airplanebooksbriefcase business cogs cross election entertainment fish house law lockmedicalpeopleselfservices socialtax

Kitaata avataani qaleralittanik tulaassisussaatitaaneq affaannanngortinneqarpoq

Aalisarnermik inuussutissarsiuteqartut siusinnerusukkut qaleralinnik niuerfigisartakkaminnut nioqquteqarniarnerminni nualluussuaq COVID-19 pissutigalugu aporfeqalersimaqisut Aalisarnermut Naalakkersuisoqarfimmut saaffiginnissuteqarput.
6. maj 2020


Fabrik
Qalerallit nerpii, Kitaani qaleralittat tulaassisussaatitaanermik piumasaqaateqarfiusut atorlugit tunisassiarineqartartut, sassaalliutissaliassatut nioqqutigineqartarput (neriniartarfinnit, nerisarfinnit allanillu). Sassaalliutissanik niuerneq nualluussuup COVID-19-ip nalaani assorsuaq eqqugaasimavoq. Pingaartumik Europami sassaalliutissaarniarneq eqqugaasimavoq massakkullu unittuuissimalluni.

Akileraarutitigut akitsuutitigullu isertitat appariarujussuarnissaat pinngitsoortinniarlugu Kitaata avataani qaleralittanik tulaassisussaatitaanerup affaa atorunnaarsinniarlugu Naalakkersuisut aalajangerput.

Taamaalillutik Kitaata avataani qaleralittassat tulaassinissamik piumasaqaatitallit 5.502 tonsiniit 2.751 tonsinut apparneqarput.

Nuallussuup COVID-19-ip ajornartorsiortitsinera immikut illuinnarpoq, kialluunniillu ilisimanngilaa qanoq sivisutigisumik atuutissanersoq. Taamaammat Naalakkersuisut aalajangerput qalerallit tulaassinissamik piumasaqaateqarfiusut Aalisarnermut Naalakkersuisoqarfiup malinnaavigeqqissaassagai qaammatillu pingasukkaarlugit pissutsit naliliivigisassallugit.

Sukumiinerusumik paasisaqarusukkaanni attaveqarfissaq
Aalisarnermut Piniarnermut Nunalerinermut Naalakkersuisoqarfimmi pisortaaneq
Jørgen Isak Olsen
Oqarasuaat 34 53 08
E-mail: jio@nanoq.gl