airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaata ammaqqinneqarnera pillugu paasissutissat (immikkoortoq 1)

25. maj 2020-imi Kalaallit Nunaata ammaqqinneqarnissaanut immikkoortoq 1 ulloq 15. juni 2020 aallartissasoq Naalakkersuisut tusagassiorfinnut nalunaarutiminni nalunaarutigaat.
16. juni 2020


Air Greenland fly
Ullumikkut 15. juunimi Nunatta avataanniit timmisartukkut Kalaallit Nunaannut angalanermi piumasaqaatit pillugit Namminersorlutik Oqartussat nalunaarutaat nr. 18, 15. juuni 2020-meersoq (Immikkoortoq 1) atuutilerpoq. Killilersuinerit inerteqquteqarnerillu taakku 6. juuli 2020 ilanngullugu atuutsinneqassapput.

Soorlu Naalakkersuisut Siulittaasuata siusinnerusukkut nalunaarutigereeraa Kalaallit Nunaannut tikinnermut piumasaqaatit tullinnguuttut makku atuupput:
  • Ilaasut COVID-19-imik misissortinnerminni taassuminnga tunillanneqarsimannginnerannut aamma Sumut immersuiffissap immersorneqarsimasup nassiunneqarsimasullu uppernarsaat takutissinnaagunikku timmisartumut Kalaallit Nunaaliartussamut ikisinnaapput.

Kalaallit Nunaannut tikinnermi malittarisassat tullinnguuttut makku atuutissapput:
  • Kalaallit Nunaannut timmisartumik tikinnermik kingorna angerlarsimaannassapput, inunnik allanik peqateqarnatik. (Angerlarsimafimmi inuit tassani pineqanngillat)Privatimik pisortatigoortumillu katerisimaarnernut, aaqqissuussinernut, pisunut il.il. peqataaneq inerteqqutaavoq.
  • Inini inuussutissarsiortut inaataannut inuillu iserfigisinnaasaat, ilaatigut cafiit, neriniartarfiit aamma imerniartarfiit il.il. isersimaffigeqqusaanngillat
    • Taamaattoorli allanik isumagineqarsinnaanngippata pisariaqarnerpaanik niuerniartoqarsinnaavoq.
  • Taassuma saniatigut pisortat aamma namminersorlutik ingerlataqartut utoqqaat Illuutaannut napparsimmavinnullu isersimasoqaqqusaanngilaq

Inerteqqutit atuutissapput inuit COVID-19-mik tunillatsissimannginnermik uppernarsaammik takutitsinissaata tungaanut.
  • Inerteqqut tamanna innuttaasup tikinnermiit ullut 14-it qaangiunneranni COVID 19-imik tunillatsissimannginnermut uppernarsaammik takutitsinissaata tungaanut atuutissaaq.
  • Kalaallit Nunaannut tikinnermiit ullut 5-t qaangiunneranni misissorteqqittoqartarnissaa periarfissaavoq. Misissortinnermi COVID-19-imik nappaateqanngikkaanni taava angerlarsimaannaqqusaaneq atorunnaassaaq.

Innuttaasoq misissorteqqinngippat taava innuttaasoq Kalaallit Nunaannut tikinnermi kingorna ulluni 14-ini inerteqqutit atuutissapput.Innuttaasoq Kalaallit Nunaannut ullut 14-it kingorna nappaammik ersiuteqanngikkuni, inerteqqutit atorunnaassapput.

Inerteqqutinik unioqqutitsisoqartillugu pinerluttulerinermut Inatsit naapertorlugu pineqaatissiisoqarsinnaavoq.

Uani nittartakkami annertunerusumik atuarluni paasisaqartoqarnerusinnaavoq, tassanimi ilaatigut makku pillugit paasissutissat tassaniimmata:

Sumut-immersuiffissaq: sumut2020.gl

Sumut-immersuiffissamut ilitsersuut: Sumut-immersuiffissaq

Danmarkimi Coronavirusimut misissorteriaatsit: Junip 15-nianiit Kalaallit Nunaannut angalaneq

Angerlarsimaannaqqusaanerup allaaserinera: Angerlarsimaannaqqusaaneq

Kalaallit Nunaanni Coronamut misissortinnissamut inniminniinissamut Peqqissaavinni oqarasuaatit normui: Peqqinnissaqarfiit

Angerlarsimalluni mattusimasussaatitaanerup allaaserinera: Angerlarsimalluni mattusimaneq

Apeqqutigisatit akissutissaqartinneqanngippata oqarasuaatikkut 80 11 00-ikkut Corona pillugu paasiniaasarfimmut sianersinnaavutit imaluunniit ugguuna mailersinnaavutit; corona@nanoq.gl

Innuttaasut Kalaallit Nunaata avataani sulinngiffeqarlutik angalaniartut angalanermi sillimmasernissaq eqqarsaatigisariaqarpaat
Tassunga atatillugu Naalakkersuisut erseqqissassavaat nunani allani sulinngiffeqarnerup nalaani napparsimalissagaanni inuit angalanermi sillimmaseqarnissaat pisariaqarpoq. Tamanna ingammik pisariaqalerpoq COVID-19 nunarsuarmi tamarmi tuniluunnera pissutigalugu.
  • Aallarnissat sioqqullugu COVID-19-imik tunillatsissimaguit timmisartumut Kalaallit Nunaannukartumut ikisinnaanngilatit. COVID-19-mik tunillatsissimanngitsutut nalunaarfigineqareeruit aatsaat Kalaallit Nunaannut angalasinnaalissaatit.
  • Aallariartortarfimmi Sumut-immersuiffissamik immersuisimaninnut uppernarsaateqanngikkuit aamma tunillatsissimannginnernut uppernarsaatissaqanngikkuit timmisartumut Kalaallit Nunaannukartumut ikisinnaanngilatit.
  • Najugaqarnissannut saniatigut aningaasartuutit (napparsimanerit tunngavigalugu) nammineerlutit akilissavatit.

Angalanermi sillimaniarneq billetsimik inniminniinermi pisiarineqarsinnaavoq imaluunniit sillimmasiisarfimmi sillimmasertoqarsinnaavoq, taannalu ukioq tamaat sillimmaserneruvoq, angalanermi pisussami kisimi pinnani.

Angalanermi sillimmaserneq isumaqatigiissutip imarisai apeqqutaalluni, nunami allami napparsimalernermi aningaasartuutit akilertarpaat, ilaatigut Kalaallit Nunaannut angalaneq kinguartissinnaasarpoq kiisalu napparsimaneq pissutigalugalugu angerlarneq akilerneqarsinnaalluni.

Kalaallit Nunaanni Peqqinnissaqarfik innuttaasut nunani allani napparsimalernermi aningaasartuutit akilersinnaanngilai, tassunga ilaapput Danmark-imi nakorsaatinut aningaasartuutit. Taamaattumik innuttaasut piumaffigineqarput, nunani allani angalalernermi nakorsaatit pisariaqartut sulinngiffeqarnermi nassarnissaat maluginiaqqullugu.

Nunani allani pinasuartumik napparsimalernermi maleruagassat allat pillugit paasissutissat peqqik.gl-miittut innersuussutigineqarput:

Angalatilluni napparsimanermi ikiorneqarneq aamma norden.org: norden.org/da/info-norden/sygehjaelp-ved-midlertidigt-ophold-i-groenland (paasissutissat danskisut allassimapput)