airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imi kaaviiaartitani annaasanik pissuteqartumik suliffinnut taarsiissuteqartarnernut malittarisassiani allannguut

Suliffeqarfimmi illua-tungerisat oqaloqatigereerlugit suliffiit COVID-19-eqarfimmi annaasaannik taarsiissuteqarnissamut naatsorsuisarnerup allanngortinnissaa Naalakkersuisut aalajangiuppaat. Tamatuma nassataraa kaaviiaartitanik annaasanik narlusuumik ingerlasunik malittarinnittumik taartisiaqalernermik.
1. juli 2020


Nuuk Center
Suliffeqarfiit aningaasartuutaasa aalajangersimasut ilaat taarsiivigineqartussat kaaviiaartitani annaasat naatsorsugaasut assigissagaat Sulisitsisut (GE), SIK, Nusuka, KNAPK allallu oqaloqatigeerlugit malittarisassianik Naalakkersuisut allannguipput.

Taamaattorli aningaasartuutit aalajangersimasut annerpaamik 80 %-inik suliffeqarfiit taarsiissutinik pissarsisinnaapput. Assersuutigalu kaaviiaartitani naatsorsukkani annikilleriarneq 45 %-iuppat aningaasartuutit aalajangersimasut 45 %-ii taarsiivigineqassapput. Tamatumali inuussutissarsiorfimmut ikiorsiissutisisinnaanissamut kaaviiaartitani minnerpaamik 30 %-inik annaasaqarsimanissap piumasarineqarnera allanngortinneqanngilaq.

Ulloq 1. juuni 2020-mit allannguut kingumut atuutsitatut atuutilerpoq. 30. septembari 2020 ilanngullugulu ikiorsiissutit tamarmiusutut atuupput.

Malittarisassiat atuuttut nassaarikkit, aaqqiissutillu pillugit annertunermik paasissutissat uani atuakkit: www.big.gl

Erseqqinnerusumik paasissutissiinissamut uunga innersuussisoqassaaq
Inuussutissarsiorfimmut Aatsitassanullu Naalakkersuisoq
Jens-Frederik Nielsen
Oqarasuaat: 34 50 00