airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imut akiuussutissiineq

Akiuussutissinneqarneq COVID-19-mik tunillatsillunilu nappaateqalernissamut illersuutaammat Nunatsinni nakorsaaneqarfimmit innersuussutaavoq.
Pilersinneqarpoq 3. januar 2021

Sooq akiuussutissinneqassavit? 

Covid-19 tassaavoq nappaat, inunni siornatigut siumorneqarsimanngimmat tunillatsinnissamut napparsimalernissamullu illersuutaasinnaasumik akiuussutissaqarfiginnginnatsigu nappaalassutaalersinnaasoq.

Nunatsinni innuttaasut ilaminiinnanngui tamatuiminnga nappaateqarsimapput, tunillatsissimasut kingusinnerusukkut nappaammik tunillatseqqinnissamut tamakkiisumik illersorneqarsinnaanersut qularnaarlugu ilisimanngilarput.

Covid-19 tamanik eqquisinnaavoq, tunillatsittut ilaat perusulersarput nappaallu toqqutigisinnaallugu.

Akiuussutissinneqarneq COVID-19-mik tunillatsillunilu nappaateqalernissamut illersuutaammat Nunatsinni nakorsaaneqarfimmit innersuussutaavoq.

Akiuussutissinneqarneq akeqanngilaq neqeroorummillu atuinissaq nammineq piumassutsimik tunngaveqarluni.

Vaccinationsstrategi (danskisuinnaq) 


Vaccinationsstrategi, fase 1 (danskisuinnaq allassimavoq)

Vaccinationsstrategi, fase 2 (danskisuinnaq allassimavoq)

 

Kikkut akiuussutissinneqarnissamik neqeroorfigineqassappat? 

Akiuussutissat akuerineqartut nunatsinni pissarsiarineqarsinnaalernissaat ilutigalugu kikkut tamarmik akiuussutissinneqarnissamik neqeroorfigineqassapput. Taamaakkaluaq meeqqat 16-init inorlugit ukiullit, naartusut milutitsisullu- akiuussutissaq taakkununnga tunngatillugu misissorneqanngimmat akiuussutissinneqarnissaannik neqeroorfiginngilagut.

Aallaqqaammut akiuussutissanik annikitsuinnarnik pissarsiviusumi, Nunatsinni Nakorsaaneqarfimmit peqqinnissamut tunngatillugu naliliineq aallaavigalugu aalajangersakkamik pingaarnersiunikkut, tulleriiaaraluni akiuussutissiisoqassaaq.

Akiuussutissanik annertunerusunik pissarsigutta neqeroorut tulleriiaakkamik annertusiartussavarput.

Akiuussutissinneqarsinnaaleruit nalunaarfigineqassaatit.

Kikkut sumi qaqugulu akiuussutissinneqarnissat tusagassiorfiit www.nun.gl-ilu aqqutigalugit nalunaarutigineqartassapput.

Akiuussutissaq suna ilinnut neqeroorutaassava? 

COVID-19-imut akiuussutissaq akuerisaasoq siulleq tassaavoq Comirnaty® taannalu tyskit nakorsaasiorfiannit BioNTechimit Amerikami nakorsaasiorfik Pfizer suleqatigalugu inerisarneqarsimavoq.

Comirnaty® tassaavoq akiuussutissamik RNA-mik taaneqartartoq. RNA tassaavoq kalerrisaarut inuup sananeqaataaneereersoq proteininik aalajangersimasunik pilersitsinissamut kodiisartoq. Akiuussutissaq RNA proteininik coronavirusip qaleruaanut assingusunik, taamaalillunilu timip allagisaminut qisuariartarnerata, tunillatsinnissamut napparsimalernissamullu illersuusiornissaanut perrassaataasinnaasumik koodiinikkut sunniuttarpoq. RNA-akiuussutissat virusitaqanngillat akiuussutissallu akui sunniutereerunik timimi pilertortumik arrortarput.

Sorlermik akiuussutissinneqarnissat illit nammineq aalajangersinnaaviuk? 

Neqeroorummi akeqanngitsumi illit nammineq akiuussutissaq sorleq perusullugu toqqarsinnaanngilat. Tamanna nunatsinni meeqqanik akiuussutissiisarnermi akeqanngitsumillu akiuussutissiisarnerni allani atuupportaaq.

Maannamuugallartoq COVID-19-imut akiuussutissat nunatsinnut nassiunneqartussat tamarmik, akeqanngitsumik akiuussutissinneqarnissamik neqeroorutip iluani agguaanneqassammata, nakorsamit allagarserneqarnikkut pisiarineqarsinnaassanngillat.

Akiuussutissinneqarnissamik neqeroorut akuerinngikkukku, kingusinnerusukkut akeqanngitsumik akiuussutissinneqarnissamut pisinnaatitaaffiit annaassanngilat. Neqeroorfigineqaruilli akuerinissaa Nunatsinni Nakorsaaneqarfiup innersuussutigaa.

Akiuussutissaq qanoq sunniuteqarluartigaa? 

Comirnaty® ilisimatuussutsikkut misissuinerni, makitsinikkut misiliinermut peqataasut affaat akiuussutissillugit affaallu imermik tarajulimmik kapillugit annertoorujussuarmik misissuiffigineqarpoq. Akiuussutissinneqartut ilaat ikittuararsuit COVID-19-mik nappaateqalerput, imermillu tarajulimmik kapitittut tyveriaataasa missaat COVID-19-imik nappaateqalerlutik. Taamaammat Comirnaty® -ip sunniutaa 95%- ip missaaniinnerarparput.

Amerlanerpaat kapiteqqaarnerminniit sap. ak. marluk qaangiutiinnartut illersuutissaqalersarnerat ilimanaateqarluarpoq, aatsaalli aappasaanik kapitereernerup kingorna sap. ak. ataatsip qaangiunnerani tamakkiisumik sunniutaa uppernarsineqarpoq.

Akiuussutissinneqarnikkut COVID-19-imut 100%-imik illersuutissaqalernerup uppernarsineqannginnera erseqqissassallugu pingaaruteqarpoq. Taamaammat tunngaviusumik tamakkiisumik akiuussutissinneqaraluarluni COVID-19-imik tunillatsittoqarsinnaavoq napparsimalersoqarsinnaallunilu, tamannali qaqutigoortuussaaq.

Akiuussutissamit illersugaanerup ukiorpassuarni atasinnaanissaanut imal. illersuutissaq attatiinnarniarlugu illit immaqa kingusinnerusukkut akiuussitissinneqartariaqarnissat suli uppernarsaatissartaqanngilaq.

Akiuussutissap suut kingunerluutitarai? 

Akiuussutissat tamarmik kingunerluutitaqarput tamannalu Comirnaty® -missaaq atuuppoq. Nalinginnaasumik ippiuutit annikitsut peeruttussallu pineqarput, Comirnaty® lu akiuussutissatut isumannaalluinnartutut uppernarsarluakkatullu isigaarput.

Kapitiffiup nalaata annernarnera amerlanernit malugineqassaaq. Kingunerluutit allat nalinginnaasut tassaapput qasoqqaneq, niaqorlunneq, nukiit naggussallu annernarnerat, uulinneq, kissarneqalaarneq kapitiffiullu nalaata aappillerluni pullannera. Timip pissusissamisut akiuussutissinneqarnikkut qisuariaateqarneranut nalininngaasumik ersiutaapput. Ippiuutitut ilisimaneqartut qaangiuttussallu taakku malugigukkit nakorsamut attaveqartariaqanngilatit.

Sakkortuunik kingunerluutinik ersiuteqaruit, soorlu anersaartorniarnermik ajornartorsiorneq, anillattoorneq nakorsamut attaveqassaatit.

Qaqutigooqisumik akiuussutissami akorineqartunik sapigaqarnermik ilaatigut patsiseqarsinnaasumik sakortuumik sapigaqarnermut ersiuteqartoqarsinnaasarpoq. Ass. nakorsaatinik ilisimaneqartumik sakkortuumik sapigaqaruit, akiuussutissinneqartinnak akiuussutissiisussamut tamanna ilisimnatitsissutigissariaqarpat. COVID-19 -imut akiuussutissiinermut atatillugu tamatigut kingunerluutaasinnaasut qaqutigoortut iliuuseqarfiginissaannut upalungaarsimasoqassaaq.

Qanoq akiuussutissiisoqassava? 

Akiuussutissiivissamut piffissaliussaq sapinngisamik nalliliivissoq takkutissaatit tassanilu ilitsersuutit malillugit. Akiuussutissiinerit tamatigut nakorsamit akisussaaffigineqarlutik ingerlanneqassapput, peqqinnissakkulli sullissisunik assigiinngitsunik naapitsissaatit.

Nalinginnaasumik assaqqup nukiagut akiuussutissiisoqassaaq. Akiuussutissaq imermut tappiorannartuiakkamut 0,3 ml-imut imerpallanneqartoq kapuutigineqassaaq. Akiuussutissinneqareeruit sapigaqarnermut ersiuteqalissaguit peqqinnissakkut sullissisunit ikiorneqarsinnaaqqullutit qanittumi minutsit 15-it utaqqeqqaassaatit.

Akiuussutissinneqareeruit qanoq iliussavit? 

Akiuussutissinneqarsimagaluaruilluunniit tunillaanaveersaarnissamut siunnersuutit nalinginnaasut pitsaasut malittuassavatit. Akiuussutissaq 100%-imik sunniuteqanngilaq, virusi akiuussutissinneqartup timaaniiginnarluni taamaalillunilu tunillaasinnaaneranut akiuussutissap pitsaaliuutaanerattaaq suli ilisimanngilarput.

EQQAAMAJUK: marloriarlutit akiuussutissinneqassagavit

Covid-19-imut tamakkiisumik akiuussutissinneqassaguit sap. ak pingasut sisamallu akornganni qaangiuppata aappassaa akiuussutissinneqassaatit.

Coronavirus/COVID-19 nutaaq pillugu ilisimasat pingaarutillit


COVID-19 tassaavoq coronavirusimik nutaamik tunillatsikkaanni nappaatigilersinnaasap aqqa.

Tunillatsinneq
Tuniluunnerup pitsaaliorluarsinnaanissaanut coronavirusip qanoq tuniluuttarnerata ilisimanissaa pingaaruteqarpoq.

Attuinikkut tunillaaneq
Attuinikkut tunillatsinneq
Tunillatsissimasup nammineq qisini/kakkini virusitalik assamminut pisissinnaavaa tamatumalu kingorna tunillannartoq toqqaannartumik attuinikkut ass. assammiinikkut ingerlateqqillugu. Tunillatsissimasup quersornikkut/tangajornikkut imal. assamminik ass. matup tigummiviinik attuinikkut viruseqalersitsissaaq. Inuup tulliuttup tamatuminnga attuereernikkut tunillannartoq sorluni, isini qaniniluunniit aqqutigalugit nammineq ameraasaminut ingerlateqqissavaa.

Silaannakkut kuseriarneeqqatigut tunillaaneq
Silaannarmi kuseriarneeqqatigut tunillatsinneq
Tunillatsissimasup quersornikkut imal. tangajornikkut kuseriarneeqqat virusitallit siaruartersinnaavai. Kuseriarneeqqat taamaalillutik silaannarmut siaruaanneqartut inummut allamut tussinnaapput taamaalillunilu tunillannartoq sorluit, isit qanerluunniit aqqutialugit nammineq ameraasanut ingerlatinneqassaaq.


Nappaammut ersiutit
  • Qisertaqanngitsumik quersorneq
  • Kissarneqarneq
  • Nukitsigut anniarneq
  • Toqqusaarlunneq
  • Mamaatsumik malussarsinnaannginneq

Nappaatip tuniluutinnginnissaanut siunnersuutit nalinginnaasut:
  1. COVID-19-imut ersiuteqaruit, nappaateqernerit misissuinikkut paasineqarpat imal. tunillatsissimasumut qanimut attaviuguit angerlarsimaannarit.
  2. Assatit asakulakkit assanulluunniit spritti atortaruk.
  3. Talinnut quersortarit tangajortarilluunniit.
  4. Assamiinaveersaarit, ersakkut kunissinaveersaarit eqitaarinaveersaarillu
  5. Angerlarsimaffimmi suliffimmilu eqqiluisaarit.
  6. Qanillinaveersaarit – allallu taamaalioqqukkit

Siunnersuut arlaat ataaseq eqquutsissinnaanngikkukku allat eqquutsinnissaat immikkut eqqumaffigiuk.

Imarisaa PDF fil-inngorlugu aasinnaavat