airplanebooksbriefcase business cogs cross election entertainment fish house law lockmedicalpeopleselfservices socialtax

Naalakkersuisut angalanissamut innersuussisartuinut naammagittaalliuuteqarsinnaatitaaneq pillugu naqqiineq

Tallimanngornermi tusagassiortunik katersortitsinerup kingorna angalanissamut qinnuteqaatit itigartitsissutigineqaraangata naammagittaalliuuteqarsinnaatitaasoqanngitsoq erseqqissarneqassaaq.
27. april 2020


Kangerlussuaq
Ajornartorsiulernermi upalungaarsimasut arfininngornermiit ulloq 25. april nal. 8.00 Kalaallit Nunaannut Kalaallit Nunaanniillu angalanernut atuuttut Kalaallit Nunaanni COVID-19-ip tunillaassuunnerup siaruarnerata annikillisarnissaanut siunertaqarpoq.

Angalanissamut qinnuteqaatit angalanerit sorliit pisarialittut pisariaqanngitsutullu immikkoortinneqarsimanersut aalaavigalugit nalilersorneqartarput.

Angalanissaq pisariaqartutut aalajangerneqarsimasoq Politiit Nunattalu Nakorsaaneqarfiata akuersineratigut Naalakkersuisut angalanissamut innersuussisartuisa aalajangertarpaat ingerlatsinermullu oqartussaasunut allanut naammagittaalliuutigineqarsinnaanngilaq.

Angalanerit pisariallit tassaapput inuiaqatigiinnut pisariallit; SAR-imik suliaqarnerit, nakorsartarialinnik angallassigasuarnerit, upalungaarsimanissaq, attaveqaqatigiinneq niuernikkullu ingerlatat pisariaqarluinnartut pillugit inunnik usinillu assartuinerit pisariallit.

Pisariaqanngitsumik angalanerit imatut paasineqassapput:
  • Feeriarnissamut kissaatit
  • Ilaquttanut kammalaatilluunniit pulaarneq
  • Katittunut, ilisisunut, apersortittunut, kuisitsisunut aamma inuuissiortunut peqataaneq
  • Uumasuummik aallerniarneq