airplanebooksbriefcase business cogs cross election entertainment fish house law lockmedicalpeopleselfservices socialtax

Namminersorlutik Oqartussat Kulturimut aningaasaliissutaannik agguaassineq

Ilinniartitaanermut, Kultureqarnermut, Ilageeqarnermut Nunanut Allanullu Naalakkersuisoq Ane Lone Bagger kulturimut aningaasaliissutissanik 3.315.239,00 kr.-inik agguaassivoq.
11. maj 2020


Ane Lone Bagger
Aningaasaliissutissanik agguaassineq Namminersorlutik Oqartussat ukioq manna agguaassinerisa siullersaraat, ukiup ingerlanerani pingasoriarluni agguaassisoqartarpoq. Qinnuteqarnissamut killissarititaasup 1. februariusup kingorna sapaatit akunneri 8-t qaangiutsinnagit Namminersorlutik Oqartussat kulturimut aningaasaliissutaanik nalinginnaasumik agguaassisoqartaraluarpoq. Kulturikkut aningaasaliissutinik qinnuteqarnissamut killissarititaasup kingorna sapaatit akunneri 5-it qaangiummata Covid-19 Kalaallit Nunaannut anngunnera peqqutaalluni Naalakkersuisup Ane Lone Baggerip agguaassinissamut piffissarititaasup sivitsorneqarnissaa pisariaqartissimavaa.

Tassunga tunngatillugu Ane Lone Bagger ima oqarpoq:

- ”Qinnuteqarnissamut killissarititaasup 1. februariusup kingorna sapaatit akunneri 8-t qaangiutsinnagit Namminersorlutik Oqartussat kulturimut aningaasaliissutaanik nalinginnaasumik agguaassisaraluarput. Covid-19-p anngunnera tassungalu atatillugu killilersuinerit kingunerisaanik eqqumiitsuliortut, nipilersortartut allallu kulturimik aallaavilimmik suliaqartartut unammilligassaqalersimapput, taamaammallu agguaassinissamut killissarititaasoq sivitsortariaqarsimavarput” taama Ane Lone Bagger oqarpoq.

Pissutsit taamaakkaluartut qinnuteqartut amerlanersaasa kulturikkut suliniutiminnik ingerlatsisinnaasimanerat Naalakkersuisup nuannaarutigaa:

- ”Tamanna nuannaarutissaavoq eqqumiitsuliortortagullu suliaat pillugit nersualaarusuppakka. Filmiliortartut, nipilersortartut, assilissat atorlugit allanillu eqqumiitsuliortartut suliaat pingaartumik Covid-19-ip erloqinartumik atuunnerata nalaanni pingaaruteqarsimaqaat, angerlarsimaffimmi aliikkutariinnarnagit aammali anersaakkut pissarsissutaasaramik. Eqqissisittarpaatigut tamannalu peqqinnissaq eqqarsaatigalugu pingaaruteqarluinnarpoq. Taamaammat periarfissaq iluatsillugu eqqumiitsuliortortatta innuttaasunik nuannaartitsilersarnerannik qujassuteqarfiginiarpakka.”

Aningaasat agguaanneqartut aningaasaliissutinit assigiinngitsunit sisamanit aningaasaliissutaapput imatullu agguarneqarsimallutik:

Kulturimut aningaasaliissutit
Kulturimut aningaasaliissutit aqqutigalugit suliniutit qulingiluat katillugit 790.000,00 kr-inik tapiiffigineqarput, taakkulu ilaatigut tassaallutik qaannat atortuinut sullivimmik pilersitsinissamut periusissamik suliaqarnissamut Timothæus Poulsenimut tapiissutit, ”Qanilaassuseq”-imut atugassatut videot immiussat inuttut attaveqaatit aqqutigalugit Moses Masik Marcussen-Mølgaardimit, Nuka Sørensenimit inuusuttunillu allanit saqqummersinneqartussat kiisalu Nuummi Eqqumiitsulianik Saqqummersitsiviup ukiut 48-t ingerlanerani eqqumiitsulianik saqqummersittarsimasaanik Kalaallit Inuiattut Ullorsiorneranni 21. juni 2020-mi saqqummersitsinissap piareersarneqarnera.

Aningaasat inunnit ataasiakkaanit, kattuffinnit il. il. qinnuteqaatigineqarsinnaapput pingaartumillu suliaminnut suliniutiminnullu atatillugu aningaasarsiutigalugu eqqumiitsuliortut ingerlataannut eqqumiitsuliornikkullu qaffasissusilimmik suliaasunut aningaasat tunniunneqarnerusarput.

Tamatuma saniatigut timersoqatigiiffiit peqatigiiffinni aaqqissuussinernut tunngatillugu eqqumiitsuliortut angalanernut aningaasartuutaasa matussutissaannik tapiissutissanik qinnuteqaateqarsinnaapput.

Filmiliornermik ingerlataqartunut aningaasat
Filmiliornermik ingerlataqartunut aningaasanit filmiliornermik pilersaarutinut arfineq sisamanut katillugit 1.405.323,00 koruuninik tapiissutinik tunniussisoqarpoq. Tassunga ilaallutik pisuusaartitsilluni filmiliassaq ”Piniartorsuaq” tapiiffigineqarpoq soorluttaaq Qasigiannguani timersoqatigiiffiup ”Kugsak-45”-ip pisimasuinnik tunngaveqarluni filmiliarineqarnissaanut Allan Jerimiassen tapiiffigineqartoq. Tamatuma saniatigut Pipaluk K Jørgensenip alianarlunilu quianartumik pissanganartuliaa ”Kaffemik” tapiiffigineqarpoq.

Filmit oqaluttualiaanerusut (fiktion) pisimasunillu tunngaveqarlutik (dokumentar) filmiliassatut pilersaarutigineqartut filmiliornermik ingerlataqartunut aningaasaliissutissanut qinnuteqaateqarfigineqarsinnaapput.

Atuakkat kalaallisoortut
Atuakkanut kalaallisut allatanik tapiissutaasartunit, suliat tallimat katillugit 742.550,00 kr-ninik taperneqarput. Inuit kakiortittarneri pillugit meeqqanut atuakkiornissamut Paninnguaq Lind Jensen aamma Frederik ”Kunngi” Kristensenip taalliai Jens Peter Olsenimit aaqqissorneqarsimasut ilaatigut tapiiffigineqarlutik.

Qinnuteqartoqarneratigut atuakkanut kalaallisuunut tapiissuteqartoqartarpoq. Taassuma saniatigut atuakkianut kalaallisut nutserneqarsimasunut aningaasanik tapiisoqarsinnaavoq. Qinnuteqaateqartup Kalaallit Nunaanni najugaqartuunissaa tapiissuteqartoqassappat piumasaqaataavoq. Tamatuma saniatigut aningaasaliissutit sammisaqartitsinernut allanut atorneqarsinnaapput, assersuutigalugu atuakkat immiussat saqqummersinneqarnerinut, atuakkiortunngortussat pikkorissarnerinut allanullu.

Kulturimik sulialinnut aningaasaliissutit
Tamatuma saniatigut eqqumiitsuliortut arfinillit katillugit qaammatini 17-ini sulinissaminnut kulturikkut sulialinnut aningaasaliissutinit 220.000 kr.-inik tapiiffigineqarput. Tapiiffigineqartut ilagaat Dennis Lars Rosing videokkut isiginnaagassiap ”Oqaluttuarit” suliarinissaanut, Hans Jukku Noahsenillu KNR radio aqqutigalugu ukiup ingerlanerani aallakaatinneqartussamik podcast-imik immiussaa.

Suliat aningaasaliiffigitittut allattorsimaffiat www.naalakkersuisut.gl-imi aaneqarsinnaapput.

Ukioq manna qinnuteqarfissatut ullut killiliussat tassaapput 1. maj aamma 1. september 2020. Namminersorlutik Oqartussat kulturimut aningaasaliissutigisartagai pillugit paasissutissat ersarinnerusut nittartakkami www.sullissivik.gl atuarneqarsinnaapput.


Annertunerusumik paasisaqarusukkuit uku attavigikkit:
AC Fuldmægtigi Uiloq Mathæussen, toqqaanartumik oqarasuaat 34 57 41, uilm@nanoq.gl imaluunniit
Kulturimut siunnersorti Mika Lyberth, toqqaanartumik oqarasuaat 34 57 44, mlyb@nanoq.gl