Nunarsuaq tamakkerlugu peqqinnissaq pillugu suliniaqatigiiffissup WHO-p ukiumoortumik TB-mut ulloritittagaanut marsip ulluisa 24-anni pisussamut atatillugu, nunat tamarmik TB akiorniarlugu iliuuseqarnissaq qulakkiissavaat. TB suli nunarsuaq tamakkerlugu innuttaasut sisamararterutaasa 2017-imi TB-mik tunillatsissimanerisigut 10 millionillu TB-mik nappaateqalersimanerisigut, peqqissutsimut tunngatillugu unammilligassaavoq annertooq.
Nunatsinni TB suli atugaaqaaq. Ukiunili kingullerni atugaanerata appariartornera takuneqarsinnaavoq, 2018-imilu TB-mik nappaataat suussusersisat 49-uupput tassalu innuttaasut 100.000-iuppata 88-it TB-mik nappaateqartutut nalunaarutigineqarnerat. Nunarput taamaalilluni nappaateqalerfiunerpaanut killigititaasup ataanut inissippoq. Sulili nunatta ilaani agguaqatigiissitsinermit amerlanerusunik TB-mik nappaateqartoqarpoq.
Sakialluut (TB) nappaataavoq tuniluuttoq tappiorannartunik bakteerissanik Mycobacterium Tuberculosis-inik patsiseqartoq. TB amerlanernit sakialluutitut ilisimaneqarpoq, timilli pisatai allat TB-mik nappaateqarfiulersinnaapput. Tappiorannartut kuseriarnernit isaannarmik takujuminaatsunit -quersornikkut tangajornikkullu siaruaanneqartunit- tuniluuttarmata, sakialluut kisimi tuniluuttuuvoq. TB-ip tappiorannartua ukiorpassuarni timimiissinnaasarpoq kingornalu nappaammut akiuussinnaatsutsip sanngiillinerani utoqqalinermiluunniit nappaataalersinnaasarluni.
Sapaammi marsip ulluisa 24-anni nunarsuaq tamakkerlugu TB sammineqassaaq. Nunatsinnissaaq TB-mik akiuiniarneq pitsaaliuinerlu sammissavagut. Nunatsinni sumiiffinni assigiinngitsuni TB pillugu sullissisut, marsip ulluisa 24-anni tamatumalu missaani, TB pillugu ilisimasat annertusiniarlugit, pitsaaliuinermut atatillugu sammisaqassapput.
TB-ip oqaluttuassartaa pillugu saqqummersitsineq, suliniuteqarnermik annertuumik, nunatsinni 1950-ikkunniit 1980-ikkunnut ingerlanneqartumik ullumikkullu TB akiorniarlugu pitsaaliniarlugulu iliuuserisanik takutitsisoq, Nuummi ammarneqassaaq. Saqqummersitsineq Nuummi katersugaasivimmit (Nuutoqqamit) Nunatsinnilu Nakorsaaneqarfimmit suleqatigiissutaavoq. Saqqummersitsineq kingorna sinerissami katersugaasivinni assigiinngitsuni 13-ini takutinneqassaaq.
TB qanoq ililluni tunillaattarpa? Nappaammut ersiutit suuppat? Qaqugu nakorsiartariaqassaanga? Kalaallit Nunaanni illoqarfik suna 2018-imi TB-mik nappaateqarfiunerua? Taakku tassaapput apeqqutit innuttaasunit akissutissarsiviusinnaasut.
Nittartakkami
www.tuberkulose.gl TB pillugu nalorsitsaarneqarsinnaavutit. Apeqqutit qulit pilertornerpaamik akisinnaasariaqarput, killeqanngitsumik misiliisoqarsinnaavoq. Eqqortunik pilertornerpaamillu akissuteqartoq taamaalillunilu pointinnannerpaaq tunissummik pisissutissamik 500 koruuninik nalilimmik eqquissaaq.
Kan du slå den bedste score i quizen!
Svar på 10 spørgsmål så hurtigt som muligt. Den person der scorer flest point den 24. marts vinder et gavekort på 500 kr.
EQQUINIAATITSINEQ AALLARTIGUK
Marsip ulluisa 24-at nunarsuaq tamakkerlugu TB-mut ullorititaavoq, nunarsuaq tamakerlugu peqqinnissaq pillugu kattuffissuup WHOp nunat tamarmik ataatsimoorlutik TB-mik akiuiniarnissaannik kajumissaarinera. Nunatsinnissaaq ulloq malunnartinniarneqassaaq.
Ukiuni qulikkaani kingullerni nunarsuaq tamakkerlugu TB-mik akiuiniarneq annertuumik angusaqarfiuvoq. Taamaakkaluaq nappaat suli nappaatit tuniluuttut toqumik kinguneqartartut akornanni qaffasinnerpaatut inissisimavoq. Ullormut inuit 4.500-it missaasa TB toqqutigisaraat WHOmit naatsorsuutigineqarpoq. 2018-imi inuit 10 millionit TB-mik napparsimalerput. Tamatuma peqatigisaanik TB nakorsaatinik nalinginnaasunik nakorsarneqarsinnaanngitsoq unammillernarsiartorpoq.
Kalaallit Nunaanni TB-mik akiuiniarnermi iliuusissatut siunniussat nutaanerpaat 2017-imiit 2021-mut atuuttussat suliaralugit aallartippagut. Tamatumani 2050 nallertinnagu TB-p nappaatigineerunnissaa 2025- ilu nallertinnagu TB-mik nappaateqalersartut innuttaasut 100.000-iuppata 72-inngorlugit affaannanngortinnissaat anguniagaavoq. 2017-imi innuttaasut 100.000-iuppata 107-iupput. Iliuusissatut siunniussap angunissaa aqutsinikkut toqqammaveqarnissamik, suliffeqarfiit akimorlugit suleqatigiinnermik peqqinnissaqarfimmillu ingerlalluartumik piumasaqaatitaqarpoq.
Ukioq manna, nuna tamakkerlugu qitiusumik immikkoortuni tamani TB-mik immikkut ilisimasalinnik peqqissaasoqalernikkut TB-mut tunngatillugu sulinerup aaqqissuussaanera peqqinnissaqarfiup pitsanngorsaavigaa. Taakku nuna tamakkerlugu TB pillugu suleqatigiit najukkanilu TB-mik nappaatillit pingaarnertut attavii suleqatigalugit TB pillugu anguniagassatut siunniussat piviusunngortissavaat.
Peqqinnissaqarfiulli kisimi nappaat pitsaaliorsinnaanagulu akiorsinnaanngilaa. Nappaat inuttut- inuuniarnermilu atukkanut ilaatigut inigisamut imeqarnermut kuuffeqarnermullu attuumassuteqartuummat taamammallu nakorsaanikkuinnaq ajornartorsiutaanngimmat, suliffeqarfiit akimorlugit suleqatigiinnissaq aalajangiisuuvortaaaq.
Innuttaasutut nappaammut TBmut ersiutit ilisimaarinissaat takkulu misigigaanni peqqinnissaqarfimmut saaffiginninnissaq pingaaruteqarportaaq. Taamaammat nittartakkamut www.tuberkulose.gl -imut iserlutit nappaammut ersiutinut tunngasut atuakkit TB-lu pillugu nalorsitsaarinermi peqataallutit.
TB qanoq ililluni tunillaattarpa? Nappaammut ersiutit suuppat? Qaqugu nakorsiartariaqassaanga? Kalaallit Nunaanni illoqarfik suna TB-mik nappaateqarfiunerua? Apeqqutinut taakkununnga akissutit nittartakkami www.tuberkulose.gl-imi pissarsiarisinnaavatit.
Nittartakkamissaaq TB pillugu nalorsitsaaruteqarpoq. Apeqqutit qulit sivikinnerpaamik akissuteqarfigineqassapput killeqanngitsumillu misileeqattaartoqarsinnaalluni. Sukkanerpaamik akissuteqartoq taamaasillunilu pointinik pissarsinerpaaq 500 koruunit nalingannut pisissutissamik eqquissaaq.
Nunatsinni TB-mik suliallit marsip ulluisa 24-anni TB pillugu sammisaqarniarput.
