airplanebooksbriefcase business cogs cross election entertainment fish house law lockmedicalpeopleselfservices socialtax

Aasianni Covid-19-imik tunillatsissimasut marluk

Ullumi pingasunngornermi decembarip ulluisa 23-ani Aasianni Covid-19-imik tunillatsissimasut marluk nassaarineqarput. Tamanna tikittunik nalinginnaasumik misissuinermut atatillugu pivoq.
23. december 2020


Covid-19
Tunillatsissimasut marluk ilisimatinneqarput, aammalu taakku ilisimatitsipput angerlarsimasussaatitaanertik malissimallugu. Taakku angalaqatigiillutik tikittuupput. Aasianni tuniluuttoqarnissaanut ulorianartorsiorneq killeqartutut naliliiffigineqarpoq. Illoqarfimmiut tamarmik kaammattorneqarput, innersuussutinik malinninnissaq sillimaffigilluaqqullugu: Allanut 2 meterinik ungasissuseqarit, assammiinaveersaarit allatullu qanillinaveersaarit, aammalu errortorluartarit.

Ippassaq tusagassiortunik katersortitsinermi oqaatigineqartutut, maanna tikittartut taama amerlassuseqartillugit, kiisalu Danmarkimi tunillatsissimasut amerlammata tunillatsittoqarnissaa ilisimanaateqareersoq.

Taamaattumik tikittut tamarmik misissorteqqinnerminni, siusinnerpaamik ullut tallimassaanni pisinnaasumi tunillatsissimannginnerminnut uppernarsaammik pissarsinissamik tungaanut angerlarsimaannarnissamut maleruagassanik malinninnissaat pingaaruteqartorujussuuvoq. Tamatuma kingorna tikittut tamarmik Kalaallit Nunaannut tikinnermiit ullut 14-it tikillugit mianersoqqissaartussaapput.

Aasianniittut tamaasa oqartussaasut paasinnilluarnissaasa tungaanut eqqissisimaqqullugit qinnuigaagut. Tamatuma saniatigut pingaartumik inuit attaveqaqatigiiffiisigut oqaatsinik siaruartiterinissaq pinaveersaarneqassasoq kaammattuutigineqarpoq.

Inuit Covid-19-imut ersiutillit oqarasuaatikkut peqqinnissaqarfimmut saaffiginnissapput, tassanngaanniillu misissortittoqassanersoq naliliiffigineqassaaq.

Paasissutissat amerlanerusut:
Nakorsaaneq Henrik L. Hansen