airplanebooksbriefcase business cogs cross election entertainment fish house law lockmedicalpeopleselfservices socialtax

Nunatsinnut angalanermut nalunaarutip sivitsorneqarnissaa pillugu isumaqatigiinneq

Ullormi 15. juni Kalaallit Nunaata ammaqqinnissaanut immikkoortoq 1-ip atulermalli tikittussat amerlassusaat aamma inuiaqatigiinni suliassanut tulleriaarneqartunut tikittussat amerlatsikkiartortinneqarsimapput. Nutaanik tunillatsittoqarsimanngimmat nunatsinnut angalanermut nalunaarut atuutsinneqaannassaaq, atuuffialu 20. juli tungaanut sivitsorneqassalluni.
3. juli 2020


Kangerlussuaq
Kalaallit Nunaannik ammaaqqinnermi immikkoortoq 1-imi sapaatit akunneri pingasut qaangiutereersut peqqussutit atuutilersinneqarsimasut sunniuteqarluarsimasut paasinarsivoq, tassa innuttaasut 3850-iusut missaanni misissortinneqarsimasuni suli tunillatsissimasumik nutaamik nassaartoqarsimanngimmat.

Pisut qanimut malinnaavigineqaqqissaarsimapput - tikinnissamilu piumasaqaatit makkuusimapput:
  • Misissortinnermi COVID-19-imik nappaateqannginnissaq
  • Sumut-immersuiffissaq immersoriigaq
  • Ullut tallimat qaangiunnerisigut misissorteqqinnermi tunillatsissimanngitsutut paasisaqarnissap tungaanut angerlarsimaannarnissaq imaluunniit ulluni 14-ini angerlarsimaannarnissaq

"Ullumikkut partiini siulittaasut tamaasa ataatsimeeqatigisimavakka, ataatsimoorlutalu isumaqatigiissutigaarput timmisartumut ilaalluni Kalaallit Nunaannut tikinnissaq pillugu nalunaarutip atuuffia juulip 20-anut sivitsorniarlugu. Tamanna toqqarsimavarput Danmarkimi, Islandimi aamma Savalimmiuni tikittunut annerusumik ammaaqqinnermut kingunerisassat tamakkiisumik takussutissaqartinniarlugit. Taamaaliornikkut nappaatip siaruariataarsinnaanera pitsaanerpaamik paasiaarsinnaajumallugu. Naalakkersuisut Siulittaasuat Kim Kielsen oqarpoq, nangillunilu:

Nunap immikkoortuini napparsimavinni misissuisarnernut atortut tikinnissaat aamma suli utaqqivavut, ammaaqqinnissamullu atatillugu misissuinermi atortut qaqugu tikinnissaasa ilisimanissaat pingaaruteqarluinnarpoq.

Misissuinermi atortut amerlinissaat tunillaassortoqannginnissaanut periuserisamut pingaaruteqartoq
Nunarsuaq tamakkerlugu misissuisarnernut atortut piumaneqartorujussuupput, pilersuisullu atortut qaqugu tunniussinnaanerlugit paasiniarsaralugu ulapputigaat. Misissugassat Nuummi suliarineqaannassappata nunatta killigisaannik ammaanerunissaq pissusissamisuussanngilaq, misissortinnerit misissortinnernullu akissutit piaartut tunillaassortoqannginnissaanut periuserisamut pingaaruteqarluinnarmata.


Attavissaq
Emil Stach
Tusagassiinermut akisussaasoq Corona Sekretariatet
stach@nanoq.gl