airplanebooksbriefcase business cogs cross election entertainment fish house law lockmedicalpeopleselfservices socialtax

Corona pillugu killiffik

Corona pillugu killiffik nakorsaaneqarfimmit ima nassuiarneqarpoq:

Ippassaq tallimanngornermi coronamut misissugassat pingasut nassiunneqartut tamarmik tunillatsissimanngillat.
14. marts 2020


Taamaasilluni Nunatsinni tunillatsissimasoqarneranik suli takussutissaqanngilaq.
Nunatta Nakorsaaneqarfiata maannakkut inuit arfineq marluk misissugarivaat.

Hotline (Toqqaannartumik sianerfigineqartarsinnaasoq)
Ippassaq hotline 801100 pilersinneqarpoq. Hotline-ikkut coronamik qanoq tunillaassuisoqartarnersoq pillugu paasisaqartoqarsinnaavoq, tunillannaveersaarnissaq pillugu siunnersuutinik pissarsisoqarsinnaavoq aammalu coronamik napparsimanermi ersiutit suunersut pillugit paasissutissanik pissarsisoqarsinnaalluni.

Ippassaq oqarasuaatikkut emailikkullu attaveqartut amerlassusaat 100 missaanniipput. Oqarasuaatikkut attaveqartut amerlanersaat tassaapput angalasut. Siarnguttut nittartakkanut sumiiffiit aarlerinartorfiusut pillugit paasissutissalinnut innersuunneqarput.

Innuttaasut immikkut nunanit aarlerinartorsiorfiusunit uternikut innersuuttarpagut nunanit taakkunanngaannit aallarsimanermiit ullut 14 angerlarsimaqqullugit. Peqqinnissaqarfimmi utoqqarnillu sullissisunut tamanna piumasaqaataavoq.

Inuttaasut nunanit coronamik tuniluuffiusuniit uternikut innersuunneqartarput siunnersuutit nalunaarutigineqartut malinnissaannik. Nappaammut ersiutinik takussutissaqalissappata angerlarsimaannaqquneqartarput peqqinnissaqarfimmullu oqarasuaatikkut attaveqaqqullugit, toqqaannartumillu peqqissaaveqarfiit, ajoqusersimasunut nakorsiartarfiit napparsimavilluunniit sianeqqaartinnani orninneqassanngitsut.

Siarnguttut immikkut eqqugaanissaminnut aarlerinartorsiunngitsut inassutit nalinginnaasut malinnissaannut siunnersuunneqarput.

Sulisitsisut ilinniartitsiviillu tunillaassortunik nappaalanersuaqarneranut ataatsimiititaliarsuup innersuussutai tapersernissaannut kajumissaarneqarnikuupput, assersuutigalugu inuit katersuuttut amerlassutsikkut 100-nit ikinnerussasut aammalu ikuallannermi oqartussaanerup inuit inimi amerlassusaat akuersissutigineqartup affaannaasa inimi katersoqqusaassasut.

Innuttaasunut siunnersuutit
Inuit amerlasuut eqqiluinissamut inassutit ilisimareerpaat: assatit akulikitsumik errortorluartakkit; ikutsivit peqittarfianut quersorlutilluunniit tangajortarit; eqitaarineq atornagu; qisernak; inunnullu qanippallaarnak. Tamanna pillugu plakatit sumi tamani nuisapput.
Napparsimalersimagaanni coronalu pasinarluni qanoq iliortoqarnissaq pillugu paasissutissanik naammassisaqalerpugut. Taamaattoqarnerani siullermik peqqinnissaqarfimmut oqarasuaatikkut attaveqartoqassaaq, allanut tunillaassuineq pinaveersaartinniarlugu nalunaartoqaqqaarani peqqinnissaqarfimmut takkuttoqartassanngilaq. Peqqinnissaqarfimmut attaveqarnermi sumut angalasimaneq, immikkut tunillatsinnissamut aarlerinartoqarsimanersoq, qanoq sivisutigisumik nappaammik ersiuteqartoqarsimanersoq aammalu attaveqartup qanoq kissaneqarnersoq pillugit aperisoqassaaq.

Paasissutissat annertunerusut uunga saaffiginnissutigineqarsinnaapput:

Naalakkersuisut allatsi
Inger Heilmann Larsen
Tlf. +299 55 41 60
E-mail: ihla@nanoq.gl
Covid pillugu paasissutissiineq


Takusassiatut saqqummiussat allat takukkit

Videot takukkit