airplanebooksbriefcase business cogs cross election entertainment fish house law lockmedicalpeopleselfservices socialtax

Covid-19-imut akiuussutissamik kapitinneq pillugu apeqqutit akissutillu

COVID-19-imut akiuussutissamik kapitinneq nunatsinni coronavirusimik nutaamik tunillaassuunnerup siaruaannerata annikillisarnissaanut suliniutinut allanut tapertaasutut ilassutaavoq pingaarutilik.
11. januar 2021

COVID-19-imut akiuussutissamik kapitinnissaq periarfissanngoreeraluartoq, nalinginnaasumik eqqiluisaarnissamut immitsinnullu qanillinaveersaarnissatsinnut siunnersuutit suli malinnissaat pingaaruteqarpoq.

Sooq akiuussutissamik kapitittoqassava? 

COVID-19 virusiuvoq nutaaq inunni atuuttoq kikkulluunniit eqqugaasinnaallutik. Taamaammat tunillatsinnginnissamut napparsimalinnginnissamullu illersuutaasinnaasumik akiuussutissaqanngilagut. Inuit ilaat COVID-19-imik tunillatsissagaluarunik napparsimarujussuarlutik perululernerannik aamma toqunerannik kinguneqarsinnaavoq.


Kikkut akiuussutissamik kapitinnissaminnut neqeroorfigineqassappat? 

Akiuussutissamik kapitinnissaq tulleriiaaraluni pingaarnersiuinikkut neqeroorutigineqassaaq, peqqinnissakkut suliaqartartut nalilersuinerat aallaavigalugu oqartussanit aalajangersaasoqassalluni.

Neqeroorut siullertut ukununnga atuutsinneqassaaq:
  • innuttaasut 75-it sinnerlugit ukiullit
  • utoqqaat illuanni najugallit
  • utoqqaat illuanni aammalu angerlarsimaffinni paqqinninnermi sulisut taamatullu peqqinnissaqarfimmi eqimattat toqqakkat tamarmik sulinerminni napparsimasunut annertuumik attaveqartartut
  • inuit immikkut aarlerinartorsiortut (peqqinnissaqarfimmit toqqarneqassapput)

Peqqinnissaqarfiup innuttaasut akiuussutissamik kapitinnissaannut neqeroorfigineqartussat attavigiumaarpai.


Akiuussutissaq sorleq ilinnut neqeroorutigineqassava? 

COVID-19-imut akiuussutissaq akuerineqaqqaartoq tassaavoq Comirnaty® aammalu amerikarmiut suliffeqarfissuaataat Pfizer suleqatigalugu tyskit suliffeqarfissuaataannit BioNTech-imit ineriartortinneqartoq. Akiuussutissat -70 aammalu -80 gradit akornanni nillissuseqarlutik uninngatinneqartussaapput. Passunnissaat, assartornissaat uninngatinnissaallu pisariuvoq. Akiuussutissamik kapisinerit sulisunit immikkut ilinniarsimasunit, pitsaassutsimik qulakkeerinnittussanit, ingerlanneqassapput.

Mannakkorpiaq akiuussutissamik kapisinerit siulliit Nuummi Ilulissanilu ingerlanneqarput.

Akiuussutissat tulliuttut, akuerineqarnissaat aamma Kalaallit Nunaannut nassiunneqarnissaat naatsorsuutigineqartut, amerikarmiut suliffeqarfissuaataanit Moderna-mit ineriartortinneqarpoq.

Akiuussutissat assigiinngitsut amerlanerusut pisariunnginnerusut, piffissami qaninnerusumi piffissaligaanngitsumi ineriartortinnissaat akuerineqarnissaallu naatsorsuutigineqarpoq. Tamatuma kingunerisaanik nunatsinni sumiiffinni assigiinngitsuni ataatsikkut akiuussutissamik kapisinissaq ajornannginnerulissaaq.


Qasseriarluni akiuussutissamik kapitittoqassava? 

Piffissami siullermi akiuussutissanut pissarsiarineqarsinnaasunut tunngatillugu, ullut 21-t imaluunniit ullut 28-t akuttussuseqartumik marloriarluni akiuussutissamik kapisisoqassaaq.


Akiuussutissamik kapitinneq qanoq sunniussinnaatigiva? 

Misissuinerit takutippaat akiuussutissaq Comirnaty® 95 %-it missaanni sunniuteqartarpoq.

Inuit amerlanerpaat siullerpaamik katipereernerisa kingorna sapaatit akunneri marlussuit qaangiutereernerini akiuussutissaqalertartut ilimagineqarluinnarpoq, aatsaalli aappassaanik kapitereernermiit sapaatip akunnera ataaseq qaangiutereeraangat tamakkiisumik sunniunnera uppernarsarneqarsinnaalluni.

Akiuussutissaqalernermi tamakkiisumik COVID-19-imut illersorneqarsinnaanissaa uppernarsarneqarnikuunngitsoq erseqqissassallugu pingaaruteqarpoq. Taamaammat tamakkiisumik akiuussutissaqaraluaraanniluunniit tunngaviatigut COVID-19-imik tunillatsittoqarsinnaavoq napparsimasoqarsinnaallunilu, kisianni taamatut pisoqarsinnaanera qaqutiguussaaq.

Akiuussutissamik illersuuteqarneq ukiorpassuarni sunniuteqarsinnaanera suli uppernarsarnikuunngilarput, taamaammallu illersuisinnaassusaa ukiorpassuarni sunniuteqassanersoq, imaluunniit illersoqqaannarnissat attatiinnarniarlugu kingusinnerusukkut kapiteqqissanersutit oqaatigisinnaanngilarput.

Akiuussutissamik kapitissimasup virusimik timiminiiginnarsinnaaneranut taamaalillunilu tunillaasinnaaneranik Comirnaty® pinaveersaartitsissutaasinnaanersoq suli uppernarsarneqarnikuunngilaq. Taamaattorli akiuussutissamik kapisinernik siammarterineq ilutigalugu tamanna uppernarsarneqarnissaa naatsorsuutigivarput.


Akiuussutissamik kapitinnermi sunik kingunerluuteqartoqarsinnaava? 

Akiuussutissat tamarmik kingunerluuteqarsinnaasarput, tamanna aamma Comirnaty®-mut atuuppoq. Nalinginnaasumik akornutit annikitsut qaangiukkiartortartut pisarput, aammalu Comirnaty® isumannaassuseqarluartutut uppernarsarluarneqarsimasutullu isigaarput.

Amerlanerit kapitiffitik anniarissavaat. Kingunerluutit nalinginnaasut allat tassaapput qasoqqaneq, niaqorlunneq, nukikkut naggussakkullu anniarneq, qiiarlunnerit, annikitsumik kissarnininneq kiisalu kapitiffiup aappillernera pullalerneralu. Akiuussutissap sunniunnissaata pisussaanerattulli timip nappaammut akiuussutissaasa qisuariarnerinik nalinginnaasumik ersersitsineruvoq.

Qaqutigoortumik sakkortuumik sapigaqarnermik qisuariaateqarnerit ersersinnaasarput, ilaatigut akiuussutissami akuutissanut sapigaqarnermik peqquteqarsinnaalluni. Soorlu nakorsaatinut ilisimaneqartumik annertuumillu sapigaqaruit, taava kapitinnginnerit sioqqullugu ilinnut kapisisussaq tamatuminnga ilisimatittariaqarpat. COVID-19-imut akiuussutissamik kapisinernut atatillugu qaqutigoortumik sapigaqarnermik qisuariartoqassagaluarpat isumannaallisaasunik piareersimasoqartuaannassaaq.