airplanebooksbriefcase business cogs cross election entertainment fish house law lockmedicalpeopleselfservices socialtax

Aasianni Covid-19-imik tunillatsissimasoq ataaseq

Innuttaasoq Aasianneersoq Danmarkimiit angerlareerluni Covid-19-imik tunillatsissimasoq paasineqarpoq. Tunillatsittoq inoqutinilu aneqqusaanngillat, tunillaassuunnissarlu soorpianngitsutut nalilerneqarpoq.
24. maj 2020


covid 19 til test
Sivisuumik Danmarkimi napparsimareerluni innuttaasoq ullut arlallit matuma siorna Aasiannut angerlarpoq. Pineqartoq napparsimanermini aamma Covid-19-eqarsimavoq, kisianni aallannginnermini arlaleriarluni tunillatsissimanngitsutut misissortissimalluni.

Misissorteqqinnermi tunillatsittoqarsimatillugu ilisimaneqarluartut
Angerlareerluni mississorteqqikkami innuttaasoq Covid-19-imik tunillatseqqissimasutut uppernarsarneqarpoq. Nunanit tamalaaniit inuit Covid-19-imik tunillatsissimallutik napparsimareerlutik virusinik imaluunniit gen-ip atortuinik virusineersunik iggissamikkut sivisuumik peqarsinnaasarnerat, taamaalillutillu tunillatseqqissinnaasarnerat ilisimaneqarpoq.

”Tunillatsissimasoq matumani tunillatsikkunnaareerluni virusi atunngikkaluartoq pissutaalluni tunillatseqqissimassasoq ilimanarluinnarpoq. Kisianni tunillaassuussinnaanermut aarlerinaat pinngitsoorsinnaanngilarput. Taamaammat suliami matumani soorunami sunut tamanut piareeqqaniarsarivugut.'' nakorsaaneq Henrik L. Hansen oqarpoq.

Napparsimasoq qanigisaalu mianersornissaq tunngavigalugu aneqqusaanngillat allanillu iliuuseqaqqinnissaq pisariaqarnani.

Siunnersuinerit peqqinnissamut tunngasut eqquutsikkit
Kalaallit Nunaannut angalasut amerliartortillugit nappaatip tuniluunnissaanut ulorianartut amerliartortussaapput. Taamaammat nunatsinni pinngitsortaqarata nakorsaanerup peqqinnissakkut siunnersuinerinut malinninnissarput suli pingaartorujussuuvoq:
  • Minnerpaamik 2 meterinik ungasissuseqarit
  • Asakulaneq sprititerikulanerlu
  • Qanit talinnik asserlugu quersortarit tangajortarlutillu
  • Qisernaveersaarit
  • Eqqiaaneq silaannarissarnerlu eqqumaffigikkit

Danmarkiminngaanniit tikittut tamarmik sapaatit akunneri marluk angerlarsimaannassapput, Covid-19-imullu ersiuteqarnermi ingerlaannaq oqarasuaatikkut peqqinnissaqarfimmut saaffiginnittoqassaaq.

Angalasut tamarmik tikinnerminniit ullut tallimassaani Covid-19-imut peqqissaavimmi qaninnerpaami imaluunniit nunap immikkoortuani napparsimmavimmi misissortissapput.