airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imut atatillugu ikiorsiissutit assut soqutigineqartut

Inuussutissarsiorfimmut ikiorsiissutit marluk atorlugit COVID-19-imik nalaataqarnermi eqqugaasunut nunatsinni suliffeqarfinnut aningaasarsialinnullu sillimmasersuut Naalakkersuisut inississimavaat.
16. april 2020


Hjælpepakker
Sapaatip akunneri pingasut sinnerlugit qinnuteqarfiginissaannut maannakkut ammasimasunut ikiorsiissutit taakku marluk assut piumaneqarsimapput. Suliffeqarfiit ataasinngornermi ulloq 23. marsi 2020-miilli ikiorsiissutinut qinnuteqaatinut nassiussaqarsinnaasimapput – periarfissarlu taanna amerlasuupilussuit atorsimavaat.

Aningaasarsialinnut aningaasarsianut matussusiinissamut ikiorsiissutit manna tikillugu qinnuteqaatinik suliffeqarfinnit 68-inik tigusaqarsimapput, qinnuteqaatinullu 34-inut aalajangiussinerit nassiunneqarsimapput.

Inuussutissarsiorfimmut ikiorsiissutit manna tikillugu qinnuteqaatit 300-it tigusaqarsimapput, qinnuteqaatinullu 150-it aalajangiussinerit nassiunneqarsimapput.

Maannakkorpiaq COVID-19-ip aningaasaqarnikkut kingunerisaanik qaangiiniarlutik ilungersuuteqartunut nunatsinni suliffeqarfinnut taakkununnga ajornartoornermik ikiorsiissutit pakkeeqataasinnaanerat qinnuteqaatit tiguneqarlutillu suliarineqartut amerlasuut taakku takutippaat.

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane oqarpoq:

Ikiorsiissutit pillugit qinnuteqarnissamut assut soqutiginnittoqartoq paasisinnaavara. Taamaattumik piffissap artukkiisup tamatuma qaangerniarnerani ikiorsiissutit suliffinnut sulisartunullu tapersersueqataasinnaanerat naatsorsuutigaara.

Taamaattumillu suliffeqarfimmi illua’tungerisat suleqatigalugit ikiorsiissutit piaartumik pilersissimagatsigit aamma tulluusimaarutigaara. Tamatumunnga ilanngullugu qinnuteqaaterpassuarnik ullut tamaasa tigusillutillu suliarinnittartut Akileraartarnermut Aqutsisoqarfimmi aamma Greenland Business’imi suliarujussuaq iluarisimaarpara. Naalakkersuisut Inuussutissarsiornermut- aamma Suliffeqarnermut kattuffiit ingerlaavartumik attaveqarfigiuarpaat, taamaaliornermi qulakkeerniarneqarpoq malittarisassat ersarinneri nalilersorsinnaajumallugit.


Qinnuteqaatinut attaveqartarneq inuussutissarsiorfinnut nittartagaq www.businessingreenland.gl aqqutigalugu pisarpoq (www.big.gl), tassanngaanniillu ikiorsiissutinut assigiinngitsunut taakkununnga linkseqarpoq.

Suliffeqarfiit qinnuteqarsimasut, aamma isumaqatiginngisaminnik aalajangiussamik tigusaqarsimasut aalajangiussinermik Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmut maalaaruteqarnissaat kaammattuutigineqarpoq, tassanilu maalaarutigisatut suliassat piaartumik suliarineqassapput.
  • Akileraartarnermut Aqutsisoqarfiup aningaasarsianik taarsiinissaq pillugu aalajangiussaanut maalaarutit uunga nassiunneqassapput: STmaalaarut@nanoq.gl
  • Inuussutissarsiorfinnut ikiorsiissutini Business Greenlandip aalajangiussinerinut maalaarutit uunga nassiunneqassapput: Businessmaalaarut@nanoq.gl

Annertunerusumik paasissutissarsioruit attavigiuk: Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik, mailikkut: isiin@nanoq.gl