airplanebooksbriefcase business cogs cross election entertainment fish house law lockmedicalpeopleselfservices socialtax

Nuummi COVID-19-imik tunillatsissimasoq nutaaq

Ullumikkut misiligutit nunatsinnit tamaneersut 114-init akissutaat tigusimalerpavut. Taakku ilaat ataaseq tunillatsissimavoq.
4. april 2020


SANA
Tunillatsittoq tunillatsissimasunit ilisimaneqareersuneersuuvoq, taamaammat tamanna tupinnanngilaq. Tamatumali erseqqissaqqiinnarpaa pissutsit suli pimooruttariaqarivut. Nunarsuarmi suli tuniluuttoqarpoq, taamaammat najoqqutassat tamatta maleqqissaartariaqarpavut, soorlu inunnut akulerunnaveersaarneq, eqqiarluartarneq napparsimalersimagaannilu angerlarsimaannarneq. Piffissami matumani tuniluuttoqarneranik pitsaaliuiniarnerput pingaaruteqarluinnartuuvoq” Nunatta nakorsaanera Henrik L. Hansen oqarpoq.

Tunillaattoqalinnginnissaanut aamma kikkulluunniit tunillatsissimasunik attaveqarsimasut nappaammillu Covid-19-imik ersiuteqartut Dronning Ingridip Napparsimavissuanut misissortinnissaminnut saaffiginnissaat pingaaruteqarluinnartuuvoq.

Covid-19-imik nappaateqalersimanermi ersiutit tassaasinnaapput toqqusaarlunnerit, napparsimalluni misigisimanerit, nukkerinerit, panertumik quersornerit kiaqarnerillu.

Sapaatit akunnerata naanerani poorskikkunnilu aamma nappaateqarsorisunut misissugassanik misilitsittoqarsinnaavoq. Dronning Ingridip Napparsimavissua attavigiuk uunga sianerlutit 34 44 00.

Ullumikkut misiligutit taamak amerlatigisut akissuteqarfiginerannut ulluni arlalinni misiligutissat ataatsimut misissorneqarsimanerat pissutaavoq. Inuit katillugit 625-t misissuiffigineqarsimapput, taakkunanngalu katillugit aqqanillit tunillatsissimallutik. Maanna sisamat napparsimajunnaarsimapput tunillatsissimasunilu peruluttoqarani.