Sianissutsikkut peqqissuuneq pillugu paasissutissiineq

Nappaatinik tunillaassortunik napparsimalerneq, soorlu maanna coronavirus, inuunitsinnik sianissutsikkullu peqqissuunissatsinnut sunniisinnaavoq.

Tunillatsissinnaaneq aningaasaqarnerlu pillugit ernumanerit - kiisalu mattunnissamut ungasissuseqarnermullu piumasaqaatit - kiserliulersitsisinnaapput, eqqarsaatersortitsillutik aammalu uisakajaarnermut, taartunganermut qasunermullu ersiutinik pilersitsisinnaallutik. Tamatuma ilutigisaanik ulluinnarisat allanngorujussuarsimapput matumanilu pisut qanoq ingerlanissaat qanorlu sivisutiginissaat nalorninartortaqartorujussuullutik.

Piffissaq kikkunnut tamanut ajornartoqarpoq allallu allaniit sanngiinnerusarput. Assersuutigalugu inoqarsinnaavoq kisimiillutik inuusunik siusinnerusukkullu annilaangasarnermik taartungasarnermillu atugaqareersunik. Taamaakkaluartoq nammineq inuttut qanigisattalu eqqarsartaatsikkut peqqissuunissaat atugarissaarnissaallu angujumallugit arlalissuartigut iliuseqarsinnaavugut.

Nappaalanersuup nalaani ersiorneq, nalornineq kukkusunillu paasissutissinneqartarneq ima kinguneqarsinnaavoq, innuttaaqataasut inuilluunniit aalajangersimasut tunillaannartup siammarterneranut pisuutinneqarnerannik taamaammallu inuit taakku suunngitsutut immikkoortinneqartutullu misigilersarput.

Inuit tunillatsittut pisuutinneqarsinnaasarput, akisussaassuseqanngitsumik pissusilersorsimasutut inunnullu akulerusimanngitsutut amerlasoorpassuillu tunillatsissimagaangamik aamma imminnut pisuutilersarput. Kisianni nappaat inunnik patsiseqarnani kisiannili virus-imik patsiseqarmat eqqaamassallugu pingaartuuvoq.

Coronavirus ajornanngitsuararsuarmik tunillaattarpoq, tulillatsinnerlu inunnik pigisanillu attuinikkut pisarpoq. COVID-19-imut atatillugu imminut naleqartikkunnaartarneq pillugu innuttaasut tamarmik ikiuussinnaapput, tamanna nappaat pillugu paasissutissanik qanorlu tunillaattarneranik ilisimasaqarnikkut pisinnaavoq - aamma attaveqarfigisartakkanut ilisimasamik tassannga ingerlatitseqqiinikkut pisinnaavoq. Oqaatsinik immikkoortitsisunik imaluunniit eqqunngitsumik paasissutissiisunik tusagaqaruit atuagaqaruilluunniit, taakku unitseqqukkit. Tamatuma tusaamasarsorneq eqqunngitsumillu paasissutissiisarneq akiortarpaa.

Sinnakilligaluttuinnartillutit ernumanerit sakkortusiartortarpoq annilaangaleraluttuinnartarlutillu.

Taamaalillutit nukissaqarnerulissaatit ulluinnarnilu unammilligassanut aamma nukissaqarnerulissallutit.

Timip atornera ilungersunartuusariaqanngilaq illit peqqissutsinnut iluaqutaassaguni qiimanerulersitsissagunilu. Ulluinnarni sammineqartartut soorlu sisorarnerit pisuttuarnerillu aamma taakkununnga ilaapput.

Angerlarsimaffinni natermi eqaarsaarnissamut siunnersuuterpassuit internet-imi nassaassaapput imaluunniit apps-it pitsaasut amerlaqisut eqaarsaarutinik takutitsisartut pissarsiarisinnaavatit. Nipilersorit nuannarisannik qiterusaarlutillu - tamanna illarnartunik aamma kinguneqarsinnaasarpoq.

Ullormut silamut aninissat timinnillu atuillutillu silaannarissartarnissat pingaartittaruk, tamanna inuit allat qanillivallaarnagit pisinnaappat. Ullup qaamanerata qiimaneq qaffatsittarpaa. Taamaammat sisorarit, arpagit pisuttuarlutilluunniit.

Qarasarsornerit ataavartuutiguk assigiinngitsunik sammisaqartarnikkut. Atuakkamik atuagassiamilluunniit atuarit, sudoku suliariuk, assinik ikkussortakkanik suliaqarit, nipilersuutinik tusarnaarit imaluunniit pinnguaammik pinnguarit. Naatsumik oqaatigalugu, arlaannik ujartuigit aallussisinnaaninnik piumasaqartumik. Ullorsiutinnut allattarit imaluunniit unnuit tamaasa qujamasuutigisat ataaseq pillugu allagit, matumani tamatuma qanoq pingaaruteqartiginera pingaaruteqartiginnginneraluunniit apeqqutaatinnagu.

Titartaaneq, allanneq, qalipaaneq, erinarsorneq, nipilersuummik nipilersorneq nuannarigukkit imaluunniit arlaatigut pinngorartitsinermik ingerlatsiguit, ilisimatusarnerit taava takussusersimavaat, tamatuma sianissutsikkut peqqissuunissaq aamma pitsaasumik sunnertaraa.

Ulluinnarisanni siumoortumik naatsorsuutiginnissinnaanerup ataqatigiinnerullu piginissaat isumassarsiatsialaasinnaavoq. Taamaammat ullormi imaluunniit sapaatip akunnerata ingerlanerani suliassat pillugit pilersaarusiorit imaluunniit malitassaliorit. Periutsinik aalajangersimasunik atuilerniarsarigit, ullup ingerlaneranik takussusiisuusunik.

Angerlarsimaffimmi sulisarsimaguit, nalinginnaasumik piffissami suliffigisartakkanni suliniartarit piffissamilu nalinginnaasumik soraarfigisartakkanni soraarniartarlutit.

Sianissutsikkut peqqilluartuunermut ilaalluinnarpoq, siunertaqartutut anguniagaqartutullu misigineq. Kalaallit Nunaata qanoq sivisutigisumik matoqqasussaanera pillugu ilisimasaqannginneq, immikkut sakkortusinnaavoq. Taamaammat arlaatigut suliaqartutut sunniuteqartutullu misigineq, pingaaruteqartorujussuuvoq.

Sunniuteqarnerit attatiinnaruk, inunnut qanillinaveersaarnikkut innersuussutinillu malinninnikkut. Taama iliornikkut innuttaasut eqqugaasinnaasut paaqqutarinerinut taperseeqataassaatit taamaalillunilu Kalaallit Nunaanni tunillaassuinerup siammarterneqarnerata annikillisinnissaanut tamatta sapinngisatsinnik sukkut tamatigut peqataassaagut.

A: Eqqaamajuk, piffissami ilungersunartumi inuit allat ulluinnarni atugaannut aamma sunniuteqarluarsinnaagavit. Taamaammat sutigut tapersiisinnaanerit ikiorsiisinnaanerillu eqqumaffigikkit. Inuit ilisarisimasatit ernumassuteqarsinnaasut eqqissisarniartakkit aamma inuit ilisarisimasatit kisimiittut attaveqarfigisassagakkit immikkut maluginiariuk. Pingaartumik utoqqaat inuillu siornatigulli annilaangasartut taartungasartulluunniit immikkut eqqumaffiginiartakkit.

B: Nalinginnaat pillugit ikiuinissamik neqeroorit, assersuutigalugu pisiniarneq, videokkut ilinniakkerititsineq imaluunniit kajumissutsimik ikiuukkumallutit nalunaarlutit.

Inuit attaveqarfigisat soorlu ilaquttat, ikinngutit, suleqatit aamma affarlerisat, sianissutsikkut peqqissuunitsinnut inuunittalu pitsaassusaanut sunniuteqartorujussuupput, tassa inuit taakku inunnut allanut attaveqartutut misigilersittaramitigut. Maannakkut tikilluta naapissinnaanngiffitsinni oqarasuaat, video atorlugu sianernerit imaluunniit inuit atugaat attaveqaatit aqqutigalugit attaveqartariaqarpugut immitsinnullu malinnaavigaluta.

Pisoq sungiusimanngisaq, sumiiffiit ilaanni suliffeqarfiit paaqqinnittarfiillu matoqqanerat pissutigalugu maannakkut immikkut ilaginerulersimasannut, inunnut attaveqarninnut tatisinermik pilersitsisinnaavoq. Pisoq taanna amerlasuunut ilungersunartuuvoq. Piffissap ingerlanerani naammagittarsinnaajunnaarsimagussi, illit nammineerlutit allallu, tamanna akueriniarsarisarsiuk.

Pisariaqartitasi naatsorsuutigisasilu pillugit oqaloqatigiittaritsi aamma ulluinnarisassinni suliassat pitsaanerpaamik ingerlannissaat pillugit aalajangersimasunik isumaqatigiissusioritsi. Inuttut ataasiakkaatut allanik ilagisaqarnissamik kisimiinnissamillu pisariaqartitsisarnersi pillugit oqaloqatigiittaritsi.

Nutaarsiassanik isiginnaarnermi atuarnermiluunniit piffissap atukkap sivikillisinnissaa isumassarsiatsialaasinnaavoq. Paasissutissinneqartarneq pitsaasuuvoq nutaarsiassanilli pissarsiffiusinnaasut uppernartut toqqartakkit. Arlaannik allarluinnarmik eqqarsalersitsisumik aamma ilorrisimaarnermik eqqissisimaarnermillu misigiffiusumik, sammisaqartarnissat aamma pingaaruteqarpoq. Tamatuma uisakajaalernissaq pinaveersimatittarpaa.

Eqqaamajuk nappaat inunnik patsiseqarnani virus-imik patsiseqarmat. Coronavirus ajornanngitsuararsuarmik tunillaattarpoq, tulillatsinnerlu inunnik pigisanillu attuinikkut pisarpoq. Napparsimallutit innangasimaguit - coronavirusimik tunillatsissimanerit imaluunniit nappaammik allamik tunillatsissimanerit uppernarsineqarsimagaluartoq - imminut pisuutissanngilatit.

Ilisarisimasaqaruit tunillatsisimasumik imaluunniit napparsimalluni innangasumik, taava tapersersornerisigut eqqissisarnerisigullu taakku ikiukkit.

Pissusilersuutaasartut peqqinnanngitsut, soorlu nikerartumik sinittarneq, aalakoornartutorpallaarneq imaluunniit pujortarneq pinaveersaarlugit misiliguk. Pissutsit ilinnut iluaqutaasussat, naak sorpassuarniit piumasaqaateqarfigineqaraluarlutit, pingaarnersiuisarit assersuutigalugu angerlarsimaffimmit sulineq meeqqanillu paarsineq ataatsikkut ingerlattussaagaangakkit.

Imminut paariguit inuit allat aamma pitsaanerusumik paarissavatit.