airplanebooksbriefcase business cogs cross election entertainment fish house law lockmedicalpeopleselfservices socialtax

Nunatta avataanit Nunatsinnut angalanermi piumasaqaatit pillugit nalunaarut nutaaq

Savalimmiuni Islandimilu tunillaassuunnerup annertusiartornera pissutigalugu nunanit taakkunanit marlunnit nunatsinnut angalasunut immikkut sakkukilliliissutit peerlugit nalunaarummik iluarsisamik Naalakkersuisut ippassaq atuutsitsilerput.
11. august 2020


Hjælpepakker
Killilersuutit ukioq manna siusinnerusukkut sakkukillineqarnerisa kingorna Savalimmiuni maanna tunillaassuuttoqaqqilerpoq. Islandimi aamma siusinnerusumut sanilliullugu tunillatsissimasut arlaqartut paasineqarput.

Nunatta avataanit Nunatsinnut angalanermi piumasaqaatit pillugit nalunaarut nr. 27, 21. juli 2020-meersoq Naalakkersuisut siusinnerusukkut atuutsilerpaat. Savalimmiunit Islandimillu Nunatsinnut angalasunut immikkut sakkukilliliissutit pillugit aalajangersakkat nalunaarummut ilanngunneqarput.

Savalimmiuni Islandimilu tunillaassuunnerup annertusiartornera tunngavigalugu Islandimit Savalimmiunillu Nunatsinnut angalasunut piumasaqaatit immikkut sakkukillisat maannamuugallartoq atorunnaarsinneqassasut Naalakkersuisunit aalajangerneqarpoq.

Pingaartumik Savalimmiuni tunillatsissimasut sukkasuumik amerliartornerat aammalu Savalimmiunit Nunatsinnut angalasut amerlanerat pissutigalugit sumiiffinnit danskit nunanut allanut ministeriaqarfiata angalanermut ilitsersuutaani nunanit killilersuiffiusunit taagorneqartunit Nunatsinnut angalasunut piumasaqaatinut Savalimmiut maannamuugallartoq aamma ilaatinneqalerput.

Tamanna ilaatigut isumaqarpoq Savalimmiunit Nunatsinnut angalasut sumiiffinnit aarlerinartoqarfinnit (nunanit killilersuiffiusunit) Nunatsinnut angalasut allat assigalugit katerittarfinni, aaqqissuussinerni, pisussani il.il. peqataassanngillat imaluunniit niuertarfinni, atuakkanik atorniartarfinni, neriniartarfinni cafénilu il.il. isersimaqqusaanatik Covid-19-imik tunillatsissimannginnermut uppernarsaaqqaratik.

Taamaattorli ulluinnarni nioqqutissanik pisiniarnerit allatullu pisariaqavissumik pisiniarnissat allanit isumagineqarsinnaanngitsut isumaginissaat akuerineqarput.

Nunanit killilersuiffiusunit, tassunga ilanngullugu Savalimmiunit Nunatsinnut angalasunut piffissaq killilersuiffiusoq ullunik 14-inik sivisussuseqarpoq. Taamaattorli Nunatsinnut angalasup piffissaq killilersuiffiusoq sivikillisissinnaavaa Covid-19-imut misissortinnermigut taannalu tunillatsissimanngitsoq paasineqarpat. Taamaattorli siusinnerpaamik tamanna pisinnaavoq Nunatsinnut tikinnerup kingorna ullut tallimat (5) kingorna. Misissortinnerup akissuteqarfigineqarnissaata tungaanut Nunatsinnut angalasoq inunnut allanut attaveqassanngilaq. Misissortinneq tunillatsissimanngitsutut paasineqarpat Nunatsinnut angalasoq Covid-19-imik tunillatsissimanngitsutut naatsorsuunneqassaaq.

Nalunaarut saqqummiunneqarnermini atuutilissaaq. Inuit sapaatip akunnerata kingulliup iluani Savalimmiunit Nunatsinnut angalasut immikkut eqqumaffiginninniaqqullugit aammalu killilersuinermi aalajangersakkanik sapinngisamik malinninniaqqullugit kaammattorneqarput.

Sukumiinerusumik paasisaqarusuttut Peqqissutsimut Naalakkersuisoqarfimmut saaffiginnissinnaapput 34 50 00-imut sianerlutik imaluunniit e-malikkut: pn@nanoq.gl