airplanebooksbriefcase business cogs cross election entertainment fish house law lockmedicalpeopleselfservices socialtax

Danmark-imi efterskole-ni atuartut tamarmik isumagineqarput

Naalakkersuisut, ilisimavaat inuiaqatigiit tamarmik malinnaavigigaat Covid19/ Coronavirusip qanoq ineriartornera.
12. marts 2020


Naalakkersuisoq tamatumunnga atatillugu eqqumaffigaat meeqqat aamma inuusuttuaqqat Danmark-imi aamma nunani allani atuarnerminnut aammalu ilinniagaqarnerminnut atatillugu najugaqartut.

Statsministerip 11. marts tusagassiortunik katersortitsinermini ilisimatitsissutigaa atuarfiit, efterskole-t aamma ilinniagaqarfiit tamarmik ulluni 14-iugallartuni tullerni matoqqanissaat. Atuartut aamma ilinniagaqartut pisortat atuarfiutaanniittut, efterskole-niittut, inuusuttuaqqanut ilinniarfinniittut aammalu qaffasinnerusunik ilinniarfinniittut il.il. sukkanerpaamik kingusinnerpaamillu tallimanngorneq 13. marts 2020 sapaatip akunnerini tulliuttuni marluugallartuni angerlarallassapput.

Ilinniartitaanermut Naalakkersuisoqarfik paasinarluinnartumik angajoqqaaniit aamma ilinniartuniit 18-it inorlugit ukiulinniit Danmark-imiittuniit saaffigineqartarpoq, angajoqqaallu Covid 19/Coronavirus-ip siaruaanneranut atatillugu ernumanertik oqaatigisarlugu.

Taamaattumik Naalakkersuisut Danmark-imi ineriartorneq malinnaavigeqqissaarpaat, ingerlaavartumillu danskit naalakkersuisui oqaloqatigisarlugit. Tamatumunngalu atatillugu isumaqatigiissutaavoq pingaaruteqartoq meeqqat inuusuttuaqqallu atuarfimminni / ilinniarfimmini najugaqartut, matumani aamma nerisaqaatigalugu ingerlatsivinni ilinniarnertuunngorniarfinni il.il. isumagineqarluarnissaat. Meeqqat taakkua ilinniarfiit matunerisigut ilaginnarneqarnavianngillat. Najugaqarfinni namminerni isumaqatigiissutigineqassaaq nerisaqaatigalugu ineqarfiusuni ilinniartut ilinniarfinniiginnartussaanersut, ilinniartullu kikkut angajoqqaaminnut, ilaquttaminnut angajoqqaarsiaminnulluunniit ingerlatsinneqassanersut, ilinniarfiit ammaqqinnissaasa tungaannut, ilinniagaqarneq ingerlaqqissinnaaqqullugu.

Ilinniartunut ilinniarfinniiginnartussanut tunngatillugu ilinniarfiit / atuarfiit isumagisassaraat toqqissisimanartunik ajunngitsunillu atugassaqartitsinissat. Danskit Statsministeriata tamatumunnga atatillugu erseqqissaatigaa atuarfiit / ilinniarfiit ammaannassasut meeqqanut ilaquttaminnut angerlarsinnaanngitsuut imaluunniit angajoqqaarsiaminniissinnaanngitsunut. Taamaattumillu ilinniarfiit sulissutigaat najukkani namminerni eqqorneqartunut tunngatillugu aaqqiissutissarsinissat.

Naalakkersuisut kaammattuutigissavaat angajoqqaat meeqqaminnut ilinniarfinniittunut efterskole-niittunullu eqqissisimallutik tapersersuiniarlutillu attaveqarnissaat pissutsit maanna atuuttut atuutsillugit.

Naalakkersuisut pisortat allat assigalugit eqqoriarsinnaanngilaat pissutsit qanoq ittut Covid 19/Coronavirus -imut tunngatillugu ineriartorfiunissaat, kisiannili ingerlaavartumik nalunaaruteqartassallutik. Taamaattumik pingaaruteqarpoq angajoqqaat ineriartorneq pillugu paasissutissani malinnaanissaat, taamatullu meeqqamut aamma ilaqutariinnut naleqquttunik iliuuseqartarlutik.

Takuuk efterskole-t peqatigiiffiata quppersagaa Efterskoleforeningens hjemmeside ilassutitut paasissutissanik Covid 19/Coronavirus efterskole-ni pillugu imaqartoq.

Annertunerusumik paasisaqarusunnermi saaffigineqarsinnaavoq Ilinniartitaanermut, Kultureqarnermut Ilageeqarnermullu Naalakkersuisoqarfimmi pisortaagallartoq:

Karsten Peter Jensen
Tlf. toqq. +299 34 56 83
E-mail: kapj@nanoq.gl