airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaat Amerikamiut suliffeqarfiutaanit COVID-19-imik misileraatissanik 5.000-inik pisivoq

Namminersorlutik Oqartussat Amerikamiut suliffeqarfiutaanit Cepheidimit COVID-19-imik misileraatissanik 5.000-inik pisipput. Misileraatissat ilaasa siulliit tikittareerput atulerneqareerlutillu.
14. maj 2020


DIH
Amerikamiut Nunanut allanut ministeriaqarfiat aamma Københavnimi Amerikamiut Aallartitaqarfiat ikiortigalugit pisisoqarpoq.

Kalaallit Nunaanni COVID-19-imut misileraatissat 5000-it qanittukkut pigilissagivut nutaarsiassaavoq nuannersoq. Misileraatit nutaat iluaqutigalugit sukkanerusumik ajornannginnerusumillu misiliisarsinnaalissaagut, Nunatsinni Nakorsaaneq, Henrik L. Hansen, oqarpoq.

Qaammatip matuma siuliani Nuummi nutaamik qitiusumik misileraaviliortoqarpoq taamaalillutillu COVID-19-imik tunillatsissimasinnaasut siornatigornit akikinnerusumik sukkanerusumillu misilerarneqarsinnaapput, tassami siusinnerusukkut misiligutit Danmarkimut nassiunneqartaraluaramik. Qitiusumilli misileraavik akisoqimmat qaammat ataaseq sinnerlugu ingerlasussatut pilersaarutaanngikkaluarpoq, tassami immikkut ittunik ilisimasallit avataaneersut ilaatigut ikiortigineqartariaqartaramik. Taamaattumik misileraanermut atortut najukkani sulisunit atorneqarsinnaammata tamakkuninnga pisineq immikkut ittumik periarfissatsialaasimavoq.

Misileraatit nutaat immikkut atoruminartuupput, tassami misileraatini Nuummi pigileriikkatsinni misissuiffigeqqissaarneqarsinnaagamik, taanna pingaarnertut tuberkulosertunik misissuinerni atorneqartaraluarpoq. Tamatuma saniatigut misissueriaaseq maannakkut atukkatsinnit pisariunnginneraaq aamma nal. ak. ataasiinnaq qaangiukkaangat misiligutinit akissutisisoqarsinnaalerpoq," Nunatsinni Nakorsaaneq, Henrik L. Hansen, oqarpoq.

Novo Nordisk Fonden Kalaallit Nunaanni COVID-19-imik misileraanissanut atugassanik 2,8 millioner kr.-nik tunniussaqarsimavoq, tassalu aningaasaliissutinit taakkunannga misileraatissat 5.000-it akilerneqarnissaannut tunniunneqarsimapput. Misileraatissat ilaasa siulliit Nuummut apuuttareerput atulerneqareerlutillu.

Manna tikillugu Kalaallit Nunaanni inuit 1.505-it COVID-19-imut misissortissimapput.

Paasissutissaqartitsivik
Misileraatit Amerikamiut suliffeqarfiutaannit Cepheid Inc-imit tunisassiarineqarput.

Misileraanerit imatut taaguuserlugit tuniniarneqarput; Xpert Xpress SARS-CoV-2.