airplanebooksbriefcase business cogs cross election entertainment fish house law lockmedicalpeopleselfservices socialtax

Nunatsinnut angalaneq pillugu nalunaarut nutaaq

Nunatsinnut angalaneq pillugu nalunaarut nutaaq ullormi 21. julimi atuutilissaaq maannakkuugallartumillu 31. december 2020-p tungaanut atuutissalluni - taamatuttaaq katerisimaartarnernut killilersuigallarnerit pillugit nalunaarutip atuuffia 31. decemberimut atuuttussanngorlugu sivitsorneqassaaq.
16. juli 2020


Air Greenland fly
Nunatsinnut angalanermi nalunaarummi nutaami pingaarnertut allannguutit tassaapput:
  • Umiarsuarnut timmisartunullu atuuppoq, umiarsuit takornarianik angallassissut ilanngullugit
  • Nunatsinnut tikissinnaasut amerlassutsikkut killilersorneqanngillat
  • Tikinnermiit ullut tallimaanni misissorteqqittarneq illoqarfinni annerusuni atuukkunnaassaaq - ilanngussaq 1-imili illoqarfinnut nunaqarfinnullu taaneqartunut suli atuutinneqassalluni
  • Nunatsinnut angalasut nappaammik ersiuteqanngitsut ulluni tallimani aneqqusaajunnaarallarnerat atuukkunnaassaaq
  • Takornariat illoqarfinni misissuinermut atortoqarfiusuniissapput. Takornariat tikinnermiit ullut tallimaanni misissortinnerminnit COVID-19-imik nappaateqannginnermut uppernarsaaqqaarlutik illoqarfiit qimassinnaassavaat.

Matumani taaneqartut attatiinnarneqassapput:
  • Nittartakkami nun.gl-imi innersuussutit allaqqasut malillugit nunatsinnut angalaneq sioqqullugu COVID-19-imik nappaateqannginneq uppernarsarneqassaaq
  • Angalaneq sioqqullugu Sumut-immersuiffissaq suli immersorneqartassaaq
  • Illup iluani amerlanerpaamik inuit 100-t silamilu amerlanerpaamik 250-it katersuussinnaanerannut killilersuinerit suli atuupput.
  • Inuit inimi amerlanerpaanissaat pillugu qatserisartoqarfiup akuerisai malillugit amerlanerpaamik affaannaanissaat sutortarfinnut suli atuupput.

Nunatsinnut angalasut illoqarfimmut nunaqarfimmulluunniit angalanersut apeqqutaatillugit angalanermut nalunaarummi nutaammi malittarisassat assigiinngillat. Illoqarfiit minnerit nunaqarfiillu aqunneqarsinnaanngitsumik tuniluunnermut immikkuullarissumik aarlerinartumik inissisimanerat pissutigalugu tamanna aalajangerneqarnikuuvoq. Taamaammat peqqinnissaq aallaavigalugu immikkuullarissumik iliuuserisat attatiinnarnissaat aammalu peqqinnissakkut innersuussutit malinneqarnissaat pingaaruteqarput.

Umiarsuarmik angalaarneq aamma nunanit allanit tikittut
Nunanit allaniit timmisartumut ilaallutik tikittut tamarmik qanermut qingamullu assiaquteqartassapput apuuffisaminut apuunnisami tungaanut, ullut 14-it sinnerlugit nunani ukunaniissimanngikkunik; Kalaallit Nunaat, Savalimmiut Islandilu. Umiarsuarmik angalasut Kalaallit Nunaata imartaanut iseqqusaanngillat, ullut 14-it kingulliit ingerlaneranni nunani allani tulassimappata.

Ilanngussaq