airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaanni katerisimaartarnerit

Katerisimaartarnernut, ininut kikunnit tamanit iserfigineqarsinnaasunut assartuutinullu killilersuinernik atuutitsisoqarpoq. Piumasaqaatit assigiinngitsut eqqumaffigissavatit. Uani paasisaqarsinnaavutit.
Nutarterneqarpoq: 15. december 2020

Nalunaarut Kalaallit Nunaanni katerisimaartarnernut tunngasoq sapaami aggustip ulluisa aappaani 2020-imi atuutilerpoq.

Nalunaarut nutaaq ukununnga atuutinngilaq: 

  • Naalakkersuisunut allatulluunnit isummersorniartunut.
  • Napparsimavinnut, nakorsiartarfinnut kiisalu nakorsiartarfinnut namminersortunut, niuertarfinnut peqqissaanermik ingerlatsisunut.
  • Ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut.


Nalunaarummiipput illup iluani silamilu aaqqissuussinernut inerteqqutaasunut tunngasut, tassani peqataasut kommuninit allaneersuunngitsuuppata allaneersuuppataluunniit: 

  • Illup iluani silamilu aaqqissuussanut, aaqqissuussanut, sammisaqartitsinernut assigisaanulluunnit peqataaneq.
  • Pikkorissartitsinerit, isumasioqatigiinnerit assigisaalu.
  • Namminerisamik aaqqissuussinerit, soorlu kuisitsinerit, inuuissiornerit, apersortitsinerit, soraarummeertoqarneranut atatillugu nalliuttorsiortitsinerit, katinnerit ilisinerillu.
  • Illup iluani aaqqqissuussinerit, nalliuttorsiornerit, sammisaqartitsinerit assigisaallu § 2-mi ilaanngitsut amerlanerpaamik 100-nik peqataasoqaqqusaapput.
  • Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit peqataanissaannut toqqaannartumik kajumissaarissanngilaq.


Silami aaqqissuussinerit il. il., kommuninit allaneersuunngitsunik peqataasullit: 

  • Silami aaqqissuussinerit, nalliuttorsiornerit, sammisaqartitsinerit assigisaallu § 2-mi ilaanngitsut amerlanerpaamik 250-inik peqataasoqaqqusaapput.
  • Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit peqataanissaannut toqqaannartumik kajumissaarissanngilaq.

Ininut kikkunnulluunniit iserfigineqarsinnaasunut piumasaqaatit

Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput:

  1. Inuit inimut qatserisartoqarfinni oqartussaasunit akuerineqarsimasumut isersinnaatitaasut amerlanerpaaffissaasa affaannaat isersimaqqusaapput. Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imit mikineruppat oqaaseqatigiit aappaat apeqqutaatinnagit inuup ataasiinnaanissaa akuerineqarsinnaavoq. Nateq oqaaseqatigiit aappaanni pineqartoq qanoq pequteqartiginera apeqqutaatinnagu iikkamiit iikkamut naatsorsorneqassaaq.
  2. Ajornanngippat init imatut pequsersorsimassapput suliffeqarfiillu imatut ingerlanneqassallutik tuniluunnissaq minnerpaaffianiitinneqassalluni, tassunga ilanngullugu pisisartut pulaartullu imminnut qanillinnginnissaat periarfissaqartillugu.
  3. Inimi ininiluunniit tamanit iserfigineqarsinnaasuni eqqiluisaarnissaq ileqqorissaarnissarlu pillugit Nunatta Nakorsaaneqarfianiit paasissutissanik nivinngaasoqassaaq.
  4. Sulisut tamarmik Nakorsaaneqarfiup eqqiluisaaqqissaarnissamik ileqqorissaarnissamillu innersuussutaanik malinninnissaat qulakkeerneqassaaq.
  5. Pisisartunut pulaartunullu ajornanngippat imermik qaqorsaammillu imaluunniit assammut spritsimik peqassaaq.
  6. Nerisassanik poortorneqarsimanngitsunik tuniniaanermi sulisut aaqqateqassapput.

Inuussutissarsiummik ingerlatalik politiit naliliinerat malillugu nalunaarummik unioqqutitsippat, taannalu nalunaarutip ilaanik malinninnissaanik ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatinnissaanik politiinit peqquneqarsinnaavoq.

Assartuutinut piumasaqaatit

Assartuutit issiaffiusinnaasut sinnerlugit ilaasoqaqqusaanngillat. Assartuummik piginnittup tamanna eqquutsittussaavaa.

Pineqaatissiissuteqartarneq

Aaqqissuussisut, inuussutissarsiummik ingerlatallit, pisortallu suliffeqarfiutaat katerisimaartitsinissamik inerteqqummik unioqqutitsisut pinerluttulerinermik inatsit malillugu pineqaatissinneqarsinnaapput.

Ingerlatseqatigiiffiit il. il., (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.