airplanebooksbriefcase business cogs cross election entertainment fish house law lockmedicalpeopleselfservices socialtax

Peqqinnissaqarfimmi suliat suliarineqartartut amerlineqassapput

Tunillaassortoqannginnissaanut periuserineqartoq atuunnerani Peqqinnissaqarfiup COVID-19-imik nappaateqartunut aamma coronavirusimik tunillanneqarsimasorisunut sullissinissaminut suli piareersimassaaq. Saniatigut suliassat allat annertusiartortumik suliarineqalissapput.
21. april 2020


SANA
Suliassat amerlineqarnerisa malitsigisaannik Peqqinnissaqarfiup COVID-19-imik nappaateqartunut aamma coronavirusimik tunillanneqarsimasorisunut sullissinerata saniatigut napparsimasut amerlanerusut misissorneqartussat katsorsarneqartussallu isumagineqalissapput.

Peqqinnissaqarfiup napparsimasut piaartumik katsorsagassat napparsimasullu qaammaterpaalunnik utaqqisinnaanngitsut isumagiuaannarpai. Maanna suliat annertusineqassapput ilaatigut misissuinerit, suliniutit katsorsaanerillu qaammaterpaalunnik kinguartinneqarsinnaagaluartut aamma isumagineqalissallutik.

Qanillinaveersaarneq malittarisassallu suli atuupput
Peqqinnissaqarfimmi suliassat amerlissapput, taamaakkaluartoq nappaatip siaruannginnissaanut inassutit, tassaasut qanillinaveersaarneq, eqqiluisaarneq eqiiaanerlu annertooq, suli pingaartinneqassapput.

Tamanna ilaatigut isumaqarpoq:
  • Sapinngisamik qarasaasiakkut nakorsisartitsisarneq (telemedicin) atorneqassasoq, oqarasuaataammalu Skype aqqutigalugit nakorsiarneq
  • COVID-19-ip ersiutaannut assingusunik nappaateqartoqarpat imaluunniit coronavirusimik tunillatsissimasorineqartoqarpat nammineerluni takkuttoqartassanngitsoq inassutigineqarpoq
  • Inini utaqqisarfinni, kaffisortarfinni ataatsimiittarfinnilu inuit amerlassusaannik killilersuineq suli atuutissasoq
  • Napparsimasunut pulaartut ilaginnittullu tungaasigut sukangasumik killilersuineq suli atuutissasoq

Suliassat suliarineqartartut amerlineqarnerat
Aallarniutaasumik misissuinerit katsorsaanerillu amerlineqassapput, piffinni passunneqarsinnaasut napparsimasunik sulisunillu angalanermik kinguneqartariaqanngitsut.

Suliassat amerliartorneqartussat ilaatigut tassaapput:
  • Akiuussutissanik kapuisarnerit
  • Meeqqanik misissuisarnerit
  • Inooriaatsimik misissuinerit
  • Ataavartumik nappaatilinnut nakkutilliinerit malitseqartitsinerillu
  • Kigutilerineq kigutinillu misissuinerit
  • Napparsimavimmi unitsitsinani nakorsaanerit
  • Pilatsitsinerit pilersaarutigineqareersut
  • Nukittorsaaqqinneq

Peqqissutsimut Naalakkersuisoq Martha Abelsen oqarpoq:

”Peqqinnissaqarfimmi pisariaqanngitsumik utaqqisut amerlipiloornissaat pinaveersaarnissaat pingaaruteqarpoq. Sulianik amerliartortitsineq innuttaasup peqqissusaa ataatsimullu isigalugu inuiaqatigiittut peqqissuseq qulakkeerniarlugu pivoq.”

Suliassat innuttaasup peqqissusaanut, piginnaassusaanut, inuunerata pitsaassusaanut sulisinnaassusaanulluunniit toqqaannartumik pingaarutilimmillu sunniuteqanngitsut suli pingaartinneqanngillat. Tassunga inuit imminnut qanillinaveersaarnikkut nappaatip siaruaannginnissaanik anguniagaqarneq pissutaavoq.

Tusagassiorfinnut nalunaarut una pillugu apeqqutissaqaruit uunga attaveqarsinnaavutit
sundhedsledelsen@peqqik.gl imaluunniit oqarasuaat +299 48 35 01