airplanebooksbriefcase business cogs cross election entertainment fish house law lockmedicalpeopleselfservices socialtax

Piareersaanerit torersumik aqutamillu ingerlanneqarput

Politikkikkut isumaqatigiilluni Nunatsinniit nunatsinnullu attaveqaatit matugallarnissaat siunniunneqarpoq – taamatuttaaq atuarfiit matugallassallutik.
17. marts 2020


Kim Kielsen
Innuttaasut toqqissisimannginnerat isumakulunnerallu paasisinnaalluarparput, taamaattorli erseqqissaassutigineqassaaq pisut ataavartumik nalilersorneqarnerat ingerlaannarpoq. Piareersaanerit sukumiisut nalilersorluarlugillu toqqammaviupput aalajagiinermi. Ullullu kingulliit oqariartuutit uteqqinneqassapput: eqqissilluta uippakajaanatalu ingerlaassaagut, tamanna politikkikkut inuttullu pingaartitassaraarput, Naalakkersuisut Siulittaasuat Kim Kielsen oqarpoq.

Maannakkut killiffimmi aalajangerneq unaavoq; Nunatsinniit nunatsinnullu timmisartuussinerit tallimanngorpat marsip 20-ani nal. unnuap qeqqaniit sapaatit akunnerini marluugallartuni matuneqassasut. Soorunami peruluttunik angallassisariaqalernissat assigisaallu uani mattussaassanngillat, aamma umiarsuit pajuttut pineqanngillat. Uani inunnik angallassineq pineqarpoq, aamma nunap iluani inunnik angallassineq unitsinneqarallassaaq.

Tamatuma saniatigut meeqqat atuarfii ataasinngornermi martsip 23-aniit aamma sapaatit akunnerini marlunni atuukkallartussamik matoqqatinneqartussanngorput.

Nuannaarutigaara taamatut aalajangerneq partiit tamarmik isumaqatigiissutigigaat, tamannalu toqqissisimasumik ingerlatsinissatsinnik tunuliaqutsiivoq. Partiit Inatsisartuni ilaasortaatitaqartut tamarmik siuttuisa akunnerminni isumaqatigiissutigisaat Naalakkersuisut siulittaasuata Kim Kielsen-ip naqissuserpaa.

Nunatsinniit nunatsinnullu timmisartuussisarnerit matoqqatinneqarallarnissaat tallimanngorneq apriilip 3-ata tungaanut atuukkallartussaavoq. Meeqqallu atuarfiinik matoqqatitsigallarnissaq ataasinngornernerup apriilip ulluisa 6-ata tungaanut atuukkallartussaasoq Naalakkersuisut siulittaasuata Kim Kielsen-ip saqqummiussinermini ilanngullugu erseqqissaatigaa.

Pisumiit pisumut nalilersuineq ingerlanneqassaaq, maannakkuungallartoq ingerlatsinissaq taamatut isikkoqarpoq. Erseqqissaassutigineqaqqissaaq eqqiluisaarnissamut pissuserissaarnissamullu innersuussutit malinneqarnissaat.

Inussiarnersumik inuulluaqqusillunga
Kim Kielsen