airplanebooksbriefcase business cogs cross election entertainment fish house law lockmedicalpeopleselfservices socialtax

Tusagassiortunik 15. marts 2020 katersortitsinermi COVID-19 pillugu pissutsinut malinnaatitsineq

15. marts 2020


Fly1
Ullumikkut tusagassiortunik katersortitsinermi Naalakkersuisup Karl Frederik Danielsen-ip apeqqutit arlaqartut ulluni kingullerni Coronavirus-imut maanna atuuttumut tunngatillugu sammineqarsimasut eqqartorpai.

Naalakkersuisup Karl Frederik Danielsen-ip ilaatigut eqqaavaa paasisinnaallugu ilinniarfiit ilinniartitaanernik ingerlatiinnarnissaat pillugu ernumaneq atuuttoq. Tamatumunngalu atatillugu malugeqquneqarpoq immikkut ilisimasallit inassuteqaataat tunngavigalugit pissutissaqanngitsoq pissutsit maanna taamaatsillugit ilinniarfinnik matooraasoqarnissaa. Tamatumalu kingunerisaanik ilinniarfiit ilinniartitaanerit ingerlatiinnassavaat allaasumik Nappaalanersuaqarneranut Ataatsimiititaliamiit inassuteqartoqannginnerani.

Naalakkersuisullu Karl Frederik Danielsen-ip ilutigisaanik malugeqquaa pissutsini atuuttuni atugassarititaasut aaqqissuunneqarmata immikkut matumani ilisimasallit inassuteqaataat naapertorlugit. Taamaasillunilu taakkuupput immikkut ilisimasallit nalilersuisartut ilinniarfiit matusariaqarnersut aamma apeqqutini atuartut ilinniagaqartullu angerlartinneqassanersut imaluunniit illoqarfimmi ilinniagaqarfigisaminniiginnassanersut. Inassuteqaataasut malinneqartarput sulianillu ingerlatsisuusut ingerlaavartumik sulissutigaat suliniutissanik pisariaqartunik aallartitsisarnissat, inassuteqaatinik nutaajusunik imaluunniit allannguuteqartunik takkuttoqartarneratigut, matumani aamma ilinniarfinnik matusisoqarsinnaaneranut apeqqummi.

Tamatumunngalu tapiliullugu Naalakkersuisup Karl Frederik Danielsen-ip innersuuppaa aamma Nunatsinni Nakorsaaneqarfiup erseqqissaatigisaa apeqqummi karantæne-qarsinnaanermut tunngasumi Kalaallit Nunaata avataaniit angerlamut tikinnermut atatillugu.

Naalakkersuisup Karl Frederik Danielsen-ip aamma angajoqqaanut kaammattuutigaa ajornartorsiut atuuttoq pillugu meeqqaminnik oqaloqateqartarnissaat, pissutsini atuuttuni unammilligassat sapinngisamik pitsaanerpaamik isumagineqartarsinnaaqqullugit, kiisalu ingerlaavartumik Nappaalanersuaqarneranut Ataatsimiititaliap inassuteqaatai malinneqarsinnaaqqullugit.

Ingerlaavartumik inassuteqaataasartut malinnaavigineqarsinnaapput quppersakkami uani www.nun.gl.

Inussiarnersumik inuulluaqqusillunga

Karsten Peter Jensen (Ilinniartitaanermut, Kultureqarnermut Ilageeqarnermullu Naalakkersuisoqarfik)
Toqq/direkte: +299 34 56 83
E-mail: kapj@nanoq.gl