airplanebooksbriefcase business cogs cross election entertainment fish house law lockmedicalpeopleselfservices socialtax

Covid-19-imut akiuussutissat Kalaallit Nunaannut tikiunneqarput

Akiuussutissat siulliit nunatsinnut apuunneqarput.
29. december 2020


SANA
Nutarterneqarpoq: 30. december 2020

Kalaallit oqartussaasuisa ullumi akiuussutissat nassiunneqartut siulliit tiguaat – 975-iupput, tunisassiortunit Pfizer-imit aamma Biontech-imit nassiunneqarlutik. Kapuutissat 975-it tamarmik Dronning Ingridip Napparsimmavissuaniipput, taakkunannga 300-t piaarnerpaamik Ilulissanut timmisartuunneqassallutik.

Akiuussutissanik kapuineq januaarimi sapaatit akunnerani siullermi aallartinneqassaaq, tassani Nuummi Ilulissanilu utoqqaat angerlarsimaffiini najugaqartut siulliunneqassallutik.

Akiuussutissat -70 aamma -80 gradinik nillissusilimmiitinneqartussaapput, ingerlasussanillu aaqqissuussinermi passunnissaat, assartuunneqarnissaat kapuutiginissaallu pisariusorujussuullutik. Suliassat ingerlanneqarnerini tamani sulisut immikkut ilinniarsimasut, pitsaassutsimik qulakkeerisussat aqutsisuussaapput.

Akiuussutissaq Moderna-meersoq pisariinnerusumik assartorneqarsinnaavoq, aammalu peqqinnissaqarfimmi sulisunut immikkut piumasaqaatitaqanngitsumik kapuisoqarsinnaavoq aqutsisoqarsinnaallunilu. Akiuussutissat EU-mi akuerineqarpata, ingerlasussanik aaqqissuussineq, siaruarterineq nalinginnaasumillu kapuineq eqqarsaatigalugit atorusunnarneruvoq.

Maannarpiaq Nuummi qerititsivik, uninngatitsinissamut piumasaqaatinik naammassinniffiusoq ataasiinnaq pigineqarpoq – Kalaallit Nunaanni sumiiffinni allani taamaattunik qerititsiveqanngilaq.

Kikkut siulliullutik kapitissappat?
Akiuussutissat siulliit januaarip aallartinnerani atorneqarsinnaaleriarpata, pilersuinerit akulikissusiisa killeqarnissaat naatsorsuutigineqarpoq, taamaattumillu kapuinissami sukannersumik tulleriiaarinissaq pisariaqarpoq.

COVID-19-imut akiuussutissalersuinermi tunillaassuunnermik eqqussinissamut pinaveersaartitsinissaq, toqusartut napparsimalertussallu ikinnerpaatinnissaat, kiisalu suliat inuiaqatigiinnut pisariaqarnerpaat ingerlanissaat salliutinneqassapput.

Akiuussutissat suut pissarsiarissavagut?
Aallaqqaammut akiuussutissat killeqartorujussuit, tassalu 975-it, Pfizer-imit tunisassiarineqartut Danmarkimiit pissarissavagut.

Kikkut tamarmik kapitissappat?
Akiuussutissanik pissarsisinnaaneq malillugu Kalaallit Nunaanni kikkut tamarmik covid-19-imut akiuussutissamik kapitinnissamut neqeroorfigineqarnissaat anguniagaavoq.

Kikkut akiliissappat?
Akiuussutissaq akeqanngilaq, aammalu siunissami innuttaasunut kalaallinut tamanut neqeroorutigineqartussaalluni.

Qasseriarluni kapitittoqassava?
Akiuussutissani arlalinni marloriarluni, qaammat tikillugu akuttussusilinnik kapitittoqarnissaa pisariaqarpoq.

Erngerluni sunniutissava?
Naagga. Kapitinnermit siullermiit aatsaat ullut 21-t qaangiunnerini kapitittoqaqqissaaq, tamatumalu kingorna aatsaat ullut 14-it ingerlareerpata akiuussutissaq sunniutissaaq.

Covid-19-imik napparsimanerup nalaani akiuussutissaq iluaqutaasinnaava?
Akiuussutissaq napparsimalernissamut akiuussutissaavoq – napparsimalersimagaanni napparsimanermi iluaqutaasinnaanngilaq.