Aaqqissuussinernut il.il kommuninit allanit angalalluni peqataaffigineqartussanut piumasaqaatit
Aaqqissuussinernut il.il kommuninit allanit angalalluni peqataaffigineqartussanut piumasaqaatit Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit nalunaarummi § 3-mi nassuiaqqapput.
Piumasaqaatit makkuupput:
- Aaqqissuussineq il.il. Nunatta avataaniit Kalaallit Nunaannut angalanermi piumasaqaatit pillugit Namminersorlutik Oqartussat nalunaarutaanni § 12, imm. 1 naapertorlugu tikittarfinni akuerisaasuni pisussaapput.
Tikiffissatut immikkut toqqakkat ukuupput:
- Ilulissat
- Aasiaat
- Qasigiannguit
- Qeqertarsuaq
- Kangerlussuaq
- Maniitsoq
- Sisimiut
- Nuuk
- Paamiut
- Narsaq
- Narsarsuaq imaluunniit
- Qaqortoq
Aaqqissuussap il.il. ingerlatinnginnerani ullut 30-it iluini illoqarfimmi tassani Covid-19-imik tunillatsissimasutit nalunaarsorsimasoqaqqusaanngilaq.
Aaqqissuussineq pilersaarutigineqareerpat aaqqissuussallu aallartinnginnerani ullut 30-it qaangiutsinnagit tunillatsittoqarsimappat, taava aaqqissuussaq aallaaviatigut taamaatinneqassaaq, imaluunniit aaqqissuisut kommuninit allanit peqataasoqannginnissaa qulakkiissavaat.
- Aaqqissuussami il.il. inuit 50-it sinnerlugit peqataassappata aaqqissuussinerup il.il. ingerlanneqarnera sioqqullugu tamanna Nunatta Nakorsaaneqarfianit akuersissutigineqassaaq.
Nalunaarummi taaguut “peqataasoq” atortillugu isiginnaartut aamma pineqarput. Aaqqissuussaq illup iluani silamiluunniit ingerlanneqarnersoq apeqqutaanngilaq, pisuni taakkunani marlunni inunnik 50-inik amerlassuseqartillugit aaqqissuussineq Nunatta Nakorsaaneqarfianit akuersissutigineqaqqaassaaq.
Qinnuteqaatit corona@nanoq.gl aqqutigalugu Corona pillugu allattoqarfimmut nassiunneqassapput.
Qinnuteqaat sapinngisamik piffissaq sioqqulluarlugu nassiunneqartariaqarpoq, ajornanngippat aaqqissuussap ingerlanneqannginnerani sapaatit akunneri pingasut sioqqullugit.
Qinnuteqaammi aaqqissuussap qanoq ingerlanneqassanersoq eqqarsaatiginerlugu, piumasaqaatit tamarmik qanoq malinneqarnissaasa qulakkiissanerlugu aammalu tunillaassuunnerup siaruarnissaanut aarlerinaatit annikinnerpaaniitinnissaat iluaqutaasumik allattoqarsinnaavoq.
Nunatta Nakorsaaneqarfia immikkut akuersissuteqarsinnaavoq, pissutsinik piviusunik tamanna tunngavilersorneqarsinnaappat.
Kommuninit allanit peqataasoqarsinnaaneranut killilersuinerit namminerisamik aaqqissuussanut atuutinngillat, soorlu kuisitsinerit, inuuissiornerit, apersortinnerit, soraarummeertoqarneranut atatillugu nalliuttorsiortitsinerit, katinnerit ilisinerillu.
Pissutsit allat
Ullut kingulliit 14-it iluanni nunamut maanga tikissimagaanni imaluunniit meterit marluk iluanni inunnik ullut 14-it iluanni nunamut maanga tikissimasunik attaveqaqateqarsimagaanni aaqqissuussamut il.il. peqataanissaq imaluunniit najuunnissaq inerteqqutaavoq.
Aaqqissuussamut il.il. peqataasut tamarmik peqataareernerup kingorna angerlannginnerminni misissortissapput, illoqarfimmi Covid-19-imik tunillatsittoqarsimasoq paasineqarpat.
Paasissutissat allat naalakkersuisup allatta Inger Heilmanna Larsen attavigineqarsinnaavoq, ihla@nanoq.gl, mobil +299 55 41 60 imaluunniit Corona pillugu Allatseqarfimmut corona@nanoq.gl, imaluunniit oqaras.:+299 80 11 00 aqqutigalugit pissarsiarineqarsinnaapput.
Ullumikkut kingusinnerusukkut nalunaarutit uani atuarneqarsinnaanngussapput: https://naalakkersuisut.gl/kl-GL/ Kundgoerelser/2021