airplanebooksbriefcase business cogs cross election entertainment fish house law lockmedicalpeopleselfservices socialtax

Covid-ip nunarsuarmi tuniluunnerani nualluummut akiuussutissanik kapuinissaq

Covid-19-ip nunarsuarmi tuniluunnera peqqutigalugu 2020-mi ukiaanerani nualluummut akiuussutissamik kapitinnissamut innersuussiffiusut nalinginnaasumit amerlanerulersinneqarput. Nualluutit inuppassuarnut, Covid-19-imik tunillatsikkunik napparsimangaatsialersinnaasunut aamma ulorianartorsiortitsinermik annertusititsisussaapput.
14. oktober 2020


Laboratorie podning
Covid-19-ip nunarsuarmi tuniluunnera eqqarsaatigalugu aamma inuiaqatigiinni nualluutit tuniluunnissaasa pinaveersaartinneqarnissaa eqqumaffigineqartorujussuuvoq. Ataatsimut isigalugu innuttaasut, pingaartumillu innuttaasut nuallulernerminni atuipiloorsinnaasut akornanni napparsimalertussat ikilisinniarneqarnissaat siunertarineqarpoq. Aamma peqqinnissaqarfinni paaqqutarinniffinnilu napparsimasoqalernissaata pinaveersaartinneqarnissaa siunertarineqarpoq.

Peqqinnissaqarfik maannamut kapuutinik akiuussutissanik 4.500-nik tigusaqarpoq, taakkulu nunap immikkoortuinut tamanut siaruarterneqassapput. Kingusinnerusukkut pilersuisoqaqqissaaq.

Sumi qaqugulu akiuussutissanik kapuisoqassanersoq pillugu illoqarfinni, najukkani aviisitigut aamma inuit attaveqartarfiisigut allagarsiinikkut paasissutissiisoqassaaq. Nunaqarfinni annerusuni innuttaasut sulisullu nunaqarfimmi kapitinnissamut neqeroorfigineqassapput. Nunaqarfinni minnerni innuttaasut illoqarfinniinnerminnut atatillugu kapitinnissamut neqeroorfigineqassapput.

Nualluummut akiuussutissamik kapitinnissaq innuttaasuni toqqakkanut pneumokok-imut akiuussutissamut kapitinnissamut ilagitillugu neqeroorutigineqassaaq. Innuttaasuni toqqakkat utoqqaammut 65-inik amerlanerusunillu ukiullit, kiisalu innuttaasut iluarsineqarsinnaanngitsunik nappaatillit.

2020-mi ukiakkut nualluummut akiuussutissanik kapuinermi salliutinneqartussat
Ukioq manna akiuussutissanik kapitittussat amerlangaatsiarmata, sumiiffinni kapuiffiusuni kikkut siulliullutik akiuussutissamik kapitinnissamut neqeroorfigineqassanersut tulleriiaarisoqassaaq.

Tulleriiaarinerit matuma kinguliani tabelimi takuneqarsinnaapput. Innuttaasunit siunnerfiusut ataasiakkaat qanoq ilinerani akiuussutissamik kapitissanersut najukkani nalunaarutigineqartassapput.

Tulleriiaarineq

Innuttaasuni siunnerfiusut tulleriiaarneqarneri

1

65-ilereersimasut tamarmik

2

Innuttaasut 65-it inorlugit ukiullit aaqqinneqarsinnaanngitsunik nappaatillit

3

Pualarujussuartut (BMI > 40 aallaavigalugu)

4

2. aamma 3. trimesterimi naartusut

5

Peqqinnissaqarfimmi sulisut, inunnut immikkut ulorianartorsiortunut qanitallit

6

Kommunini sulisut, inunnut immikkut ulorianartorsiortunut qanitallit (utoqqaat angersarsimaffii, angerlarsimaffinni ikiortit)

7

Sullivinni toqqartorneqartuni sulisut (sulisitsisunit akilerneqartut)

8

Inuinnaat (nammineerlutik akiliisut)

Imm. 2-mi aaqqinneqarsinnaanngitsunik nappaatillit taaneqartut tassaapput:
  • Aaqqinneqarsinnaanngitsunik pualluutillit
  • Uummatimikkut taqqamikkullu nappaatillit (aap naqitsineranik qaffasittoortut ilaatinneqanngillat)
  • Diabetes 1-imik imaluunniit 2-mik nappaateqarlutik sukkortut
  • Inunnguutsiminnik imaluunniit pigilersimasaminnik timip akiuussinnaassusiatigut ajoqutillit
  • Nukillaarneq peqqutigalugu anersaartorniarnermikkut ajoqutillit
  • Aaqqinneqarsinnaanngitsunik tingulluutillit tartuluutillillu
  • Nappaatit aaqqinneqarsinnaanngitsut allat, nuallunnermi napparsimarujussuarnermik nassataqarsinnaasut

Kikkulluunniit, ukioq manna nualluummut akiuussutissamik kapuinermi innuttaasuni siunnerfiusuni ataatsimi amerlanerusuniluunniit akuusut akiuussutissamik kapiteqqullugit annertuumik kaammattorneqarput. Suliniut manna suliniuterpassuit, Covid-19-ip nunarsuarmi tuniluunnerani Kalaallit Nunaata pitsaanerpaamik aniguinissaa anguniarlugu ingerlanneqartut ilagaat.

Annertunerusumik paasisaqarusunnermi nakorsaaneq Henrik L Hansen, tlf. 55 35 61-imut attaveqarfigineqarsinnaavoq.