2022-imi naartuersinnerit 857-iupput naartuersittullu 800-uullutik. Arnat naartusinnaasut (13-iniit 49-inik ukiullit) 1.000-iuppata 62,2 naartuerneqarput. Peqqinnissaqarfik Kujataani amerlanerungaatsiarlutik, arnat naartusinnaasut 1.000-iuppata 91,3 naartuersipput. Peqqinnissaqarfik Avannaani ikinnerpallutik arnat naartusinnaasut 1.000-iuppata 42,5 naartuersipput. Arnat naartusinnaasut 1.000-iuppata naartuersittut katillugit 2.074-pput, tamaalillutik nartuersittut 2022-imisut amerlatigissappata, arnat tamarmik naartusinnaanerminni 2,1-riarlutik naartuersissapput.
Ukioqatigiiaani 20-it 29-illu akornanni ukiulinni naartuersittut amerlanerungaatsiarput. Naartusinnaasut 1.000-iuppata 15-iniit 19-inut ukiulinni naartuersittut 30-it 34-illu akornanni ukiulinnisut amerlatigaat. Suli 15-iliisimanngitsuni arfinillit naartuersipput.
Nakorsaatit atorlugit naartuersittut 86,3 %-iupput, taamalu naartueeriaaseq-naartunerup qanoq sivisutiginera apeqqutaatinnagu- atorneqarajunnerpaajuvoq. Naartunermi sap. ak. aqqaneq aappassaa qaangiutereersoq – Tasiilami suliaritilluni naartuersittoq ataaseq eqqaassanngikkaanni- nakorsaatit atorlugit naartueeriaseq kisimi atorneqarpoq.
Tasiilami naartuersittut amerlanerpaat (94 %) suliaritillutik naartuersipput nunalu tamakkerlugu taama naartuersittut pingajoraterutaasa missigalugit. Nuummi nakorsaatit atorlugit naartuiinerit amerlanerpaajupput (96 %).
2022-imi arnanit 800-init 56-it (7,0 %), marloriarlutik naartuersipput ataaserlu pingasoriarluni naartuersilluni.
2022-imi arnat 28-it kingusissukkut naartuersinnissamik qinnuteqarput, taakkunannga 23-it akuerineqarput tallimallu itigartitaallutik. Naartuersittarneq pillugu isumalioqatigiinnit akuerisanit 23-init 21-ini inuttut atukkat tunngaviupput. Kingusissukkut naartuersinnissamut akersinissamut patsisaasut pingarnerpaat tassaapput anaanatut kisimiittuuneq, inuttut inerisimannginneq, pissusissamisuunngitsumik ineriartorsimaneq ilaqutariittullu inuuneq aamma/imal. ineqarneq, tarnikkut ajornartorsiutit, nakuuserneq, aanngajaarniutinik atuineq. Akerlianik itigartitsinerni tallimaasuni, ilaqutariinni/attavigisani tapersersuisoqarneq ineqarnikkullu pissutsit naapertuuttut, aanngajaarniutinik atuisuunnginneq nakuusertoqannginneralu pingaartinneqarput. Suliani marlunni naartuersinnerup arnamut misigisatut anigoruminaassinnaanera tunngavilersuutit ilagaat.
Marlunni naartup nappaataanik suussusersiniaareernermi naartup innorluuteqarnera pissutigalugu kingusissukkut naartuersinnissamut akuersisoqarpoq.
Arnat naartusinnaasut amerlassusaannut sanilliullugit ukiut qulit ingerlaneranni naartuersittut 2018-imi amerlanerpaajupput. Nunatsinni naartusinnaasut amerlassusaannut sanilliullugit ukiuni kingullerni 20-ini naartuersittut katillugit amerlassutsimikkut nikingaarsimanngillat.