airplanebooksbriefcase business cogs cross election entertainment fish house law lockmedicalpeopleselfservices socialtax

Akiuussutissanik kapuineq: Pilersuinermi tigusisoqaqqippoq

Kalaallit Nunaat kapuutinik akiuussutissanik tunisassiortumit Pfizer/BioNTech-imit pissarseqqipput, taamaalillunilu akiuussutissanik kapuinerup immikkoortua tulleq aallartittussanngorpoq. Pilersuinermi kapuutit akiuussutissat 975-it pissarsiarineqarput, taakkulu akiuussutissanik kapuinissamut pilersaarut, nunani tamalaani malitassat misilittakkallu naapertorlugit ulorianartorsiortunik naliliiffiusoq aalajangersarneqareersoq naapertorlugu siaruarterneqassapput. Utoqqaassuseq ulorianartorsiornermut tunngaviunerpaasoq taakkunani takutinneqarpoq, taamaattumillu innuttaasut utoqqaanerit salliutinneqarput.
26. januar 2021

Pfizer

Kikkut akiuussutissanik kapoorneqassappat? 

Qaqortoq sap. ak. 4 (25. - 31. januar)
Siornatigut oqaatigineqareersutut Qaqortumi akiuussutissanik kapuinissaq silarlunnera peqqutigalugu kinguartinneqarpoq. Qaqortumi akiuussutissanik kapuinerit sap. ak. 4-imi ingerlanneqarnissaat naatsorsuutigineqarpoq. Innuttaasut maanna kaporneqartussat attaveqarfigineqassapput aggersarneqassallutillu, taamaattumillu kapuinissaq pillugu peqqinnissaqarfimmut imaluunniit Corona pillugu Allattoqarfimmut attaveqassanngillat.

Ilulissat + Nuuk sap. ak. 5 (1. - 7. februar)
Pilersuinermi pissarsiarineqartut nutaat Ilulissani Nuummilu innuttaasunut neqeroorutigineqassapput. Ilaatigut akiuussutissanik kapiteqqinnermut atorneqassapput, kisiannili aamma akiuussutissanik kaporneqartussanut nutaanut neqeroorutigineqassallutik. Innuttaasut, 74-iniit 65-inut ukiullit akiuussutissanik kaporneqassapput, utoqqaanerit siulliunneqarlutik ammut ukiulinnik kapuisoqassalluni, taakkulu sap. ak. 5-imi aallartinneqassapput. Kingusinnerusukkut kikkorpiaat akiuussutissanik kaporneqassanersut, tamannalu qaqugu pissanersoq nalunaarutigineqassaaq. Taamaattumik nammineerluni kapuinissaq pillugu peqqinnissaqarfimmut imaluunniit Corona pillugu Allattoqarfimmut attaveqartoqassanngilaq.

Qaqugu taakkunani kapiteqqittoqassava? 

Ilulissani innuttaasut akiuussutissanik kapineqareersimasut kapiteqqinnissaat sap. ak. 5-imi pissaaq. Sisimiuni, Aasianni Nuummilu innuttaasut neqeroorfigineqarnerminni akuersereersimasut, aammalu siullermeerlutik kapitereersimasut pilersaarutit malillugit kingusinnerpaamik sapaatit akunnerisa tallimat qaangiunnerini kapiteqqinnissamut aggersarneqassapput. Taakku aamma innuttaaqataasut allat assigalugit kajumissaarneqarput, kapuinissaq pillugu peqqinnissaqarfimmut imaluunniit Corona pillugu Allattoqarfimmut attaveqaqqunagit, peqqinnissaqarfimmiit attaveqarfigineqarumaarmata.

Ilulissani Sisimiunilu peqqinnissaqarfimmi sulisut tamarmik akiuussutissamik kapitinnissamut neqeroorfigineqarput. Nuummi peqqinnissaqarfimmi sulisut amerlanerujussuupput, aammalu tuniluuttumik maanga tikittoqassappat tamarmik ulorianartorsiorneri assigiinngillat. Taamaattumik tulleriiaarisoqarpoq, tamannalu pissutigalugu sulisoqarpoq, suli akiuussutissamik kapitinnissamik neqeroorfigineqarsimanngitsunik.

Qarasaasianni paasissutissat ilaat atoqqissinnaajumallugit quppernermi matumani cookie-t atorneqartarput. Akueriuk annertunerusumilluunniit uani paasisaqarit.