airplanebooksbriefcase business cogs cross election entertainment fish house law lockmedicalpeopleselfservices socialtax

Ikiorsiissutit COVID-19-ip kingunerisaanik pissusiulersunut tunngatillugu

COVID-19 -ip kingunerisaanik pissusiulersut kalaallit suliffeqarfiutaannut ajornartorsiornartumik inissiipput.
21. marts 2020


Isfjeldet
Suliffeqarfiit amerlasuut aningaasarsiornikkut kaaviiaartitaminni malunnaatilissuarnik appariaateqartitserput, ilaallumi allaat maanna COVID-19-ip piffissami atuuffigisaani matuinnarallartariaqalerlutik.

Tamatumalu ilutigisaanik sulisut amerlasuut aamma ernummatigaat suliffigisatik aammalu pilersuinerminnut tunngavigisatik, soraarsitaassagaluarunik suliffeqarfiup suliffigisami matunera pissutigalugu.

Pisariaqartitsisoqarpoq immikkut ittumik aningaasaqarnikkut ikiorsiisoqarnissaanik pissutsit atuuttuulersut sakkortuallaaqqunagit.

Taamaattumik Naalakkersuisut ikiorsiissutissatut aaqqissuussinerit marluk pilersippaat, inuussutissarsiortunik namminersortunik ikiorsiissutaasussat aammalu sulinermik inuussutissarsiuteqartut aningaasaqarnerannut ikiorsiissutaasussat maannangaaq qaammatini tulliuttuni pingasuugallartuni.

Aaqqissuussineq inuussutissarsiornermik ingerlatsivinnik ikiorsiisussaq
Pilersinneqarpoq “immikkut ittumik ikiorsiissutissat” suliffeqarfinnut namminersortunut akunnittarfeqarnermi, neriniartarfeqarnermi kiisalu kiffartuussinernik inuussutissarsiutit assigisaasalu ilaannut sammititaasut. Suliffeqarfiit tamakkua maanna misigisimalereerpaat aningaasarsiornermikkut unammillernartumik inissisimaneq, aaqqissuussinerit il.il. ingerlanneqartartussaagaluit amerlasuut taamaatiinnarneqararnerisigut. Tamanna aamma atuuppoq suliffeqarfinnut maanna matugallaqquneqartunut.

Aamma pilersinneqarpoq “ataatsimoortumik inuussutissarsiortunut aaqqissuussineq”, sukkasuumik naammassisaqarfiusumillu inuussutissarsiutini allani aningaasarsiornikkut ajornartorsiuteqalersuni ikiorsiissutaasartussanik imaqartoq, tamatumani aamma aalisarnermi, sanaartornermi, assartuinermi allanilu.

Ikiorsiisarnernik aaqqissuussinerit taakkua arlariit periarfissiipput suliffeqarfinnut kaaviiaartitaminni minnerpaamik 30 pct.-inik annaasaqartunut taartsisiaqarnissamik aaqqissuussinermut qinnuteqarsinnaanermik, toqqaannartunik pisussaanik taamaatitsinernut imaluunniit suliffeqarfiup aalajangersimasumik aningaasartuutaanut matussutissanik.

Tamatumalu saniatigut suliffeqarfiit neqeroorfigineqarsinnaapput akisussaassuseqartumik aningaasanik attartorsinnaanermik aaqqissuussinermik, inuussutissarsiortunut ikiorsiissutinik aaqqissuussinerup iluani.

Matussutissatut taartsisiassanik aamma /imaluunniit attartukkanik annerpaamik 1 mio. kr.-inik suliffeqarfimmut qaammammut akiliuteqartoqarsinnaavoq inuussutissarsiortunut aaqqissuussinerit pineqartut iluanni.

Maannamut immikkoortitsisoqarallarpoq 50 mio. kr.-inik immikkut ittunik aaqqissuussinernut, aammalu inuussutissarsiornermut ataatsimut isigisumik aaqqissuussinernut 100 mio. kr.-inik annertussusilinnik.

Sulinermik inuutissarsiortunut namminersortut suliffeqarfiini sulisuusunut sammisumik aaqqissuussineq
Immikkoortitsisoqarpoq aningaasaliissutissanik 107 mio. kr.-inik Kalaallit Nunaanni sulinermik inuutissarsiuteqartut akissarsiaannut taartsisiassanik, suliffeqarfiit namminersortut soraarsitsinatik sulisuminnik angerlartitsigallartarnerannut COVID-19-ip kingunerisaanik.

Suliniut alla Naalakkersuisut aallartissimasaat inuussutissarsiortut tapersersorsinnaajumallugit COVID-19-ip atuuffigisaanik piffissamik qaangiilluarnissamut tassaavoq akileraarutinut aamma akitsuutinut il.il. akiliiffissap sivitsorneqarnera.

Suliniutit kingunerivaat Naalakkersuisut piginnaatinneqarneri akileraarutinik aamma akitsuutinik il.il. akiliiffissap piffissaliussap sivitsorneqarnera, taamalu suliffeqarfiit periarfissaqarnissaat aningaasanik tigoriaannarnik peqarnissamik.

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane tamatumunnga atatillugu ima oqaaseqarpoq:

”Assut nuannaarutigaarput maanna Naalakkersuisut saqqummiussinnaammatigit ikiorsiisarnernik aaqqissuussinerit ataatsimoortut, suliarineqartut suliffeqarnermi illuatungeriit ilaat qanimut suleqatigalugit. Uanga tulluusimaarutigaara aaqqissuussinerit taakkua aqqutigalugit qularnaarsinnaagatsigit qaammatit aggersut pingasut sillimaniarnikkut suliffeqarfinnut aamma sulisunut aaqqissuussinernik peqarluta, piffissami matumani annertuunik annaasaqalersunut COVID-19-ip kingunerisaanik.”



Pisortaq Brian Buus Pedersen, Sulisitsisut, SIK-mi siulittaasoq Jess G. Berthelsen, aamma Nusuka-mi siulittaasoq Gerth Lynge, KNAPK-mi siulittaasoq Henrik Sandgreen ima oqaaseqarput:

”Iluarisimaarparput paasinarsimmat ulluni kingullerni amerlasuuni ilungersorluta sulinerput ikiorsiissutissanik assigiinngitsunik aaqqissuussiumalluta maanna inerititaqarfiusoq ajunngitsunik angusaqarfiusumik. Maannalu atortuulersissinnaalerpagut suliniutissat arlaqartut nunatsinni inuussutissarsiortunut aammalu suliffeqartunut sammisuusut, COVID-19-ip kingunerisai ajornerit aningaasaqarnikkut iliuuseqarfigisinnaajumallutigit.”



Qinnuteqartoqarsinnaavoq inuussutissarsiutinut aaqqissuussinerni aammalu sulinermik inuutissarsiortunut ikiorsiissutissani (akissarsianut taartsisiassat suliffeqarfinnut namminersortunut) ataasinngornermiit ulloq 23. marts 2020 nal. 12.00. Isersinnaaneq pissaaq inuussutissarsiornermut quppersakkakkut uani www.businessingreenland.gl (www.big.gl), tassaniippullu aaqqissuussinernut assigiinngitsunut aqqutissat.

Aamma www.big.gl-imi nassaassaapput ikiorsiissutissat assigiinngitsut imarisaat qinnuteqarnissamilu atugassarititaasut.
  • Annerusunik paasisaqarumasunut innersuussisoqassaaq ukununnga:
  • Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane, oqarasuaat 34 50 00
  • SIK-mi siulittaasoq Jess G. Berthelsen, oqarasuaat 32 21 33
  • Sulisitsisut Pisortaat Brian Buus Pedersen, oqarasuaat +45 42 68 00 11
  • KNAPK-mi siulittaasoq Henrik Sandgreen, oqarasuaat 32 24 22
  • Nusuka-mi siulittaasoq Gerth Lynge, oqarasuaat 48 53 57