2020-imi 841-it (nukappiaqqat 422-it niviarsiaqqallu 419-it) inunngorput, 2021-imilu ernisunut 758-inut agguataarlugit 766-it (nukappiaqqat 401-it niviarsiaqqallu 365-it) inunngorlutik. Arnat marlunnik pingajorarterutaasa missaat Nuummi Dronning Ingridip Napparsimmavissuani ernipput, qitiusumik immikkoortunit allanit ernisut tassunga innersuunneqarsimammata tamanna qitiusumik immikkoortup inuttussusaanik ersersitsinngilaq. Tamatuma saniatigut Ilulissani Peqqinnissaqarfik Avannaani qitiusumik napparsimmavik amerlaqisunit erniviuvoq.
Ukiuni taakkunani marlunni naartusut marlunnik pingajorarterutaasa missaat qitiusumik immikkoortumi ernisussap najugaqarfiani ernipput. Taamaattorli affaat sinnilaartut kisimik erniartorlutik angalasariaqarsimanngillat. 2020-imi aqqanillit 2021-imilu arfinillit ernivissatut akuerisaanngitsumi illoqarfimmi imal. nunaqarfimmi ernipput.
2020-imi inoorlaat agguaqatigiissillugit 3562 gr.-inik oqimaassuseqarput 2021-imilu agguaqatigiissillugit 3571 gr.-inik oqimaassuseqarlutik.
2020-imi ernisut agguaqatigiissillugit 28,2-nik ukioqarput 2021-imilu agguaqatigiissillugit 28,7-inik ukioqarlutik.
2021-imi ukiuni qulini ernisut ikinnerpaapput, ukiunilu qulini ikiliartulaarsimallutik.
Nunatsinni arnat ernisinnaasut amerlassusaannut naleqqiullugit Savalimmiuni amerlanerupput Danmarkimilu ikinnerullutik.
Nunanut taakkununnga marlunnut sanilliullugit nunatsinni ernisut 15-it 24-illu akornanni ukiullit 40-leereersullu amerlaneroqaat. Agguaqatigiissillugit danskinut ernisunut sanilliullugit nunatsinni ernisut ukiut pingasut missaannik inuusunnerupput.
2020-imi marlulisut quliupput 2021-imi marlulisut arfiniliupput ataaserlu pingasulilluni.
2020-imi uumallutik inunngortut 1.000-iuppata toqungallutik inunngortut arfiniliupput 2021-imilu pingasuullutik. 2020-imi meeraaqqat ukioqaleratik toqusartut 7,2 iupput 2021-imilu 10,4-llutik.
Ukiuni taakkunani marlunni qulerarterutaat inulaartut pilatsilluni erninermik kinguneqarput. Ernisitseriaaseq toqungallutillu inuusut imminnut attuumassuteqarsorinanngillat.