airplanebooksbriefcase business cogs cross election entertainment fish house law lockmedicalpeopleselfservices socialtax

Sinerissap qanittuani aalisartunut ikiorsiissut nutaaq – kiisalu inuussutissarsiutinik ingerlataqartunut ikiorsiissutit sivitsorneqarnerat

Nunami inuussutissarsiutit ilaat kisimik COVID-19-mit eqqugaanngillat – aammali sinerissap qanittuani aalisarneq eqqugaavoq. Taamaammat sinerissap qanittuani raajarnianut, saattuarnianut saarullinnianullu sammititamik aningaasaqarnikkut ikiorsiissutinik pilersitsinissaq Naalakkersuisut aalajangerpaat.
14. september 2020


Saarullik
Aalisagaqatigiiaani taakkunani pingasuni akit COVID-19-p malitsigisaanik appariarput. Aalisartut tunisinermi akit appariaataata ilaanik nammattussanngorlugit aalisartunut eqqugaasunut aningaasaqarnikkut ikiorsiissutit aaqqissuunneqarput. Tamanna ukiup siulianut naleqqiullugu akit appariaataasa siulliit 15 procentit aalisartumit namminermit,15 – 25 procentimullu 10 procentillu tulliuttut nunatta karsianit matussuserneqartussanngorlugit ikiorsiissutit aaqqissugaapput.

Allatut oqaatigalugu aalisartut akit apparnerat sioqqullugu akit 10 procentiisa nalingannik annerpaamik taarsiivigineqassapput. Taarsiissutit ulloq 31. december 2020-p tungaanut atuutissapput.

Tapersiinissamik aaqqissuussinermik suliaqarnissamut suleqatigiissitaq Aningaasaqarnermut Naalakkersuisoqarfimmit, Aalisarnermut, Piniarnermut Nunalerinermullu Naalakkersuisoqarfimmit kiisalu Inuussutissarsiornermut Suliffeqarnermullu Naalakkersuisoqarfimmit, Sulisitsisunit KNAPK-millu inuttalerneqartoq pilersinneqarpoq.

Inuussutissarsiortunut ikiorsiissutit kiisalu takornariartitsinermik inuussutissarsiortunut ikiorsiissutit taamatullu immikkut ittumik ikiorsiissutit ulloq 1. oktoberimit 31. december 2020 ilanngullugu sivitsorneqarnissaat Naalakkersuisut aalajangerpaat.

Inuussutissarsiornermik ingerlataqartunut ikiorsiissutit piffissap ingerlanerani ataavartumik suliniutinngortussaannginnerat erseqqissassallugu Naalakkersuisut pingaartippaat. Tamanna niuernermik aallaaveqartumik aningaasarsiornermi suliffeqarfinnut namminersortunut ataavartumik tapiissutit sanngiillisitsisarnerannik, pisariaqartumillu nalimmassarnissamik akornutaaneranik isumaqarneq aallaavigalugu pivoq. Naggataagullu akit qaffasinnerusut atuisartunut akornutinnguuttarput.

Naalakkersuisut ikiorsiissutinik taaneqartunik sivitsuinermik aalajangernerat COVID-19 pissutigalugu pissutsit immikkuullarilluinnartut atuunnerat aallaavigalugu pivoq.

Inuussutissarsiornermut Suliffeqarnermullu Naalakkersuisoqarfik aaqqissuussinerni allaffissornikkut isumaginnittuuvoq.

Inussiarnersumik inuulluaqqusilluta

Vittus Qujaukitsoq, Aningaasaqarnermut Naalakkersuisoq

Jens-Frederik Nielsen, Inuussutissarsiornermut Aatsitassarsiornermullu Naalakkersuisoq

Jens Immanuelsen, Aalisarnermut, Piniarnermut Nunalerinermullu Naalakkersuisoq


Annertunerusumik paasisaqarusunnermi saaffigineqarsinnaavoq Martin Christiansen (Aningaasaqarnermut Naalakkersuisoqarfik) Toqq.: +299 345213, MCHR@nanoq.gl