2022-imi ernisut 747-pput, taakkunannga arfineq pingasut marlulillutik, taamaalillutik meeqqat inunngortut 755-iullutik, taakkunanngalu 754-it uumallutik inuullutik. Niviarsiaqqat uumallutik inuusut 366-iupput nukappiaqqallu 388-iullutik. Arnat meerartaarsinnaasut amerlassusaannut sanilliullugit (arnat amerlassusaannut sanilliullugit ukiumut uumallutik inunngortartut), Peqqinnissaqarfik Qeqqani inunngortut amerlanerpaajupput Sermersuumilu ikinnerpaajullutik. Arnat 25-iniit 34-inut ukiullit meeqqiornerupput. Arnat amerlassusaannut sanilliullugit ukiumut uumallutik inunngortut katsillugit 1.810-upput, taakkuuppullu 2022-imisut pissutsit issappata, arnat 1.000-iuppata meerartaarsinnaanerup nalaani meerartaarisinnaasat. Tamanna maanna innuttaasut imminnut taartissaminnik kinguaassiunnginnerannik isumaqarpoq.
Nunatsinni ernisut marlunnik pingajorarterutaasa missaat (66,3 %) Nuummi Dronning Ingridip Napparsimmavissuani ernipput, tamannalu ernisussat qitiusimik immikkoortunit allaneersut tassunga innersuunneqartarmata, qitiusumik immikkoortumi innuttaasunut tunngavissiisumik takutitsinngilaq. Tamatuma saniatigut Ilulissani Peqqinnissaqarfik Avannaani qitiusumik napparsimmavimmi ernisut amerlapput (16,6 %). Ukiuni pineqartuni marlunni qitiusumik immikkoortumi tassani ernisup najugaqarfigisaani ernisut marlunnik pingajoqarterutaasa missaat (65,8 %). Taamaallaalli affaat sinneqalaartut (52,6 %), nammineq illoqarfigisaminni ernipput, taamalillutillu erniartorlutik angalasariaqarsimanatik. Taakkunannga arnat tallimat ernivissatut toqqaganngitsuni- taakkunanngalu sisamat inortuliillutik- ernipput.
2022-imi uumallutik inuusut nalunaarsukkat oqimaassusaat agguaqatigiissillugu 3,55 kg-uuvoq takissusaallu agguaqatigiissillugu 50,88 cm-iulluni.
2022-imi nunatsinni ernisut ukiui agguaqatigiissillugit 28,9-upput. Inuusuttuaqqat ernisut (15-iniit 19-inut ukiullit) 6,2 %-iupput. Danmarkimi 0,3 %-iullutik. Inuusuttuaqqat ernisut amerlanersaat Peqqinnissaqarfik Avannaaneersuupput (10,7 %) ikinnerpaallu Peqqinnissaqarfik Sermersuumeerlutik (0,3 %).
2022-imi ernisunit 747-init marlulisut arfineq pingasuupput (1,1 %). Marlulisut 56,3 %-iini inunngoramik nalinginnaasumit oqinnerusut takuneqarsinnaavoq. Marlulisussanit arfineq pingasuusunit tallimat pilatsillutik ernipput. 2022-imi toqungallutik inuusut/sap. ak. siulliup ingerlanerani toqusartut, inoorlaat 1.000-iuppata 13,2-upput ullullu 28-it siulliit sioqqullugit toqusut inoorlaat 1.000-iuppata 8,5-iullutik. Ukiut tallimat ingerlaneranni toqungallutik inuusut/sap. ak siulliup ingerlanerani toqusut, inoorlaat 1.000-iuppata katillugit 12,6-iupput ullullu siulliit 28-it sioqqullugit toqusartut, uumallutik inuusut 1.000-iuppata katillugit 12,6-iullutik.
Ernisunit 747-init 49-it inorlutik (sap. ak. 37-issaat sioqqullugu) inuupput (6,6 %), marlunnit pingajorarterutaat sinneqartut (69,6 %) piffissaq eqqorlugu ernillutik (sap. ak 37-imiit 40-imut). Ernisut sisamararterutaat pallingajattut (23,5 %) piffissamik qaangiipput, sapaatillu ak. 40-issaat qaangereersoq ernillutik. Toqungallutik inuusunit/ ullut siulliit arfineq marluk ingerlaneranni toqusunit qulinit, qulaaluat, sap. ak. 37-issaat sioqqullugu inuupput. Ernisut qulerarterutaat inulaartut (9,7 %) pilatsilluni erninermik kinguneqarput.
Ukiut qulit ingerlaneranni inunngortartut ikiliartorput, 2022-imilu ikinnerpaallutik.