Angerlarsimalluni mattusimaneq

Innuttaasut COVID-19-imik tunillatsissimanerat pasitsaanneqarsimagaluartoq imaluunniit uppernarsarneqarsimagaluartoq napparsimarujussuannginnerat pissutigalugu angerlarsimaannarsinnaappata angerlarsimaffimmilu katsorsarneqarsinnaallutik angerlarsimallutik mattusimatitaasinnaapput.

Angerlarsimalluni mattusimasup najugaqatai angerlarsimaannaqqusaassapput matumani immikkut najugaqarsinnaaneq periarfissaqanngippat.

Angerlarsimallutit mattusimanerit ima paasissavat, angerlarsimassaatit angerlarsimaffiillu qimassanngilat.

Angerlarsimalluni mattusimanermut tunngavissaatitaasut allat

Pingaarnertut angerlarsimaffigisat qimassanngilat.
Najugaqatigisatit qanimut attaveqarfigissanngilatit.
Inimut immikkoortumut isersinnaassaatit.
Sapinngisamik perusuersartarfimmut uffarfiusinnaasumullu immikkoortumut isersinnaassaatit.
Katsorsaruminaatsumik nappaateqalersinnaasunik najugaqateqartoqassanngilaq.
Illoqutigiinnut ilaasut allat angerlarsimallutik mattusimanissaminnut akuersissuteqarsimassapput.

Angerlarsimallutik mattusimatitaanivit nalaani nappaammut ersiutit ajorseriaateqarnersut eqqumaffigissavatit. Taamaattoqalerpat najukkanni peqqinnissaqarfik oqarasuaatikkut attaveqarfigissavat.

Innersuussutit

Illoqutigiinnut ilaasunut qanittumik attaveqartarneq pinngitsoortaruk.
Illoqutigiinnut ilaasut inimeeqatigigukkit, kiinnamut assiaquteqarit.
Inimi immikkoortumi sinigit.
Periarfissaappat immikkutuffarfeqarlutillu perusuersartarfeqarit.
Namminerisamik allarutigisatit taamaallaat atortakkit.
Pitsaasumik quersortariaaseqarit/tangajortariaaseqarit (kakkissarfimmut imaluunniit atsipaannut).
Akuttunngitsumik errortortarit.
Tamatigut errortortarit:
- Quersoreeraangavit/tangajoreeraangavit
- Kakkissarfimmik atuereeraangavit
- Perusuersartarfimmeereeraangavit
- Nerinnginnermi

Eqqiaaneq errorsinerlu

Ullut tamaasa perusuersartarfimmik/uffarfimmik aamma igaffimmik kiisalu napparsimasup ini isersimaffigisartagaanik, nalinginnaasumik eqqiaanermi qaqorsaatit atorlugit eqqiaasarnissaq innersuussutigineqarpoq. Ataatsimoorussanik perusuersartarfeqarlunilu uffarfeqarsimappat, tunillatsissimasup atorsimasani nammineq eqqiassavai.
Allarutit, oqorutit qalii iluatigullu atisat errorneqassapput minnerpaamik 80 °C.-imut. Atisat allat sapinngisamik minnerpaamik 60 °C.-iusimut.

Eqqasagassalerineq

Eqqakkat nalinginnaasumik poorneqassapput passunneqarlutillu.
Eqqakkanik passussereernerup kingorna errortortoqartassaaq.
Eqqakkat isumaqatigiissut malilugu ikiorteqarluni assartorneqassaaq.

Angerlarsimalluni mattusimanerup taamaatinnera

Misissugassamik tigusiffigitinnermi tunillatsissimanngitsutut paasineqarnerata kingorna angerlarsimalluni mattusimaneq taamaatinneqassaaq. Kalaallit Nunaata avataani angalasimagaanni imaluunniit COVID-19-mik tunillatsissimasup eqqaaniissimagaanni, ullut 14-nit tikinnermiit imaluunniit COVID-19-mik tunillatsissimasoq eqqaaniissimaneraniit angerlarsimaannartussaapput.

Misissugassamik tigusiffigitinnermi tunillatsissimasutut paasineqaraanni napparsimanermi ersiutaarunnerup ullut pingasut kingorna angerlarsimalluni mattusimaneq taamaatinneqassaaq, aatsaalli minnerpaammik ullut 8-at napparsimanermi ersiutit qaangiutereersimappata.