airplanebooksbriefcase business cogs cross election entertainment fish house law lockmedicalpeopleselfservices socialtax

Akiuussutissalersuinermut pilersaarutinik annertusaaneq

Napparsimasut qajannartut nappaatinik annertuumik tunillaasartunik eqqugaasartut amerlassusaata ikilisarnissaat siunertaralugu Naalakkersuisut Nunatta Nakorsaataasivia aamma Nunatta Nakorsaaneqarfia suleqatigalugit akiuussusersiuineq annertusisarpaat, taamaalilluni coronavirusip tunillaassuunnerani peqqinnissaqarfiup artorsarnissaa pinngitsoortinneqassaaq.
1. maj 2020


SANA
Akiuussusersuinermut annertusisaatip nutaap imaraa:
  • Pneumokokkinut 65-ileereersimasunut aamma navianartorsiortunut ass. 65 ataallugit ukiullit katsorsarneqarsinnaanngitsumik napparsimasunut akiuussutissaq akeqanngitsoq
  • Naartusut erninissamut qaammatit pingasuinnanngortunut ilummoornermut (kighoste) akiuussutissaq akeqanngitsoq.

Pneumokokker bakteriet ilagaat ilaatigut annertuumik napparsimalersitsisinnaasoq. Nappaatit nalinginnaanerpaat pneumokokker-imit pissutaasinnaasut ukuupput; tassanngaannaq siullulerneq, qinngukkut aseruuttoorneq, puaap ameraasaatigut aseruuttoorneq ataavartuunngikkajuttarput kisianni napparsimasunut qajannartunut ilaannut puaap ameraasaatigut aseruuttoorneq sakkortusinnaasarpoq. Tunillatsissimagaanni pneumokok bakteriallu aap aqqutaanut siaruaassimaguni nappaat toqussutaalersinnaavoq aakkullu toqunartoqalersitsisinnaalluni (sepsis) aamma/imaluunniit qaratsap ameraasaanik aseruuttoortitsisinnaalluni (meningitis).

Inuit ass. katsorsarneqarsinnaanngitsumik nappaatillit pneumokokker-imik tunillatsikkunik annertuumik napparsimalersinnaapput. Taamaammat akeqanngitsumik akiuussusersinissaannut neqeroorfigineqarput.

Naartunermi ilummoornermut (kighoste) akiuussutissaq meeqqap inunngorneraniit qaammatit siulliit ilummuulinnginnissaanut illersuutissatut siunertaavoq, tassa imaappoq suli meeraq akiuussutissamik kapitissinnaannginnerani. Tamanna coronavirusip tunillaassuunnerata nalaani meeqqanik unitsitsisarnerit pinngitsoortinniarnerannut ilaassaaq.

Akiuussutissat peqqinnissaqarfimmut saaffiginninnermi pineqarsinnaapput. Nunatta Nakorsaaneqarfiata kommunit peqqinnissaqarfiillu kajumissaarpaat paaqqutarisariallit angerlarsimaffiini najugallit innuttaasullu angerlasimaffimmi peqqissarneqartartut angerlarsimaffimminni akiuussutissamik kapitinnissaannut suliniuteqaqataaqqullugit. Navianartorsiortunut ilaapput namminerlu peqqinnissaqarfimmukarnissaminnut ajornakusoortitsisinnaasarlutik.