnaava? 

- Taamaallaat cannabis (imatut paasillugu naasumut Cannabisimut ilaasut nunap qaaniittut naasut immikkoortui tamarmik, tassanngaanniit kutsutaa peerneqarsimanani. Naasup paarnartai pineqanngillat (hamp-ip kingunissaa ipaalu) takuuk ilanngussaq 1, Ikiaroornartut pillugit Namminersorlutik Oqartussat nalunaarutaanni nr. 59, Nunatta Nakorsaaneqarfianit akuersissuteqarluni eqqussuunneqarsinnaasut.

 

Cannabisimit nioqqutissanut eqqussuukkusutannut tunngatillugu immikkut ittumik piumasaqaateqartoqarsinnaava? 

- Aap, Nunatta Nakorsaaneqarfia immikkut ittumik piumasaqaateqarsinnaavoq, nioqqutissallu akuersissuteqarfiussappata suut piumasaqaataassanersut tunngavilersuissaaq. Immikkut piumasaqaatinut tunngatillugu qinnuteqartuminngaanniit qinnuteqartumut piumasaqaatit assigiinngisitaarsinnaapput, qinnuteqaatillu tunngavilersorneqarnera apeqqutaalluni Nunatta nakorsaaneqarfianit aalajangersimasumik akuersissummut piumasaqaatitaqartussaalluni.

 

Cannabisimit nioqqutissanik, 0,2%-t ataallugu THC-talinnik, eqqussinissamut qinnuteqaammik suliarinninneq nalinginnaasoq qanoq sivisutigisarpa? 

- Eqqussinissamut qinnuteqaatit ullut 14 ingerlaneranni suliarisarnissaat Nunatta Nakorsaaneqarfiata anguniartarpaa.

Suliamut tunngatillugu apeqqutigineqarsimasut ilaannakortumik akineqarsimasut suliamik suliarinninnermut kinguarsaataasinnaanerat malugeqquneqarpoq. Taamaammat suliamik suliarinninneq sivitsorsinnaasarluni.

 

Nioqqutissat Kalaallit Nunaannut eqqunneqareersimappata akuersissummik qinnuteqarsinnaavunga? 

- Naamik, piumasaqaataavoq Nunatta nakorsaaneqarfianut akuersissummik qinnuteqartoqareersimassasoq, nioqqutissat Kalaallit Nunaannut eqqutinnginneranni.

 

Cannabisimit nioqqutissat eqqunneqarnissaannut Nunatta Nakorsaaneqarfianiit akuerineqarsimasut tamatigut inatsisitigut unioqqutitsinngillat? 

- Naamik, nioqqutissat eqqussuuneqartut tamarmik inatsisitigut unioqqutitsisuunersut Nunatta Nakorsaaneqarfianit qulakkeerneqarsinnaanngilaq. Nioqqutissat eqqussuunneqartut inatsisitigut piumasarineqartunut naapertuunnissaannut suliffeqarfik akisussaasuuvoq, tassunga ilanngullugu 0,2% ataallugu THC-mik akoqarnissaanik killigitinneqartup qaangerneqannginnissaa. Nioqqutissanut tunngatillugu ilaatigut inatsit malitassaq alla atuutsinneqarsinnaavoq, assersuutigalugu inuussutissanut nioqquteqarnermi inatsisip unioqqutinneqannginnissaanut aamma suliffeqarfik akisussaavoq.

 

Cannabisimit nioqqutissanut, 0,2%-t ataallugu THC-talinnik, eqqussinissamut Danmarkimi inissisimasumi suliffeqarfimminngaanniit akuersissummik qinnuteqarniaruma piumasaqaatit suut eqquutseqqaassavakka? 

- Tunngaviusumik Kalaallit Nunaanni suliffeqarfinnut piumasaqaatit atuuttut assingi suliffeqarfimmut Danmarkimeersumut aamma atuupput. Piumasaqaatit taakku Ikiaroornartut pillugit Inatsisartut inatsisaanni aamma Ikiaroornartut pillugit Namminersorlutik Oqartussat nalunaarutaanni allassimapput. Suliniutigiumasanut tunngatillugu suliffeqarfiit Danmarkimeersut (nuna allaneersulluunniit) eqqussuinissamut akuersissummik Nunatta Nakorsaaneqarfianut qinnuteqassapput.