airplanebooksbriefcase business cogs cross election entertainment fish house law lockmedicalpeopleselfservices socialtax

Immikkut illuinnartumik peqqissutsikkut iliuuserineqartunut ilassutitut aningaasaliissutit

Naalakkersuisut aamma Aningaasaqarnermut Akileraartarnermullu Ataatsimiititaliap ilassutitut aningaasaliissutit akuersissutigeqqammerpaat, tamatuma coronavirusi pillugu pisut tunngavigalugit immikkut illuinnartumik iliuuseqarnermut aningaasartuutit amerlanerulersinnissaannut Naalakkersuisut tunngavissaqalersippai.
28. marts 2020


DIH
Qaammatini tulliuttuni iliuuseqarnerit pisariaqartut taakku annertussusii pillugit Naalakkersuisut paasisimasaqarnerulissapput, taakku piffissap ingerlanerani qulaajaavigineqarsinnaalerpata.

Immikkut illuinnartumik iliuuserisanut aningaasartuutit tassaasinnaapput inunnik tunillatsissimasunik katsorsaavinnut angallassinerit taassumalu kingunerisaanik katsorsaanerit assigiinngitsut pisariaqartut. Aamma ilaatinneqarsinnaapput peqqinnissaqarfimmi sulisut napparsimasunik katsorsaanerminni aningaasartuutaat, matumani ilaallutik illoqarfinni nunaqarfinnilu allani nalinginnaasumik suliffiginngisaanni najugaqarnermut tunngasut. Aammattaaq ilaatinneqarsinnaapput misiligutinik suliaqarnermi, nakorsaatinik, immikkut ittunik akissarsianik taartaagallartunullu aningaasartuutit, inunnik tunillatsissimasunut mattunneqartunut inissiinerit, ilisimatitsinerit il.il.

Tamatuma ilutigisaanik Naalakkersuisut pisinnaatinneqarput, coronavirus-ip akiorneqarneranut tapiissutinut akiliutinik katersinissamut taakkuninngalu atuinissamut. Manna tikillugu aningaasarpassuit Polar Seafood A/S-ip 2 mio. kr.-it tunissutiginiarlugit nalunaarnikuuvoq, coronavirus-ip akiorneqarneranut atatillugu atortunik pisinissamut atorneqartussat.

”Aningaasaqarnermut ataatsimiititaliaq ilassutitut aningaasaliinermut qujassuteqarfigissavarput ilisimatitsissutigisinnaavarpullu, peqqinnissaqarfik qaffasinnerpaamik upalungaarsimammat suliassallu isumaginissaanut periareersimalluni, matumani napparsimasunik katsorsarneqartariaqavissunik peqartoqalissagaluarpat,” Peqqissutsimut, Inunnik Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Apeqqutit saqqummiukkumasinnaasat naalakkersuisup allattaanut Inger Heilmann Larsen-imut nassiunneqarsinnaapput uunga mail-imut ihla@nanoq.gl imaluunniit oqarasuaammut sianertoqarsinnaavoq uunga.: 34 64 95