airplanebooksbriefcase business cogs cross election entertainment fish house law lockmedicalpeopleselfservices socialtax

Hotelini unnuinerit akileraaruteqanngitsumik sulinngiffeqarluni angalanermut aamma atuutilerput

Hotelini unnuinerit akileraaruteqanngitsumik sulinngiffeqarluni angalanernut ilaalerput.
18. maj 2020


Vittus1
Tassaapput PPK, IMAK, AK aamma ASG.

Nalinginnaasumik akileraaruteqanngitsumik sulinngiffeqarluni angalaneq suliffimmit Københavnimut – imaluunniit nunatsinni angalaffissamut angalalluni taamaallaat atortaraluarpoq. Kingullermi taasami aningaasat amerlassusiata suliffimmit Københavnimut utimullu angalanerup billetip akia qaangissanngikkaa killiliunneqarluni. Aaqqissuussinermi maannamut hotelini unnuinerit aamma ilaatinneqalerput, aningaasartuutit katillugit suliffimmit Københavnimut utimut billetip akia qaanginngippagu.

Maleruagassat allanngortikkallarneranni aningaasat sumiiffimmi suliffigisamiit Københavnimut siumut uterlugulu angalanermi atorneqartussaagaluit nunatta iluani angalanernut atorneqarsinnaalerput, aamma nunatta iluani angalanerit Københavnimut angalanermiit akikinnerusimappat, taava angalanermi tikitani unnuisarfinnut aningaasartuutit ilaannakortumik imaluunniit tamakkiisumik matussuserneqarsinnaalissapput. Tapiliutitut isumaqatigiissuteqartoqarsimanngikkaluarpat tamanna periarfissaqarsimassanngikkaluarpoq.

Pingaaruteqarpoq naqissusissallugu angalaneq ataatsimoortoq inniminnerneqartussaammat, aamma pingaaruteqarpoq naqissusissallugu aaqqissuussineq akiliunneqarluni angalanermut aningaasaateqarfinnut aningaasartuuteqarnerunermik kinguneqartussaanngimmat, taamaasilluni angalasut sumiiffimmi suliffigisamiit Københavnimut siumut utimullu angalaneranni billitsimut aningaasartuutit sinnerneqarsimappata tamanna angalasup akilertussaammagu.

Angalanerit ataasiakkaat kattuffinniit aqunneqarput, taakkulu malittarisassaat maleruaqqusaallu naapertorlugit ingerlanneqartussaallutik.

Kattuffiit ataatsimoorlutik oqaaseqarput:

Takornariaqarneq coronamik ajornartorsiornermi eqqugaasorujussuuvoq, takornariat illoqarfitsinnut kusanaqisunut angalasinnaanngimmata. Taamatut siunnersuuteqarnermi pisariaqarsimavoq ilaasortat pitsaanerpaamik feriarnissaat qulakkeerniarlugu. Ilaasortat amerlasuut Danmarkimut feriarnissamik eqqasuuteqarsimapput Corona peqqutigalugu. Aningaasat sinneruttut Kalaallit Nunaanni akileraaruteqanngitsumik hotelimiinnissamut ilaasortavut feriarnissamut periarfissaat pitsanngorpavut, ataatsikkullu Kalaallit Nunaanni takornariaqarneq ajornartorsiornermi ikorfartorlugu".

Aningaasaqarnermut Aatsitassaqarnermullu Naalakkersuisoq oqaaseqarpoq:

Tulluusimaarpunga kattuffivut Naalakkersuisullu ataatsimoorsinnaammata nunatta aningaasaqarnikkut ajornartorsiornerani. Isumaqatigiissutikkut takornariaqarnermut tapersersuinerput ersersipparput. Isumaqatigiissut nunatsinni pinneqisumi takornariaqaleqqinnissaanut ikorfartuivoq. Periarfissaq taanna amerlasuut sineriatsinni angeqisumi atorluassagaat neriuutigaara. Kattuffiit suleqatigiilluarnerannut qujarusuppunga.

Isumaqatigiissut ukiup naalerneranut atuuppoq, tassa 31. december 2020, takornariaqarnermik ingerlataqartut piffissami tassani eqqugaanerussasut isumaqatigiissuteqartut naatsorsuutigimmassuk.

Inussiarnersumik inuulluaqqusillunga

Vittus Qujaukitsoq
Aningaasaqarnermut Aatsitassaqarnermullu Naalakkersuisoq

Dina Olsen
AK-p siulittaasua

Anette Bojsen
ASG-p siulittaasua

Birthe Møller Therkildsen
IMAK-p siulittaasua

Ken Jensen
Peqqinnissaq Pillugu Kattuffiit PK/PKK-p siulittaasua

Jess. G. K. Berthelsen
SIK-p siulittaasua


Attavissaq
Martin Christiansen (Aningaasaqarnermut Naalakkersuisoqarfik)
Toqq/direkte 34 52 13
MCHR@nanoq.gl
Vittus2