airplanebooksbriefcase business cogs cross election entertainment fish house law lockmedicalpeopleselfservices socialtax

Kunngeqarfiup Issittoq pillugu periusissiaata nutarterneqarnera pillugu nutaarsiassat kingulliit

Kunngeqarfiup Issittoq pillugu periusissiaa maannakkut atuuttoq 2020-p naanerani atorunnaassaaq.
14. maj 2020


Isfjeldet
Issittoq pillugu periusissiap nutarterneqarnerata suliarineqarnera aallartinneqareerpoq, ukiup matuma naannginnerani Naalakkersuisunut, danskit naalakkersuisuinut Savalimmiunilu Namminersorlutik Oqartussanut missingiut akuerisassanngorlugu siunniunneqarnissaa sulissutigineqarpoq. COVID-19-ip nunarsuaq tamakkerlugu nappaalatitsinera peqqutaalluni periusissiassap naammassineqarnissaanut piffissaliussamut pilersaarummiit kingusinnerusukkut naammassineqarnissaa pisinnaavoq.

Taamaattoq Issittoq pillugu periusissiassap suliarineqarneranut atatillugu siammasissumik peqataatitsinissaq ilanngussaqarsinnaanissarlu qulakkeerniarlugit Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger suli sammisassaqartitsilluni ingerlatsiniarluni pilersaaruteqarpoq.

Naalakkersuisup inuussutissarsiortut, ilisimatusarnermik suliaqartut, NGO-niit kommuniniillu soqutiginnittut oqaloqatigiiffiusumik ataatsimeeqatigereerpai. Oqaloqatigiiffiusumik ataatsimiinnerni soqutiginnittut ilanngukkusutaminnik saqqummiussinissaminnut periarfissinneqarsimapput taakkualu periusissiassap suliarineranut atatillugu isumaliutigineqassapput.

COVID-19-ip nunarsuaq tamakkerlugu nappaalatitsinera peqqutaalluni aaqqissuussinerit pilersaarutigineqarsimasut ilai kinguartinneqarsimapput, tamatumunnga ilanngullugu Ilulissani inatsisartunik ataatsimeersuartitsinissaq. Massakkut Kalaallit Inatsisartunut ilaasortai peqataasoralugit isumasioqatigiinnissaq sulissutigineqarpoq. Tassani Kunngeqarfiup Issittoq pillugu periusissiassaata nutarterneqarneranut nunatsinniit nukittuumik ataatsimoortumilllu ilanngussaqarnissarput eqqarsaatigalugu, isumaliutigineqartullu isummat, ilanngukkusutallu eqqartorneqarnissaat siunertaralugu.

Inatsisartunut ilaasortanut aaqqissuussaq Danmarkimik Savalimmiunillu oqaloqatigiissuteqarnissamut piareersaataassaaq pissutigalugu aasalernerani internetikkut ataatsimiinnissaq Inatsisartunit kiisalu Danmarkimi Savalimmiunilu folketingimit lagtingimiillu peqataaffigineqartussaq pilersaarutigineqarmat. Naalagaaffeqatigiinni peqatigiittut akornanni ataatsimiinnissami periusissiassap imarisassaata eqqartorneqarnissaa aamma siunertarineqarpoq. Ajornanngippat ukiamut maani nunatsinni inatsisartunik najuulluni ataatsimeersuartitsinissamut periarfissaq aammattaaq aalajangiusimavarput.

Kiisalu aamma aasaanerani Kalaallit Nunaanni tamanut ammasumik innuttaasunik ataatsimiitsitsinissaq sulissutigineqarpoq. Tamanna siumut nalunaareerluni aatsaat peqataaffigineqarsinnaavoq, inuit imminnut qanoq ungasitsiginissaannut piumasaqaat eqquutsikkumallugu kiisalu mississuiffigineqarpoq streamerneqarsinnaassanersoq. Issittoq pillugu periusissiassamut tunngatillugu eqqarsaatigineqartut killiffiatalu saqqummiunneqarnissaat siunertarineqarpoq kiisalu innuttaasut suliffeqarfiillu soqutiginnittut isumaasa tusarneqarnissaat, aamma periusissiassamut tunngatillugu isummanik saqqummiisoqarnissaanut periarfisseeqqinnissaq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Baggerip oqallinnissaq periusissiassallu suliarineqarnissaa qilanaarivai.

Annertunerusumik paasisaqarusunnermi attaveqarfissaq: Naalakkersuisup allattaa Rosa Thorsen oqarasuaammut nr. 34 57 02 e-mailikkulluunniit: rosath@nanoq.gl.