airplanebooksbriefcase business cogs cross election entertainment fish house law lockmedicalpeopleselfservices socialtax

Nunatsinni maanna misiligutit misissorneqarsinnaalerput

Manna tikillugu innuttaasut ullut marluk tikillugit COVID-19-imut misiligutit inerneri utaqqisarsimavaat. Maani laboratoriaqalernikkut misissugassat akissutaat innuttaasunut sukkanermik tunniunneqartalissapput, tassami misissukkat akissutaat ullormit ullormut tunniunneqarsinnaalissammata.
17. april 2020


SANA
Laboratoriamit COVID-19-imut misissuinerit maanna tamakkiisumik ingerlanneqalerput. Nunatta nakorsaanerata pilersitsineq malinnaaffigaa, sapaatillu akunnerata annersaani marlunnik misiligutinik tigusisoqartarpoq assigiimmillu inerneqartarlutik. Aqagumiit COVID-19-imut misissugassat Nuummi naammassineqarsinnaalissapput.

Laboratoriami atortut Kalaallit Nunaannukaannissaat pitsaasumik ingerlanneqarsimapput Kalaallillu Nunaanni peqqinnissaqarfimmi sulisut suleqatigalugit ingerlanneqalerluni. Atortut pingaaruteqartorujussuupput – innuttaasut tunillatsissimanerlutik sukkanermik akissutisinissaat kisiat eqqarsaatiginagu. Aammali nutaanik tunillatsittoqarsimatillugu sukkanermik iliuuseqarsinnaalissaagut tunillatsissimasullu sukkanermik attavigisinnaassallugit,” Nunatta nakorsaanera Henrik L. Hansen oqarpoq.

Laboratoriamut tunngatillugu paasissutissat:
  • Misissugassanik amerlasuunik suliaqarfiusinnaavoq pisariaqartinneqartunillu naammassisaqarsinnaanera naatsorsuutigineqarluni.
  • Suliat immikkut ilisimasallit marluk Dronning Ingridip Napparsimmavissuani laboratoriami sulisut suleqatigalugit suliarineqarput.
  • Immikkut ilisimasallit atortussat pisariaqartinneqartut nassarpaat.
  • Laboratoriap maannamuugallartoq qaammatini marlunni ingerlanneqarallarnissaa isumaqatigiissutaavoq.

Timmisartuussinerit allanngorneri
Martsip 20-anili upalungaarsimanermi immikkut timmisartunik Dash 8-nik sapaatip akunneranut tallimariarluni Nuup Københavnillu akornanni timmisartuussisoqartarpoq COVID-19-imut misiligutinik ullormut tunniussisoqartarnissaa qulakkeerniarlugu. Maani laboratoriaqalernikkut tamanna pisariaqarunnaarpoq, taamaammat Dash 8-mik timmisartuussinerit aqagumiit arfininngorneq apriilip 18-ianiit Imarpik qulaallugu timmisartuussinerit unitsinneqassapput.

Allanik apeqqutissaqaruit Katrine Hjelholt Nathanielsen, Naalakkersuisut Siulittaasuata Naalakkersuisoqarfianiittoq oqarasuaatikkut 34 50 00-ikkut attavigisinnaavat.