airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-mut akiuussutissinneqarnissamik kissaateqarneq annertooq

Innuttaasunit akiuussutissinneqartussatut qaqugu tullinnguunnissamut apersuineq annertooq Peqqinnissaqarfimmit misigineqarpoq. Nuummi Ilulissanilu innuttaasut suli akiuussutissinneqarsimanngitsut, akiuussutissanik nutaanik tikittoqarpat Peqqinnissaqarfimmiit kommunimiilluunniit saaffigineqarnissap utaqqinissaanut innersuunneqarput.
18. januar 2021


Pfizer
Ukiumi nutaami akiuussutissat Peqqinnissaqarfimmit pissarsiarineqartut siulliit sap. ak. siullermi tamakkerlugit atorneqarput. Pissarsiarineqartut siulliit inunnut 1.305-inut naammapput. Akiuussutissat takkuttut tullii sap. ak. aappaanni Peqqinnissaqarfimmit tiguneqartut Qaqortumi, Aasianni Sisimiunilu innuttaasunut sulisunullu atorneqarput.

Akiuussutissat killeqarmata kikkut siulliullutik akiuussutissinneqarnissaannut tulleriiaarisoqarpoq. Siullermik utoqaarnik paaqqutarinniffinniittut, utoqqaat, paaqqutarinniffinni Peqqinnissaqarfimmilu innuttaasunut toqqaannartumik sullissisut innuttaasullu immikkut ittunik nappaateqartut, taama oqarpoq Peqqinnissaqarfiup pisortaa Joanis Erik Køtlum. Taanna akiuussutissamut nalorninerup kissaatinngorsimaneranik ilisimatitsivortaaq. Piffissami kingullermi innuttaasut akiuussutissinneqarnissamik kissaateqartut innuttaasullu aallaqqaammut naaggaaraluarsinnarlutik isummaminnik allannguisut Peqqinnissaqarfimmut saaffiginnittut amerlapput. Tamanna assut pitsaasutut isigaarput.

Utoqqaat, sanngiiffeqartut innuttaasunillu toqqaannartumik sullissisut akiuussutissinneqarput
Akiuussutissat tikittut siulliit Ilulissanut 402-it Nuummullu 903-it agguaanneqarput. Taakkulu Peqqinnissaqarfimmi innuttaasunut toqqaannartumik sullissisunut 396-it, utoqqarnik paaqqutarinniffinni innuttaasunut toqqaannartumik sullissisunut 133-it, utoqarnullu, utoqqarnik paaqqutarinniffinniittunut kiisalu inunnut immikkut ittunik nappaateqartunut 776-it agguaanneqarlutik.

Peqqinnissaqarfimmi sulisut innuttaasullu COVID 19-mut akiuussutissinneqarnissamik neqeroorummut akuersinerat nuannaarutigaarput. Tamanna coronavirusimut akiuunniarnitta immikkoortuisa naggataanni sorsunnissamut sillimmarterluarsimanitsinnik isumaqarpoq, Joanis Erik Køtlum oqarpoq. Akiuussutissiineq pillugu kommuninik suleqateqarnerput qujamasuutigaarputtaaq. Kommunit ininik, angallassinernik sulisunillu atugassiipput. Tamanna akiuussutissiinerup piumasaqaatitaqaqisup naammasisinnaanissaanut ikiuunneruvoq annertoqisoq, Peqqinnissaqarfiup pisortaa oqarpoq.

Tulliullutik akiuussutissinneqartussat
Akiuussutissanit tikittunit siullernit qulaani pineqartunik akiuussutissiineq- pingaartumik Nuummi- suli naammassineqanngilaq. Innuttaasut suli akiuussitissinneqanngitsut akiuussutissat nutaat tikippata akiuussutissinneqassapput.

Tamatuma qaqugu pinissaa maannamuugallartoq ajoraluartumik oqaatigisinnaanngilarput, taamaattorli sap. akunnerini tulliuttuni qaninnerni pinissaa naatsorsuutigaarput. Ullulerneqarpat innuttaasut tamanna pillugu tusagassiuutitigut paasisutissinneqarnissaq naatsorsuutigisinnaavaat, Joanis Erik Køtlum oqarpoq.

Innuttaasut akiuussutissinneqarnissamik kissaateqartut massakkut Peqqinnissaqarfimmut attaveqaqqunagit kajumissaarneqarput. Taamaaliornikkut oqarasuaatikkut attaveqarniarneq ilungersunartorsiorfiureersoq annertunerulissammat, attavigineqarnissaq utaqqeqquneqarpoq.

Siunnersuutit nalinginnaasut suli eqqumaffigeqquneqarput
COVID-19-imut akiuussutissiineq coronavirusip nutaap inuiaqatigiinni siaruaatinnginnissaa anguniarlugu iliuuserisanut ilaavoq pingaarutilik.

COVID-19-imut akiuussutissinneqarnissaq innuttasut ilaannut maanna periarfissanngoraluaq, ass. assaat eqqiluitsuutittuarnissaat, eqqiluisaarneq, silaannarissarneq allanullu qanillinaveersaarneq pillugit siunnersuutit nalinginnaasut malittuassavagut.