airplanebooksbriefcase business cogs cross election entertainment fish house law lockmedicalpeopleselfservices socialtax

Akiuussutissat siulliit

Ataasinngornermi 4. januaari 2021 Kalaallit Nunaanni innuttaasut siulliit virusimut, Covid-19 peqqutigalugu napparsimalissutaasartumut akiuussutissamik kapitissapput. Tamatuma peqatigisaanik tamanna akiuutissat, juullip ukiortaallu akornanni tiguneqartut, killilimmik amerlassusillit atorlugit kapuinermut aallarniutaassaaq.
3. januar 2021


SANA
Kikkut siulliullutik kapineqassappat?
Akiuutissat tikittut siulliit killilinnik amerlassuseqarput, taamaattumillu kapuinermi tulleriiaarineq sukannersumik tulleriiaarinikkut ingerlanneqartariaqarpoq. COVID-19-imut akiuussutissamik kapuinerup immikkoortuani siullermi utoqqaat 75-it sinnerlugit ukiullit, paaqqutarinnillutik sulisut kiisalu peqqinnissaqarfimmi sulisut toqqartukkat, toqqaannartumik innuttaasunut attaveqartartut salliutinneqassapput.

Tulleriiaarineq imatut isikkoqarpoq:
  • Innuttaasut 75-inik amerlanerusunilluunniit ukioqalereersimasut tamarmik.
  • Utoqqaat angerlarsimaffiini najugaqartut (ukiui apeqqutaatinnagit).
  • Utoqqaat angerlarsimaffiini sulisut, angerlarsimaffinni ikiortit aamma peqqinnissaqarfimmi sulisut toqqartukkat, tamarmik sulinerminni napparsimasunik annertuumik attaveqartut.
  • Inuit immikkut ittumik ulorianartorsiortut (peqqinnissaqarfimmit toqqartorneqassapput)

Qaqugu tamakku pissappat?
Tulleriiaarinissamut allattukkat saniatigut Ilulissani akiuussutissamik kapuinerit Nuummut naleqqiullutik ullormik ataatsimik kingulliussapput.

Nuuk
Illoqarfimmi paaqqutarineqartut angerlarsimaffiini najugaqartunut akiuussutissamik kapuinerit ataasinngornermi 4. januaari 2021-mi nal. 09.15 aallartissapput, tamatumalu kingorna paaqqutarinnittarfinni sulisut akiuussutissamik kaporneqassapput.

Nal. 13.00-imiit Dronning Ingridip Napparsimmavissuani sulisut toqqartukkat akiuussutissamik kapoorneqassapput pingasunngorpat 6. januaari 2021-mi.

Ilulissat
Ataasinngornerup 4. januaari 2021-p ingerlanerani akiuussutissat Nuummiit Ilulissanut timmisartuunneqassapput. Utoqqaat angerlarsimaffianni peqqinnissaqarfimmilu sulisut akiuussutissamik kaporneqarneri marlunngornermi aallartinneqassapput. Tamatuma kingorna innuttaasunik kapuisoqassaaq. Ulluni tulliuttuni innuttaasunik kapuisoqassaaq. Innuttaasunik kapuinerit Kulturip Illorsuani ingerlanneqassapput. Innuttaasut ataasiakkaarlutik aggersarneqartassapput, aammalu aggersaanermi piffissaq sumiiffissarlu sukumiisumik nalunaarutigineqartassapput.

Qanoq ingerlanneqassappat?
Aallaqqaammut peqqinnissaqarfiup innuttaasut akiuussutissamik kapitinnissamut neqeroorfigalugit attaveqarfigisassavai. Akiuussutissat tulliit tiguneqariarpata, innuttaasut aappassaannik kapitinnissamut piffissaliussaq pillugu peqqinnissaqarfimmit attaveqarfigineqaqqissapput. Innuttaasut Covid-19-imut akiuussinnaalernissaq anguniarlugu marloriarlutik kapitinnissaat pingaaruteqarpoq.

Innuttaasut akiuussutissamik kapitittussat ukiui nappaataallu ilisimaneqartut tunngavigalugit peqqinnissaqarfimmit toqqartorneqassapput aammalu toqqaannartumik attaveqarfigineqassallutik. Taamaattumik nammineerluni napparsimmavimmut imaluunniit hotline-mut sianernissaq tunngavissaqanngilaq.

Sooq Nuuk aamma Ilulissat aallarniutaassappat?
Akiuussutissaq Pfizer-imeersoq -70 aamma -80 gradit akornanni nillissusilimmiittussaavoq. Passunneqarnissaa, assartuunneqarnissaa uninngatinneqarnissaalu pisariusorujussuuvoq. Tamatuma saniatigut aatsitsineq suliallu ingerlanissaa tamarmi sulisunit, pitsaassutsimik qulakkeerisussanit immikkut ilinniagalinnit aqunneqartussaapput.

Akiuussutissat kingusinnerusukkut nassiunneqartussat assartuussineq uninngatitsinerlu eqqarsaatigalugit piuminarnerunissaat sulissutigineqarpoq, taamaalilluni nunatsinni sumiiffinni arlalinni ataatsikkut kapuinissaq ajornannginnerulissammat.