airplanebooksbriefcase business cogs cross election entertainment fish house law lockmedicalpeopleselfservices socialtax

Peqqinnissaqarfimmi suliassanik pinasuartariaanngitsunik kinguartitsineq

18. marts 2020


DIH
Nunatsinni, nunatta avataanut nunatsinnullu timmisartuusinerit tallimanngorpat marsip ulluisa 20- anni unitsinneqarnerat Peqqinnissaqarfimmi suliat ilaannut sunniuteqassaaq. Taakku tassaapput suliaritinnissat pilersaarutaareersut, immikkut nakorsiarnerit nakkutigineqarlunilu malittarineqarnerit ilaat.

Suliat pinasuartariallit ajornaquteqanngippat tamarmik ingerlanneqaannassapput. Tamanna nakorsaanerit nappaatinullu navianaatilinnut soorlu kræftimut nakorsaanerit tamarmik pisarnertut ingerlanneqarnissaannik isumaqarpoq.

”Nakorsaanerit suliallu allat nakorsagassat peqqissusaannut sunniuteqartussaanngitsut taamaammallu kinguartinneqarsinnaasut kinguartinneqassapput”, aqutsisoqarfiup pisortaa Malene Nielsen taama ilsimatitsivoq. Kinguartinneqartut kingorna allamik piffissalerneqassapput. Ass. seeqquusalersittussatut innersuunneqarsimagaanni soorunami nappaalanersuaq qaangiuppat suliaritittoqassaaq, Malene Nielsen Aqutsisoqarfiup pisortaa oqarpoq.

Oqarasuaatikkut attaveqaqinak
Peqqinnissaqarfik nammineq kinguartinneqartunut toqqaannartumik attaveqassaaq. Tamanna ulluni tulliuttuni pissaaq. Taamaammat sianernani Peqqinnissaqarfimmit isumaqatigiissutaasoq pillugu attavigineqarnissap utaqqimaarneqarnissaa kajumissaarutaavoq.

Nalunaarut una pillugu paasissutissat annertunerusut uunga:

Sundhedsledelsen@peqqik.gl attaveqarnikkut pissarsiarineqarsinnaapput.