Februaarimi marsimilu COVID-19-imut akiuussutissanik kapuinissat pilersaarutaasut

Poortat sisamat maannamut tiguneqarput
Kalaallit Nunaanni maannamut poortat sisamat, akiuussutissanik imallit tiguneqarsimapput. Poortat siulliit marluk innuttaasunik katillugit 2.621-nik kapuinermut atorneqarput, aammalu poortat pingajuat Ilulissani innuttaasunit utoqqaat 65-inik sinnerlugillu ukiulinnik kapueqqinnermut atorneqarlutik. Poortat sisamaat tamaanga tikeqqammerpoq.

Februaarimi marsimilu akiuussutissanik kapuinissaq
Kalaallit Nunaanni akiuussutissat Pfizer/BioNTech-imeersut, poortat katillugit arfineq pingasut sapaatit akunnera 13 ilanngullugu tigooqqarneqarnissaat naatsorsuutigineqarpoq. Kisiannili tamanna suli Peqqissutsimut Aqutsisoqarfimmit inaarutaasumik uppernarsarneqanngilaq. Pilersaarutit malillugit akiuussutissat taakku illoqarfinni tikerarfiunerpaani innuttaasunik 65-inik sinnerlugillu ukiulinnik, illoqarfinni pineqartuni najugaqartutut inuit allattorsimaffianni nalunaarsorsimasunik kapuinermut atorneqassapput. Illoqarfimmi aalajangersimasumi akiuussutissanik kapuinissap aallartinnissaanut sapaatit akunnerat sioqqullugu sumut qaqugulu akiuussutissanik kapitinnissaq pillugu saaffiginnittoqarnissaa nalunaarutigineqassaaq – peqqissutsimut oqartussaasunut imaluunniit Corona pillugu Allattoqarfimmut saaffiginnittoqassanngilaq.

Poortat sisamaat, Nuuk & Qeqertarsuatsiaat (kapuutit 1.300-t missaanniittut)
Nassiussat tullii Nuummi innuttaasunik, 65-inik sinnerlugillu ukiulinnik kapuinermut, Nuummi peqqinnissaqarfimmi paaqqutarinniffinnilu sulisunik, siornatigut kapitissimasunik kapueqqinnermut, kiisalu Qeqertarsuatsiaani innuttaasunik 16-it sinnerlugillu ukiulinnik kapuinermut atorneqassapput.
Qeqertarsuatsiaani innuttaasunik kapuineq Issittumi Sakkutooqarfik suleqatigalugu pilersaarusiornissamut sungiusarnermut atatillugu ingerlanneqassaaq, sungiusarnermilu tassani misilittakkat siunissami sumiiffinni § 12-imut ilaasuni (illoqarfinni, nunaqarfinni aammalu ukioq kaajallallugu najugaqarfinni tikerarfiunngitsuni) akiuussutissanik kapuinissamut pilersaarusiornerit ingerlaqqinnissaannut atorneqassapput.

Poortat tallimaat, Aasiaat, Sisimiut kiisalu Ilulissat (kapuutit 1.300-t missaanniittut)
Poortat tallimaasa Aasianni, Sisimiuni kiisalu Ilulissani innuttaasunik kapueqqinnermut atorneqarnissaat naatsorsuutigineqarpoq. Taakku saniatigut Aasianni Sisimiunilu innuttaasut 65-inik sinnerlugillu ukiullit, siornatigut kapitissimanngitsut akiuussutissanik kapitinnissamut neqeroorfigineqassapput.

Poortat arfernat, Qaqortoq, Maniitsoq, Narsaq aamma Paamiut (kapuutit 1.300-t missaanniittut)
Poortat arfernat innuttaasunik, siornatigut akiuussutissanik kapitissimasunik kapueqqinnermut, kiisalu Qaqortumi innuttaasut 65-inik sinnerlugillu ukiullit, siornatigut kapitissimanngitsut siulliit akiuussutissanik kaporneqarnerinut atorneqartussatut naatsorsuutigineqarpoq. Taakku saniatigut Maniitsumi, Narsami aamma Paamiuni innuttaasut 65-inik sinnerlugillu ukiullit tamarmik, utoqqaat angerlarsimaffiini najugallit ukiui apeqqutaatinnagit, peqqinnissaqarfimmi paaqqutarinniffinnilu sulisut, napparsimasunik toqqaannartumik attaveqartut siullermeerlutik kapitinnissamut neqeroorfigineqassapput.

Poortat arfineq aappaat, Nuuk, Aasiaat, Sisimiut, Qeqertarsuatsiaat (kapuutit 1.300-t missaanniittut)
Poortat arfineq aappaat pilersaarutit malillugit Nuummi, Aasianni Sisimiunilu innuttaasunut 65-inik sinnerlugillu ukiulinnut kapiteqqissimanngitsunut kapueqqinnermut, kiisalu Qeqertarsuatsiaani innuttaasunik kapueqqinnermut atorneqassaaq.

Poortat arfineq pingajuat, Qaqortoq, Maniitsoq, Narsaq aamma Paamiut (kapuutit 1.300-t missaanniittut)
Poortat arfineq pingajuata Qaqortumi innuttaasunik 65-inik sinnerlugillu ukiulinnik, siornatigut kapiteqqissimanngitsunik, kiisalu Maniitsumi, Narsami Paamiunilu innuttaasunik 65-inik sinnerlugillu ukiulinnik, utoqqaat angerlarsimaffiini najugalinnik ukiui apeqqutaatinnagit, peqqinnissaqarfimmi paaqqutarinniffinnilu sulisunik, napparsimasunik toqqaannartumik attaveqartunik kapueqqinnermut atorneqarnissaa naatsorsuutigineqarpoq.

Tamatuma saniatigut Kangerlussuarmi innuttaasut 16-inik sinnerlugillu ukiullit tamarmik siullermeerluni kapitinnissamut neqeroorfigineqassapput.