airplanebooksbriefcase business cogs cross election entertainment fish house law lockmedicalpeopleselfservices socialtax

Meeqqat atuarfianni inaarutaasumik misilitsinnerit taamaatiinnarneqarneri

Ilinniartitaanermut Naalakkersuisup Ane Lone Baggerip siunnersuineratigut Naalakkersuisut aalajangerput, meeqqat atuarfianni 10. klassimi inaarutaasumik misilitsinnerit taamaatinnarneqarnissaannik nalunaarut atulersinniarlugu.
16. april 2020


Atuarfik ASK
Ane Lone Baggerip ilisimatitsissutigaa, taamatut siunnersuuteqarnissani sioqqullugu kommunini tallimani borgmesterit ilinniartitsisullu kattuffiat IMAK pitsaasumik pissarsinartumillu ataatsimeeqatigisimallugit.

Atuartut aasami feerialernissaq sioqqutitsiarlugu atuartitsissutini ukiup naanerani karakteerinik tunineqassapput, taakkualu inaartutaasumik misilitsinnernut taarsiullugit atuarsimanermut uppernarsaammut nuunneqassallutik.

Sapaatip akunnerini kingullerni atuarfiit matoqqaneri ajutoornermilu atuartitsinerit kiisalu Nuummi atuartitaanerup suli matoqqatinneqarnera, taamatullu killilersuinerit inassuteqaatillu atuarfinnut allanut atuuttut taamatut aalajangernermut patsisigineqarput.

Naalakkersuisoq Ane Lone Baggerip oqaatigaa:

Atuartunut atuartitsinikkut atugassarititaasut annertuumik assigiinngissuteqarsimapput – sulilu taamaallutik. Taamaattumik meeqqat atuarfianni inaarutaasumik misilitsinnerit ingerlanneqassagaluarpata atuartut naligiimmik atugassaqartitaanavianngillat misilitsinnerni angusaasa nalilernerinut sunniuteqartussamik. Pingaartumik atuartunut angerlarsimaffimminni ulluinnarnilu atukkatik patsisigalugit ajutoornermi atuartitsinermik pitsaanerpaamik pissarsinissaminnik ajornartorsiuteqarsimasunut kingunerluttussaavoq. Maannakkut atuarfiit ukiup atuarfiusup sinnerani atuartut tamaasa pitsaanerpaamik atuartinnissaat eqqarsaatigissavaat.

Annertunerusumik paasisaqarusunnermi saaffigineqarsinnaavoq: Simon Lennert (Uddannelsesstyrelsen)
Toqq/direkte 34 62 96 mail: sile@nanoq.gl